திங்கள், 9 மே, 2011

வன்னிப்போரின் இறுதிக் கட்டத்தில் மேற்கின் இராஜதந்திரிகள் செய்த நகர்வுகள் எவை? நோர்வே நாளிதழ் கட்டுரை

மேற்குலகின் இராஜதந்திரிகள் 2009ஆம் ஆண்டின் முதல் 5 மாதங்களும் இலங்கைத்தீவின் போரினை முடிவுக்குக் கொண்டு வருவதற்கு எவ்வாறு முனைப்புடன் முயன்றனர் என்பதை வெளிப்படுத்தும் 38 வரையான – வீக்கிலீக்ஸ் ஊடாகக் கசிந்துள்ள அமெரிக்க வெளியுறவு அமைச்சக ஆவணங்களை நோர்வேயின் ஆப்தன்போஸ்தன் (Aftenposten) நாளிதழ் வெளியிட்டுள்ளது.
இது தொடர்பாக ஆப்தன்போஸ்தன் வெளியிட்டுள்ள கட்டுரையின் தமிழாக்கத்தினை இங்கே முழுமையாகத் தருகின்றோம்:
2009 மார்ச் மாதம் அமெரிக்க தூதுவர் றொபேட் பிளேக் போரினால் பாரிய மனிதாபிமான அழிவு ஏற்படுமென எச்சரித்திருந்தார். அரசாங்கப் படைகள் அதே தீவிரத்தில் போரைத் தொடருமானால், பல்லாயிரக்கணக்கான பொது மக்கள் பலியாக நேரிடும் எனவும், அது அனைத்துலகின் கண்டனங்களுக்கும் போர் மீறல்கள் தொடர்பான குற்றச்சாட்டுகளுக்கும் இட்டுச் செல்லுமென பிளேக், சிறிலங்காவின் அன்றைய வெளியுறவு அமைச்சருடனான சந்திப்பின் போது எச்சரித்துள்ளார்.
அதேநேரம், விடுதலைப் புலிகளின் தலைமையுடன் தொடர்புகளைக் கொண்டிருந்த ஒரேயொரு மேற்குலக நாடான நோர்வே, போரில் விடுதலைப் புலிகளின் தோல்வி உறுதிசெய்யப்பட்டு விட்டதாகவும் பேரழிவு ஏற்படுவதற்கு முன்னர் சரணடையுமாறு அவர்களுக்கு எடுத்துச் சொல்லிக் கொண்டிருந்தது. ஆனால் விடுதலைப் புலிகள் அதற்குச் செவிசாய்க்கவில்லை.
'இரத்தக்களரியைத் தடுப்பதற்கு நாங்கள் முழுமூச்சாகச் செயற்பட்டோம். எங்களால் இயன்றதைச் செய்ததாகவே உணருகின்றோம். ஆனபோதும் பல்லாயிரக் கணக்கில் மக்கள் கொல்லப்பட்டதைப் பார்க்கும்போது மிகவும் விரக்தியாக இருந்தது என்கிறார் சிறிலங்காவிற்கான அன்றைய நோர்வே தூதுவர் Tore Hattrem.
போர் வலயத்திற்குள் பொதுமக்கள் எவருமே இல்லை என 2009 மே மாதம் சிறிலங்காவின் பாதுகாப்பு அமைச்சகம் அறிவித்தது. அந்தக் கூற்று உண்மையல்ல என்பதையும் பல்லாயிரக்கணக்கில்; பொதுமக்கள் உயிராபத்திற்குள் சிக்கியிருப்பதையும் எடுத்துரைக்கும் பல்வேறு அறிக்கைகள் அமெரிக்கக் தூதுவருக்குக் கிடைக்கப் பெற்றுள்ளன.
பேரழிவைத் தடுக்கும் நோக்கில் சிறிலங்கா அரசாங்கத்தின் உயர்மட்ட அதிகாரிகளுக்கு பிளேக் தொலைபேசி அழைப்புகளை மேற்கொண்டார். காயப்பட்டவர்கள் மற்றும் இறந்தவர்களை வெளியில் எடுத்துவருவதற்கான அனுமதியை அனைத்துலக செஞ்சிலுவைச் சங்கத்திற்கு வழங்க முடியாது என அரச தலைவரின் ஆலோசகரும் அவரது சகோதரருமான பசில் ராஜபக்ச பிளேக்கிடம் தெரிவித்துள்ளார்.
அனைத்துலக செஞ்சிலுவைச் சங்கத்திடம் சரணடைவதற்கு தயாராகவுள்ளதாக விடுதலைப் புலிகளின் தலைமை நோர்வேக்கு கூறியிருந்ததாகவும், சரணடைவை மேற்கொள்ள செஞ்சிலுவைச் சங்க உலங்குவானூர்தியை அனுப்புமாறும், பாதுகாப்புச் செயலர் கோத்தபாய ராஜபக்சவிடம் பிளேக் கேட்ட போது, 'இப்பொழுது நாங்கள் அந்தக் கட்டத்தைக் கடந்துவிட்டோம்' என கோத்தபாய பதிலளித்துள்ளார்.
பேரழிவைத் தடுப்பது தொடர்பாக கொழும்பிலிருந்த இராஜதந்திரிகள் கொண்டிருந்த கருத்தினையே உலகெங்கும் பலரும் கொண்டிருந்தனர். நோர்வே வெளியுறவு அமைச்சகத்தின் தலைவர் Jan Egeland அக்கருத்தினைக் கொண்டிருந்தவர்களில் ஒருவராவர்.
'இது ஏலவே எச்சரிக்கப்பட்ட, அதேவேளை அனைவரும் தடுத்துநிறுத்தத் தவறிய பேரழிவின் வரலாறு. இது அனைத்துலக சமூகத்திற்கு சாதகமான ஒரு வரலாறு அல்ல' என்கிறார் அவர்.
2009 இன் ஆரம்பத்திலிருந்து போர் முடிவுக்கு வந்த மே 18 வரையான காலப்பகுதிகளிலும் அதன் பின்னர் நடந்தேறிய முக்கிய சம்பவங்களை, வீக்கிலீக்ஸில் இருந்து ஆப்தன்போஸ்தன் கால வரிசையில் தொகுத்து வெளியிட்டுள்ளது. அவை வருமாறு:
5. பெப் 2009: தமிழீழ விடுதலைப் புலிகளுடன் தொடர்பு ஏற்படுத்துவது கடினமாகி வருவதாக சிறிலங்காவிற்கான நோர்வே தூதுவர் Tore Hattrem அமெரிக்க இராஜதந்திரிகளுக்கு தெரிவிக்கின்றார்.
5. மார்ச் 2009: விடுதலைப் புலிகள் தாம் முறியடிக்கப்பட்டுவிட்டதை ஏற்றுக் கொள்ளும் அதேவேளை சரணடைவினை ஒரு தெரிவாக ஏற்றுக் கொள்ளத் தயாரில்லை. பொதுமக்கள் தங்கியுள்ள இடங்களை நோக்கி சிறிலங்காப் படைகள் ஆட்லறித் தாக்குதல்களை மேற்கொள்வதை பசில் ராஜபக்ச ஒப்புக் கொள்கிறார் போன்ற தகவல்களை Tore Hattrem அமெரிக்கா அதிகாரிகளுக்குத் தெரிவிக்கின்றார்.
19 மார்ச் 2009: அரசாங்கம் பல்லாயிரக்கணக்கான பொது மக்களைப் பலியாக்க முனைவதாகவும், அவ்வாறு நிகழுமானால் அனைத்துலக கண்டனங்களுக்கும் போர் மீறல் குற்றச்சாட்டுகளுக்கும் அது இட்டுச் செல்லுமென அமெரிக்கத் தூதுவர் றொபேட் பிளேக் சிறிலங்கா வெளியுறவு அமைச்சர் போகொல்லாகமவை எச்சரிக்கின்றார்.
27. ஏப்ரல் 2009: சிறிலங்காவின் வெளியுறவு அமைச்சர் போகொல்லாகம இணைத்தலைமை நாடுகளான அமெரிக்கா, ஐரோப்பிய ஒன்றியம், ஜப்பான் ஆகிய நாடுகளைச் சந்திப்பதற்கான அழைப்பினை விடுக்கிறார். இணைத்தலைமை நாடுகளில் அங்கம் வகிக்கும் நோர்வே அழைக்கப்படவில்லை. இணைத்தலைமை நாடுகளில் ஒன்றாக இனி நோர்வே பார்க்கப்பட மாட்டாது என போகொல்லாகம தெரிவித்தார். ஏனைய 3 நாடுகளின் கடும் எதிர்ப்பிற்குப் பின்னர் தனது நிலைப்பாட்டை மாற்றுவதாக அவர் கூறினார்.
5 மே.2009: செய்மதி மூலம் பெறப்பட்ட ஒளிப்படங்கள் மகிந்த ராஜபக்சவிற்கு அமெரிக்காவினால் காட்டப்படுகின்றது. பொதுமக்கள் தங்கியிருந்த 'பாதுகாப்பு வலயங்களுக்குள்' ஆட்லறித் தாக்குதல்கள் நடாத்தப்பட்ட தடயங்கள் ஒளிப்படங்களில் காண்பிக்கப்படுகின்றது. போர்க்கள நிலைமைகள் தொடர்பாக தன்னைவிட அமெரிக்காவிற்கு அதிக தகவல்கள் தெரிந்திருப்பதாக மகிந்த ராஜபக்ச ஒப்புக் கொள்கின்றார். அவரது ஜெனரல்களால் மேற்கொள்ளப்படும் படை நடவடிக்கைகள் தொடர்பாக ராஜபக்சவிற்கு எந்த அளவிற்குத் தெரியுமென அமெரிக்க இராஜதந்திரிகள் மத்தியில் கேள்வி எழுகின்றது.
7 மே.2009: தனது நேரத்தின் 60 விழுக்காட்டினை சிறிலங்கா விவகாரங்களுக்குச் செலவிடுவதாக பிரித்தானிய வெளியுறவு அமைச்சர் டேவிட் மிலிபான்ட் தெரிவிக்கிறார்.
13 மே.2009: சிறிலங்கா அரசாங்கத்தை 'பொய்யர்கள்' எனக் கூறிய மிலிபான்ட், தமிழ் பொது மக்களுக்கு எதிரான தாக்குதல்களுக்கு எதிராக அனைத்துலக சமூகம் குரலெழுப்ப வேண்டும் என்கிறார்.
13 மே.2009: சிறிலங்கா விவகாரத்தில் உரிய நடவடிக்கைகளை ஐ.நா பாதுகாப்பு அவை மேற்கொள்ளாதுவிடின் அது ஒரு 'வரலாற்றுத் தவறு' என மனித உரிமைகள் கண்காணிப்பகம் வலியுறுத்துகின்றது. பாதுகாப்பு அவையின் ஒரு அமர்வில், அமெரிக்கா, பிரித்தானியா மற்றும் பிரான்ஸ் ஆகியன தீர்மானம் நிறைவேற்ற முயன்றபோது, சீனா மற்றும் ரஸ்யா எதிர்க்கின்றது.
15 மே.2009: போர்ப் பகுதியில் படைத்துறைத் தலைமை மேற்கொள்ளும் நடவடிக்கைகள் தொடர்பாக மகிந்த ராஜபக்ச, பசில் ராஜபக்ச மற்றும் கோத்தபாய ராஜபக்ச ஆகியோருக்கு சரியான முறையில் அறிவிக்கப்படுகின்றதா என்பது தொடர்பாக இந்திய வெளியுறவு ஆலோசகர் சிவ்சங்கர் மேனன் சந்தேகம் கொள்கிறார்.
17 மே.2009: போர் வலையத்திற்குள் பொதுமக்கள் எவருமே இல்லை என 2009 மே மாதம் சிறிலங்காவின் பாதுகாப்பு அமைச்சகம் அறிவித்தது. அந்தக் கூற்று உண்மையல்ல என்பதையும் பல ஆயிரம் பொதுமக்கள் உயிராபத்திற்குள் சிக்கியிருப்பதையும் எடுத்துரைக்கும் பல்வேறு அறிக்கைகள் அமெரிக்கக் தூதுவருக்குக் கிடைக்கப்பெற்றுள்ளன.
பேரழிவைத் தடுக்கும் நோக்கில் சிறிலங்கா அரசாங்கத்தின் உயர்மட்ட அதிகாரிகளுக்கு பிளேக் தொலைபேசி அழைப்புகளை மேற்கொண்டார். காயப்பட்டவர்கள் மற்றும் இறந்தவர்களை வெளியில் எடுத்துவருவதற்கான அனுமதி அனைத்துலக செஞ்சிலுவைச் சங்கத்திற்கு வழங்க முடியாது என அரச தலைவரின் ஆலோசகரும் அவரது சகோதரருமான பசில் ராஜபக்ச பிளேக்கிடம் தெரிவித்துள்ளார்.
அனைத்துலக செஞ்சிலுவைச் சங்கத்திடம் சரணடைவதற்கு தயாராகவுள்ளதாக விடுதலைப் புலிகளின் தலைமை நோர்வேக்கு கூறியிருப்பதாகவும் சரணடைவை மேற்கொள்ள செஞ்சிலுவைச் சங்க உலங்குவானூர்தியை அனுப்புமாறும், பாதுகாப்புச் செயலர் கோத்தபாய ராஜபக்கவிடம் பிளேக் கேட்ட போது, 'நாங்கள் அந்தக் கட்டத்தைக் கடந்துவிட்டோம்' என கோத்தபாய பதிலளித்துள்ளார்.
26 மே.2009: றொபேட் பிளேக் சிறிலங்காவிலிருந்து விடைபெறுகிறார். 'சமாதானத்தை வெல்லுமாறு' தனது இறுதி வேண்டுதலில் அரசாங்கத்திற்கு வலியுறுத்துகின்றார். தமிழீழ விடுதலைப் புலிகளின் அரசியல் தலைவர்கள் சரணடையச் சென்றபோது, சரணடைவை உறுதிப்படுத்த எதையுமே செய்யவில்லை என வெளியுறவு அரசியல் ஆலோசகர் பாலித கோகன்ன முன்னர் தெரிவித்தார். ஆனால் பிறிதொரு சந்தர்ப்பத்தில் அதற்கு முரணாக கோகன்ன கூறியமையை பிளேக் கவனத்தில் எடுத்துள்ளார்.
27 மே.2009: ஐக்கிய நாடுகள் அவையின் செயலாளர் நாயகம் பான் கீ மூன் சிறிலங்காவிற்கு பயணம் மேற்கொள்கின்றார். இடம்பெயர்ந்த மக்கள் தங்க வைக்கப்பட்டிருந்த முகாம்களின் நிலைமைகள் மிக மோசமாக உள்ளதாக அவர் கூறுகின்றார்.
01 ஜுன்.2009: அடுத்த 5 ஆண்டுகளில் படைத்துறை ஆளணிகளை இரட்டிப்பாக்கும் திட்டத்தினை அரசாங்கம் கொண்டிருப்பதாக பாதுகாப்பு அமைச்சகத்தின் இரகசிய ஆவணத்திலிருந்து தெரிய வருகின்றது.
15 ஜுலை.2009: அனைத்துலக மனிதாபிமானச் சட்டங்களை சிறிலங்கா அரச படைகள் கடுமையாக மீறியதாக அனைத்துலக செஞ்சிலுவைச் சங்கம் தெரிவித்தது. பொது மக்களுடன் கலந்திருந்தாக விடுதலைப் புலிகள் கண்டிக்கப்படுகின்றனர். ஆனால் புலிகள் பொது மக்களை மனிதக் கேடயங்களாகப் பயன்படுத்தினரா என்பது தொடர்பாக முடிவெடுப்பது கடினமென செஞ்சிலுவைச் சங்கம் தெரிவித்தது. செஞ்சிலுவைச் சங்கம் உட்பட்ட ஏனைய தொண்டு நிறுவனங்களை காயப்பட்டவர்களுக்கு மருந்து வழங்கும் மற்றும் குருதி செலுத்தும் பணிகளை முன்னெடுக்கவிடாது அரசாங்கம் தடுத்துள்ளது. எனவே இறந்த சிறுவர்களின் தொகையைக் கணக்கிடுவதைத் தாம் கைவிட்டதாக செஞ்சிலுவைச் சங்கத்தின் தெற்காசியத் தலைவர் கூறுகின்றார்.
31 ஓகஸ்ட்.2009: அமெரிக்க வெளியுறவு அமைச்சகத்தைச் சேர்ந்த போர்க்குற்றங்களுக்கான பொறுப்பதிகாரி Clint Williamson இற்கும் நோர்வேக்கும் இடையில் ஒஸ்லோவில் சந்திப்பு நிகழ்கின்றது. போர்ப் பகுதியில் அமெரிக்காவின் பிரசன்னம் இல்லாதிருந்தமையால், போர் மீறல்கள் தொடர்பான தடயங்கள் - சாட்சியங்களைப் பெறுவதில் சிக்கல்கள் இருப்பதாகவும் கூறிய Clint Williamson, இறுதி நாளில் நடந்தவை தொடர்பான தகவல்களை நோர்வேயிடம் கேட்டிருந்தார். விடுதலைப் புலிகளின் அரசியல் தலைமை மீதான கொலைகள் 'சந்தேகத்திற்கிடமானவை' என நோர்வே இராஜதந்திரிகள் தெரிவித்துள்ளனர்.
18 செப்.2009: அமெரிக்காவின் நிலைப்பாடு தொடர்பாகத் தான் குழப்பமடைந்துள்ளதாக மகிந்த ராஜபக்ச விசனம் கொள்கிறார். பயங்கரவாதத்தை ஒழிக்குமாறு முதலில் கூறிய அமெரிக்கா, தான் அதைச் செய்து முடித்துள்ளபோது விமர்சிப்பதாகவும் அமெரிக்க இராஜதந்திரிகளிடம் ராஜபக்ச கூறுகிறார்.
26 ஒக்.2009: போர் மீறல்கள் தொடர்பான அமெரிக்க செனற் அவையின் அறிக்கையினைப் பெறுவதற்கு சிறிலங்கா அரசாங்கத்தின் எந்தவொரு பிரதிநிதியும் முன்வரவில்லை.
17 டிச.2009: மகிந்த ராஜபக்ச நாட்டை தவறான பாதையில் இட்டுச் சென்றுவிட்டதாக சிறிலங்காவின் முன்னாள் அரச தலைவர் சந்திரிகா குமாரதுங்க குற்றம் சாட்டுகின்றார். ராஜபக்ச குடும்பத்தினை 'படிப்பறிவற்ற – பண்பாடற்ற பாதகர்கள் - uneducated and uncultured rascals’ என வர்ணிக்கிறார். நாட்டின் அரசியல் காலநிலை 'பழிவாங்கல், அச்சுறுத்தல்' நிலைக்குள் தள்ளப்பட்டுள்ளதாகவும் எவருமே அரசாங்கத்தை விமர்சிக்கும் நிலையில் இல்லை எனவும் கவலை தெரிவிக்கிறார்.
2.பெப் 2010: சரணடைய முனைந்த போது விடுதலைப் புலிகளின் அரசியல் தலைவர்கள் படுகொலை செய்யப்பட்டதான குற்றச்சாட்டு பொய்யானது என பாதுகாப்புச் செயலர் கோத்தபாய ராஜபக்ச தெரிவிக்கிறார்.
இந்த விபரங்களை விக்கி லீக்ஸ் ஆவணங்களை மேற்கோள் காட்டி நோர்வே நாளிதழ் ஆப்தன்போஸ்தன் தனது கட்டுரையில் வெளியிட்டுள்ளது.
எனினும் ஆப்தன்போஸ்தன் வெளியிட்டுள்ள கட்டுரையில் கூறப்பட்டுள்ள விடயங்களின் உண்மைத்தன்மை குறித்து சுயாதீனமான தகவல்கள் எதனையும் கட்டுரை வெளியிடவில்லை. இக்கட்டுரையில் கூறப்பட்டுள்ள விடயங்களில் சில போர்க்குற்றங்களிலிருந்து மகிந்தவைக் காப்பாற்றும் தன்மை கொண்டவை என அவதானிகள் சந்தேகம் தெரிவித்துள்ளனர்

http://www.ponguthamil.com/news/

கருத்துகள் இல்லை: