வியாழன், 30 ஜூன், 2011

மகிந்த ராஜபக்சவின் ரஷ்யாவிற்கான கேளிக்கைப் பயணம்

இந்த மாநாட்டின்போது அரச தலைவர்கள் பலரை அதிபர் மகிந்த ராஜபக்ச சந்தித்ததாக சிறிலங்காவிலுள்ள ஊடகங்கள் செய்திகளை வெளியிட்டிருந்த போதிலும், வெறுமனே நான்கு நாடுகளின் அரச தலைவர்கள் மாத்திரமே இந்த மாநாட்டில் கலந்து கொண்டனர்.

இவ்வாறு Lanka-e-News தனது புலனாய்வுச் செய்தியில் தெரிவித்துள்ளது. அதனை 'புதினப்பலகை'க்காக [www.puthinappalakai.com] மொழியாக்கம் செய்தவர் தி.வண்ணமதி.

ரஷ்யாவின் சென் பீற்றர்ஸ்பேர்க் நகரில் யூன் 18ல் இடம்பெற்ற உலக வர்த்தக மாநாட்டிற்கான அதிபர் ராஜபக்சவின் பயணம் எந்தவித நோக்கமுமில்லாதது என மொஸ்கோவிலிருந்து வரும் தகவல்கள் தெரிவிக்கின்றன.

அரச ஊடகங்கள் இந்த பயணம் தொடர்பாக அளவுக்கு அதிகமாக ஊதிப் பரப்புரை செய்தபோதும் இந்தப் பயணம் தோல்வியிலேயே முடிவடைந்தது.

இந்த மாநாட்டின் முதலாவது நகைச்சுவையான விடயம் என்னவெனில், 3000 அமெரிக்க டொலர்களை செலுத்திய பின்னரே ஒருவர் இதில் கலந்து கொள்ள முடியும்.

3000 அமெரிக்க டொலர்கள் செலுத்தி அழைப்பிதழைப் பெற்றுக் கொண்டே சிறிலங்கா அதிபரும் இந்த மாநாட்டில் கலந்துகொண்டார்.

அதிபருடன் சென்ற 81 பேரில் 9 பேர் மட்டும் அவருடன் மாநாட்டில் கலந்துகொள்வதற்காக 27,000 டொலர்களை [30 இலட்சம் இலங்கை ரூபா] செலுத்தியிருந்தனர்.

இத்தகைய செலவினங்கள் மற்றும் ஊடகங்களின் பரப்புரை ஒருபுறமிருக்க அதிபர் முதலாவது மற்றும் இறுதி நாள்கள் மட்டுமே இந்த மாநாட்டிலும் அவர் கலந்து கொண்டுள்ளார்.

இரண்டாவதாக கவனத்தை ஈர்க்கும் அம்சம் இந்தக் காலப்பகுதியில் ரஷ்யாவிலுள்ள விருந்தினர் விடுதிகளில் தங்குமிடச் செலவுகள் மூன்று மடங்காக உள்ளன.

ஆதலினால் ரஷ்யப் பயணம் தொடர்பான விபரங்கள், ஏற்பட்ட செலவுகள் மற்றும் இந்தக் கேளிக்கைப் பயணத்தினால் நாட்டிற்கு கிடைக்கப் பெற்ற நலன்கள் என்ன என்ற அனைத்து விபரங்களையும் நாடாளுமன்றில் பகிர்ந்து கொள்ள வேண்டிய பொறுப்பு நாட்டினது அரச தலைவருக்கு உள்ளது.

ரஷ்ய அதிபரின் அழைப்பினை ஏற்றுத் தான் அதிபர் மகிந்த ராஜபக்ச ரஷ்யாவிற்கான இந்தப் பயணத்தினை மேற்கொண்டார் என்ற அதிபர் செயலகத்தின் ஊடாக அறிக்கை அப்பட்டமான பொய்.

சாதாரண ஒரு வர்த்தகரைப் போல தானும் இந்த மாநாட்டுக்கான நுழைவுச்சீட்டினை விலைகொடுத்து வாங்கியே மகிந்த ராஜபக்ச அங்கு சென்றிருந்தாரே தவிர அவருக்கு எந்தவொரு அழைப்பும் ரஷ்ய அரசாங்கத்திடமிருந்து கிடைக்கவில்லை.

அதிபர் மகிந்த ராஜபக்சவிற்கு உத்தியோகபூர்வ அழைப்பு விடுக்கப்பட்டதைப் போல அனைத்து நடவடிக்கைகளையும் ஒழுங்குசெய்யுமாறும், இது ஒரு உத்தியோகபூர்வப் பயணம் என்ற தோற்றப்பாட்டினை ஏற்படுத்துமாறும் மகிந்தவின் உறவினரான ரஷ்யாவிற்கான சிறிலங்காவினது தூதுவருக்கு அறிவுறுத்தப்பட்டிருந்தது.

இதன் விளைவாகவே உத்தியோகபூர்வ அரசுமுறைப் பயணத்தின் போது அரச தலைவர் ஒருவரை வரவேற்கும் தகுதிபெற்ற ரஷ்யாவின் அரச தலைவர்கள் எவரும் மகிந்த ராஜபக்சவினை வரவேற்பதற்காக விமான நிலையத்திற்கு வரவில்லை. சென்பீற்றஸ்பேக் நகரத்தின் பிரதி மேயர் தான் அதிபர் ராஜபக்சவினை வரவேற்றிருந்தார்.

சென் பீற்றஸ்பேக் நகரத்தில் இடம்பெற்ற இந்த மாநாடானது வர்த்தக சமூகத்தினரின் சார்பில் ஒழுங்கு செய்யப்பட்டிருந்ததே தவிர இது அரச தலைவர்களுக்கான மாநாடன்று.

ஒரு நாட்டினது அதிபர் கலந்து கொள்ளும் அளவிற்கு இந்த மாநாட்டில் எதுவும் இருக்கவில்லை. சிறிலங்காவிலிருந்து இந்த மாநாட்டில் கலந்து கொள்ளவதற்கு யாரையும் அனுப்பியிருக்க வேண்டுமெனில் அது நாட்டினது வர்த்த சமூகத்தினராகத்தான் இருந்திருக்க வேண்டும்.

சுருங்கக் கூறின், இந்த மாநாடு எவ்வகையிலும் அதி முக்கியத்துவம் வாய்ந்த ஐரோப்பிய பொருளாதார மாநாடு ஆகாது.

இந்த மாநாட்டின்போது அரச தலைவர்கள் பலரை அதிபர் மகிந்த ராஜபக்ச சந்தித்ததாக சிறிலங்காவிலுள்ள ஊடகங்கள் செய்திகளை வெளியிட்டிருந்த போதிலும், வெறுமனே நான்கு நாடுகளின் அரச தலைவர்கள் மாத்திரமே இந்த மாநாட்டில் கலந்து கொண்டனர்.

சீனா, ஸ்பெயின், பின்லாந்து மற்றும் பெல்ஜியம் ஆகிய நாடுகளைச் சேர்ந்தவர்கள் இவர்கள். பெல்ஜியத்திலிருந்து அரச விவகாரங்களுக்கான அமைச்சர் இந்த மாநாட்டில் கலந்து கொண்டார்.

ரஷ்யா மற்றும் சீனா ஆகிய நாடுகளின் அரச தலைவர்களைச் சந்திப்பதற்கும் அதிபர் ராஜபக்ச நேரமொதுக்கித் தருமாறு கோரியிருந்தார். ஆனால் மிகவும் குறுகிய நேரம் மாத்திரமே இவர்களைச் சந்திப்பதற்கு மகிந்தவிற்கு நேரம் ஒதுக்கிக் கொடுக்கப்பட்டதாம்.

போரின் போது உயிர்நீத்த படையினரினரைப் பற்றியே அதிபர் மகிந்த ராஜபக்ச இந்தச் சந்திப்பின்போது பேசினாராம். ஆனால் ரஷ்யா மற்றும் சீனாவின் அரச தலைவர்கள் இதற்குப் பதிலாக எதனையும் கூறுவில்லை.

ஐ.நாவின் தருஸ்மனின் தலைமையிலான அறிக்கையினைப் பற்றியோ அன்றில் சனல் -4 ஆவணப்படம் தொடர்பாகவே இங்கு எதுவும் பேசப்படவில்லை.

"உங்களுடன் எவரும் இல்லாவிட்டாலும் நாங்கள் உங்களுக்குத் துணையாக இருக்கிறோம்" என ரஷ்யா மற்றும் சீனா ஆகிய நாடுகளைச் சேர்ந்த அரச தலைவர்கள் மகிந்தவிடம் உறுதியளித்தினராம் என சிறிலங்காவினது அரச ஊடகங்கள் செய்திவெளியிட்டிருந்தன.

ஆனால் இது வெறும் பொய். இந்த இரண்டு அரச தலைவர்களில் எவரும் இத்தகைய எதனையும் மகிந்தவிடம் கூறவில்லை.

அரச தலைவர்களுக்கிடையிலான இந்தச் சந்திப்பில் பேசப்பட்ட விடயங்களென அதிபரின் ஊடகங்கள் விடுத்த செய்தியினை வீடியோப் படம் மூலமாகவோ அல்லது வேறு வழிவகைகள் ஊடாகவோ உறுதிப்படுத்துமாறு நாங்கள் சவால் விடுகிறோம்.

இல்லையேல் இரு நாட்டு அரசதலைவர்களுக்கு இடையில் இடம்பெற்ற இந்தச் சந்திப்பில் கலந்துரையாடலின் அடிப்படையில் ஏதோவொரு உடன்பாட்டுக்கு இவர்கள் வந்திருக்கவேண்டும்.

தங்களது இந்த வாதத்தினை உண்மையென நிரூபிக்கும் வகையில் இத்தகைய ஆவணங்கள் ஏதேனும் இருக்குமெனில் அவற்றை வெளிப்படுத்துமாறு நாங்கள் வெளிவிவகார அமைச்சுக்கும் சவால் விடுக்கிறோம்.

சரி அது அவ்வாறே இருக்கட்டும். அதிபர் ராஜபக்ச தனது பரிவாரங்களுடன் மேற்கொண்ட இந்தக் கேளிக்கைப் பயணத்தினால் சிறிலங்காவிற்குக் கிடைத்த பொருளாதார ரீதியிலான அல்லது வேறு வகையிலான நன்மைகள்தான் என்ன?

http://www.puthinappalakai.com/view.php?20110630104173

பான் கீ மூன் மீளவும் தேர்ந்தெடுக்கப்பட்டமைக்கான காரணம் என்ன?

பெரும்பாலும் பன் கீ மூனின் கருத்துக்கள் அமெரிக்கர்களுடைய கருத்துக்களுடன் ஒத்துப் போகிறதெனில், சிறிலங்காவில் இடம்பெற்றதாகக் கூறப்படும் போர்க் குற்ற விடயத்தில் அமெரிக்காவின் கருத்து பான் கீ மூனது கருத்தினை விட வேறுபட்டதாக இருக்க முடியாது.

இவ்வாறு கொழும்பை தளமாகக் கொண்ட Daily Mirror 29 JUNE 2011 இதழில் எழுதப்பட்டுள்ள கட்டுரையில் தெரிவிக்கப்பட்டுள்ளது. அதனை 'புதினப்பலகை'க்காக [www.puthinappalakai.com] மொழியாக்கம் செய்தவர் தி.வண்ணமதி.

சிறிலங்காவில் இடம்பெற்றதாகக் கூறப்படும் போர்க்குற்றங்களை விசாரிப்பதற்காக பான் கீ மூன் வல்லுநர்கள் குழு என்ற ஒன்றை அமைத்திருந்தமையினைக் கருத்திற்கொண்டு, அவர் மீண்டும் ஐ.நாவின் செயலாளர் நாயகமாகத் தேர்ந்தெடுக்கப்பட்டிருப்பதற்குச் சிறிலங்கா அரசாங்கம் தனது எதிர்ப்பினைத் தெரிவித்திருக்கிறது.

பான் கீ மூன் அமைத்திருந்த வல்லுநர்கள் குழுவின் அறிக்கை கடந்த ஏப்ரலில் வெளிவந்த நிலையில், பான் கீ மூன் செயலாளர் நாயகமாக மீண்டும் தேர்ந்தெடுக்கப்படுவதற்கு சிறிலங்கா அரசாங்கம் தனது ஆதரவினை வழங்கக்கூடாது என குறிப்பிட்ட சில உள்ளூர் ஊடகங்கள் கூட செய்திகளை வெளியிட்டிருந்தனர்.

மே முதலாம் நாளன்று கொழும்பு நகர வீதிகளில் திரண்ட அரசாங்கத்தின் ஆதரவாளர்கள் பான் கீ மூன் மீண்டும் செயலாளர் நாயகமாகத் தேர்ந்தெடுக்கக்கூடாது எனக் கோரியதுடன் இதற்கான ஆதரவினை ஏனைய நாட்டு நாடுகளிடமிருந்தும் பெற்றுக்கொள்ளவேண்டும் என்றும் கோரினர்.

இருப்பினும் பான் கீ மூனை மீண்டும் செயலாளர் நாயகமாக்கும் பிரேரணை ஐ.நாவின் ஆசிய நாடுகளுக்கான குழுவிடம் முன்வைக்கப்பட்டபோது இதற்குச் சிறிலங்கா எந்தவிதமான எதிர்ப்பினையும் காட்டவில்லை. இந்த நியமனத்திற்கு இணங்கியிருந்தது.

எவ்வாறிருப்பினும் பான் கீ மூன் மீண்டும் செயலாளர் நாயகமாகத் தேர்ந்தெடுக்கப்படுவதை கியூபா மற்றும் இலத்தீன் அமெரிக்க நாடுகள் எதிர்த்தன. இந்த நாடுகளைப் போலவே பன் கீ மூனை மீளவும் நியமிக்கும் தீர்மானத்திற்கு சிறிலங்காவும் தனது எதிர்ப்பினை வெளியிட்டிருக்கமுடியும். ஆனால் சிறிலங்காவோ ஏனைய நாடுகளுடன் இணைந்து இந்தத் தீர்மானத்திற்கு ஆதரவளித்திருந்தது.

ஐ.நாவின் ஆசியக்குழுவில் தனக்கு காத்திரமான குரல் ஏதும் இல்லை என்பதால் சிறிலங்கா இந்த முடிவினை எடுத்ததா அல்லது பான் கீ மூனுக்கு உதவிசெய்வதன் ஊடாக அவரது தயவினைப் பெறுவதற்கு அது முனைந்ததா என்பது சரியாகத் தெரியவில்லை.

கியூபாவினதும் இலத்தீன் அமெரிக்க நாடுகளினதும் எதிர்ப்புகள் பான் கீ மூன் ஐ.நாவின் செயலாளர் நாயகமாக மீண்டும் தேர்ந்தெடுக்கப்படுவதை எதுவும் செய்துவிடவில்லை.

ஆசியக் குழுவின் முன் இந்தப் பிரேரனை முன்வைக்கப்பட்டபோது சிறிலங்கா இதற்கு எதிர்ப்புத் தெரிவித்திருக்குமெனில் அது பான் கீ மூனின் பெயருக்குச் சிறு களங்கத்தினையாவது ஏற்படுத்தியிருக்கக்கூடும்.

ஆனால் பான் கீ மூன் மீண்டும் தேர்ந்தெடுக்கப்படும் தீர்மானத்தினை ஆமோதித்த சிறிலங்கா தொடர்ந்தும் மௌனமாக இருந்தது.

கூடவே பான் கீ மூன் இரண்டாவது தடவையாகவும் செயலாளர் நாயகமாகத் தேர்ந்தெடுக்கப்படுவதற்கு சிறிலங்கா ஆதரவளிக்கக்கூடாது என்ற தொனிப்பட எழுதிவந்த நாட்டினது ஊடகங்கள் கூட எந்தவிதமான கருத்தினையும் வெளியிடவில்லை.

பான் கீ மூனால் நியமிக்கப்பட்ட வல்லுநர்கள் குழுவினது சிறிலங்காவில் இடம்பெற்றதாகக் கூறப்படும் போர்க் குற்றங்கள் தொடர்பான அறிக்கை வெளிவந்த வேளையில், தான் மீண்டும் பதவியில் தொடருவதற்காக அனைத்துலக நாடுகளின் ஆதரவினைப் பெறும் முனைப்புக்களில் பான் கீ மூன் ஈடுபட்டிருந்தார் என்பது தெளிவு.

குறித்த இந்த அறிக்கை வெளிவந்த கையோடு பான் ரஷ்யாவிற்குப் பயணித்திருந்தார். கொசோவோ மோதலின்போது பான் கீ மூனின் உத்தரவுகள் மற்றும் செயற்பாடுகளை நிராகரித்த ரஷ்யா, அவர் மீண்டும் செயலாளர் நாயகமாகத் தேர்ந்தெடுக்கப்படுவதற்காக பிரேரணை முன்வைக்கப்படும்போது பாதுகாப்புச்சபையில் தனக்கிருக்கும் வீற்றோ அதிகாரத்தினைப் பயன்படுத்தப்போவதாக அது எச்சரித்திருந்தமை இங்கு குறிப்பிடத்தக்கது.

ஆனால் தனது ரஷ்யப் பயணத்தின்போது தனக்கான ரஷ்யாவின் ஆதரவினை பான் கீ மூன் மீளவும் உறுதிப்படுத்திக்கொண்டார்.

மறுபுறத்தில் ஐ.நாவின் செயலாளர் நாயகமாக பான் கீ மூன் இரண்டாவது முறையாகவும் தேர்ந்தெடுக்கப்படுவதற்குச் சீனா ஆரம்பம் முதலே தனது ஆதரவினை வெளிப்படுத்திவந்தது.

"சீனாவினை மகிழ்வுடன் வைத்திருக்கும் அதேநேரம் ரஷ்யாவினை சாந்தப்படுத்துவதற்கு பான் கீ மூனால் முடிந்திருக்கிறது" என றொய்ட்டஸ் செய்திச்சேவையிம் இராசதந்திரி ஒருவர் கருத்துத் தெரிவித்திருந்தார்.

ஆனால் பான் கீ மூன் மீண்டும் நியமிக்கப்படுவதற்கு அமெரிக்காவின் ஆதரவுதான் காரணம் என இந்தச் செய்திச்சேவை தனது செய்திக் குறிப்பில் குறிப்பிட்டிருந்தது.

குறித்த இந்தச் செய்திக் குறிப்பில் றொய்ட்டர் கீழ்க்கண்டவாறு கூறுகிறது. "மேற்கு நாடுகளினதும் ஐக்கிய அமெரிக்காவினதும் தீவிர நண்பன் என்ற பெயரினை தென் கொரியாவினைச் சேர்ந்த ஐ.நாவின் செயலாளர் நாயகம் பெற்றிருக்கிறார். அதேநேரம் வெள்ளை மாளிகையினதும் அமெரிக்க இராசாங்கத் திணைக்களத்தினதும் நிலைப்பாட்டினை எதிரொலிக்கும் ஒருவர்தான் தென்கொரியாவின் முன்னாள் வெளிவிவகார அமைச்சரான பான் கீ மூன் என்றும் வோசிங்டனுடன் கூட்டிணைந்தே இவர் செயற்படுகிறார் என்றும் சில இராசதந்திரிகள் குற்றம் சுமத்துகிறார்கள்."

"ஐ.நா செயலாளர் நாயகம் வோசிங்டனுடன் கூட்டிணைந்தே செயற்படுகிறார் என்ற கூற்றினை முற்றாக மறுக்கும் ஐ.நா அலுவலர்கள் பான் கீ மூனின் கருத்துக்கள் அமெரிக்கர்களின் கருத்துக்களுடன் பெரும்பாலும் ஒத்துப்போவதை அவர்கள் ஏற்றுக்கொண்டனர்" என பிறிதொரு அனைத்துலகச் செய்தி நிறுவனம் செய்தி வெளியிட்டிருந்தது.

இந்தப் புறநிலையில் சிறிலங்கா அரசாங்கமானது மிகுந்த அவதானத்துடன் செயற்படவேண்டிய தருணமிது. பெரும்பாலும் பன் கீ மூனின் கருத்துக்கள் அமெரிக்கர்களுடைய கருத்துக்களுடன் ஒத்துப் போகிறதெனில், சிறிலங்காவில் இடம்பெற்றதாகக் கூறப்படும் போர்க் குற்ற விடயத்தில் அமெரிக்காவின் கருத்து பான் கீ மூனது கருத்தினை விட வேறுபட்டதாக இருக்க முடியாது.

வல்லுநர் குழுவின் அறிக்கை தொடர்பில் கருத்துரைத்த செயலாளர் நாயகம் குறித்த பரிந்துரைகளை நிறைவேற்றும் அதிகாரம் தனக்கில்லை எனக் குறிப்பிட்டிருந்தார்.

இரண்டாவது தடவையாகவும் பதவியில் தொடருவதற்கு அனைத்துலக நாடுகளின் ஆதரவினை அவர் கோரிநின்ற வேளையிலேயே பான் கீ மூனின் இந்தக் கருத்து வெளிவந்திருந்தது.

இதன் போது அவர் மிகுந்த அவதானத்துடன் செயற்பட்டிருந்தார். ஆனால் தற்போது அவர் இரண்டாவது தடவையாகவும் தேர்ந்தெடுக்கப்பட்ட நிலையில் தனது இருப்பினை உறுதிப்படுத்தியதொரு நிலையில் இருக்கிறார். இந்த நிலையில் வரும் நாட்களில் பான் கீ மூன் எடுக்கப்போகும் தீர்மானங்கள் தொடர்பில் தற்போது எதிர்வுகூறமுடியாது.

http://www.puthinappalakai.com/view.php?20110630104178

இந்திய – சிறிலங்கா இராணுவ அதிகாரிகள் புதுடெல்லியில் சந்திப்பு - 3 நாட்கள் பேச்சுக்கள் தொடரும்

இந்திய- சிறிலங்கா இராணுவ அதிகாரிகள் மட்டத்திலான மூன்று நாள் கலந்துரையாடல் புதுடெல்லியில் நேற்று ஆரம்பமாகியுள்ளது.

இருநாட்டு இராணுவங்களுக்கும் இடையிலான உறவுகளைப் பலப்படுத்திக் கொள்வதற்கான திட்டத்தின் ஒரு கட்டமாகவே இந்தச் சந்திப்பு நடைபெறுகிறது.

சிறிலங்கா இராணுவத் தளபதியின் செயலர் மேஜர் ஜெனரல் எச்.சி.பி குணதிலக தலைமையிலான ஐந்து உயர்மட்ட அதிகாரிகள் கொண்ட குழு இந்தக் கலந்துரையாடலில் பங்கேற்க புதுடெல்லி சென்றுள்ளது.

இந்தியத்தரப்புக் குழுவுக்கு இநதிய இராணுவத்தின் அனைத்துலக ஒத்துழைப்புக்கான மேலதிக பணிப்பாளர் மேஜர் ஜெனரல் ஐ.பி.சிங் தலைமை தாங்குகிறார்.

நேற்று ஆரம்பமான இந்தக் கலந்துரையாடல் நாளை வெள்ளிக்கிழமை வரை தொடர்ந்து இடம்பெறும்.

இந்தக் கலந்துரையாடலின் போது போர் தொடர்பான அனுபவங்களைப் பகிர்ந்து கொள்வது, கிளர்ச்சி முறியடிப்புத் தொடர்பாக கோட்பாடுகள் குறித்தே அதிக கவனம் செலுத்தப்பட்டு வருகிறது.

இரண்டு நாடுகளுக்கும் இடையில் மிகநெருக்கமான உறவுகள் இருந்து வரும் நிலையில் இந்தக் கலந்துரையாடல் முக்கியமானதொரு மைல் கல்லாக அமையும் என்று இந்திய இராணுவத் தலைமையகம் வெளியிட்டுள்ள செய்திக்குறிப்பில் கூறப்பட்டுள்ளது.

இதுபோன்ற செயற்பாடுகளின் விளைவாக இரு நாடுகளுக்கும் இடையிலான பாதுகாப்பு ஒத்துழைப்பை மேலும் வலுப்படுத்திக் கொள்ளும் சாத்தியங்கள் உள்ளதாகவும் அந்த அறிக்கையில் கூறப்பட்டுள்ளது.

அனுபவங்களைப் பகிர்ந்து கொள்வதன் மூலம் இரண்டு இராணுவங்களும் பல்வேறு துறைகளிலும் சந்திக்கும் சவால்களை எதிர்கொள்ளும் வகையில் இருதரப்பும் ஆதாயம் பெறமுடியும் என்றும் அநத அறிக்கையில் நம்பிக்கை வெளியிடப்பட்டுள்ளது.

இரு நாடுகளுக்கும் இடையிலான தற்போதைய பாதுகாப்பு அணுகுமுறைகள் பலபரிமாணங்களைக் கொண்டதாக இருப்பதாகவும், இந்த அதிகாரிகள் மட்டக் கலந்துரையாமடல் பாதுகாப்பு ஒத்தழைப்புக்கான ஒரு வரைபடத்தை மையப்படுத்தியதாக அமைந்துள்ளது என்றும் அந்தச் செய்திக்குறிப்பில் கூறப்பட்டுள்ளது.

அதேவேளை, இந்தக் கலந்துரையாடலுக்காக புதுடெல்லி சென்றுள்ள சிறிலங்கா இராணுவ அதிகாரிகள் குழு இந்திய இராணுவ உயர் அதிகாரிகள் பலரையும் சந்தித்துப் பேசவுள்ளனர்.

எதிர்வரும் சனிக்கிழமை இவர்கள் கொழும்பு திரும்பவுள்ளதாகவும் புதுடெல்லி தகவல்கள் தெரிவிக்கின்றன.
http://www.puthinappalakai.com/view.php?20110630104175

பிரதமரை சந்தி்த்தார் தயாநிதி மாறன்: பதவியை ராஜினாமா செய்வாரா?

டெல்லி: மத்திய ஜவுளித்துறை அமைச்சர் தயாநிதி மாறன் இன்று டெல்லியில் பிரதமர் மன்மோகன் சிங்கை சந்தித்து பேசினார். இன்னும் ஓரிரு நாட்களில் அமைச்சரவை மாற்றியமைக்கப்படவுள்ள நிலையில் இந்த சந்திப்பு நடந்துள்ளது. இருப்பினும் தனது துறை தொடர்பாக பிரதமரை சந்தித்துப் பேசியதாக தயாநிதி மாறன் கூறியுள்ளார்.

2ஜி ஸ்பெக்ட்ரம் ஒதுக்கீட்டில், ஏர்செல் நிறுவனத்திற்கு சாதகமாக நடந்து கொண்டதாக பெரும் சர்ச்சையில் சிக்கியுள்ளார் தயாநிதி மாறன். மேலும் பிஎஸ்என்எல் தொலைபேசி இணைப்புகளை அவர் தவறாக பயன்படுத்தியதாகவும் பழைய சர்ச்சை மீண்டும் விஸ்வரூபம் எடுத்துள்ளது.

இதைத் தொடர்ந்து தயாநிதி மாறன் பதவி விலக வேண்டும் இல்லாவிட்டால் அவரை பிரதமர் டிஸ்மிஸ் செய்ய வேண்டும் என்ற கோரிக்கையும் எழுந்துள்ளது. தயாநிதி மாறனும் இதுவரை தனது பதவியை ராஜினாமா செய்யவில்லை, பிரதமரும் அவர் பதவியை பறிக்கவில்லை.

இந்நிலையில் இன்று தயாநிதி மாறன் பிரதமர் மன்மோகன் சிங்கை டெல்லியில் சந்தித்து பேசினார். இன்னும் ஓரிரு நாட்களில் அமைச்சரவை மாற்றியமைக்கப்படவுள்ள நிலையில் நடந்துள்ள இந்த சந்திப்பு முக்கியத்துவம் பெறுகிறது. ஏற்கனவே அமைச்சரவை மாற்றியமைக்கப்படும்போது தயாநிதி மாறனின் பதவி பறிக்கப்படும் என்று கூறப்படுகிறது.

இந்நிலையில் தயாநிதி மாறன் எதற்காக பிரதமரை சந்தி்த்தார், அவர்கள் என்ன பேசிக் கொண்டார்கள் என்று அரசியல் வட்டாரத்தில் பரபரப்பாக பேசப்படுகிறது. பிரதமர் நீக்கும் முன் தானாக ராஜினாமா செய்வாரா மாறன் என்று எதிர்பார்ப்பு வலுத்துள்ளது.

அதேசமயம், தனது சந்திப்பில் எந்த அரசியல் முக்கியத்துவமும் இல்லை என்றும் துறை ரீதியான அலுவல் தொடர்பாகவே பிரதமரை சந்தித்துப் பேசியதாகவும் தயாநிதி மாறன் விளக்கியுள்ளார்.
http://thatstamil.oneindia.in/news/2011/06/30/dayanidhi-maran-meets-pm-aid0128.html

சீனாவின் ராணுவ பலத்துடன் ஒப்பிடுகையில் நாம் சாதாரணம்- மன்மோகன் சிங்

டெல்லி: சீனாவின் ஆயுத பலத்துடன் ஒப்பிடுகையில் இந்தியா மிகவும் பின் தங்கியுள்ளது என்று பிரதமர் மன்மோகன் சிங் கூறியுள்ளார்.

நேற்று நாளிதழ்களின் ஆசிரியர்களை சந்தித்துப் பேசினார் மன்மோகன் சிங். அப்போது அவர்களிடம் சீனாவின் ராணுவ பலம் குறித்தும் கூறினார். அதுகுறித்து மன்மோகன் கூறுகையில், நம்மை விட ராணுவ பலத்தில் சீனா பல மடங்கு முன்னணியில் உள்ளது. தற்போது அவர்களது கடற்படை மிகவும் அதி நவீனமாகியுள்ளது. விமானம் தாங்கி போர்க்கப்பல்களை நிறைய கொண்டுள்ளனர்.

நமது ராணுவ ரீதியிலான பலத்துடன் அவர்களை ஒப்பிட முடியாது. நாம் நிறைய பின்தங்கியுள்ளோம். இப்போதுதான் ஒவ்வொன்றாக ஆரம்பித்துக் கொண்டிருக்கிறோம். நமது படைகளை நவீனப்படுத்தும் நடவடிக்கைகளை யோசித்து வருகிறோம். கிட்டத்தட்ட பலப் பல ஆண்டுகளுக்குப் பின்னர் முதல் முறையாக ராணுவத்தில் புதிதாக 2 டிவிஷன்களை இப்போதுதான் நாம் உருவாக்கியிருக்கிறோம். நமது வேகம் மெதுவாகவே உள்ளது என்பது உண்மைதான்.

எனவே, நம்மிடம் உள்ள வசதிகளை வைத்து, விமானப்படைகளை ஸ்திரமாக வைத்துள்ளோம். எல்லைப் பகுதிகள் நமது விமானப்படையின் பாதுகாப்பான கரங்களுக்குள் உள்ளது. எல்லைப் புற சாலைகளை மேம்படுத்தவும் நாம் முயற்சித்து வருகிறோம். படிப்படியாக நாம் முன்னேறிக் கொண்டிருக்கிறோம்.

பாதுகாப்புக்கான நிதி ஒதுக்கீடு என்பது கடந்த காலங்களை விட குறைந்துள்ளது என்பது உண்மைதான். இருப்பினும் அதற்காக நாம் தேவையான செலவுகளை குறைக்கவில்லை. பாதுகாப்பான நிதி ஒதுக்கீடும் நமக்கு மிகவும் அவசியம் என்பதை அரசு மறக்கவில்லை என்றார் பிரதமர்.

http://thatstamil.oneindia.in/news/2011/06/30/militarily-china-far-ahead-than-india-pm-manmohan-singh-aid0091.html

விடுதலையாவதற்காக 2ஜி ஊழல் வழக்கில் அப்ரூவராவாரா கனிமொழி?

டெல்லி: திமுக தலைவர் கருணாநிதியின் மகள் கனி்மொழி, திஹார் சிறையிலிருந்து இப்போதைக்கு வெளியே வருவதற்கு ஒரே ஒரு வழிதான் உள்ளது. அது, வழக்கில் அவர் அப்ரூவராக வேண்டும். அப்படி ஆக முடிவு செய்தால் அவருக்கு உடனடியாக ஜாமீன் கிடைக்க வழி உள்ளது.

ஆனால் கனிமொழி அப்ரூவர் ஆவார் என்பது சந்தேகம்தான். கடந்த 2 மாதங்களாக திஹார் சிறையில் வாடி வருகிறார் கனிமொழி. 2ஜி ஸ்பெக்ட்ரம் ஊழலில் கலைஞர் டிவிக்கு கிடைத்த ரூ. 204 கோடி கடன் தொகை தொடர்பாக அவரும், கலைஞர் டிவி நிர்வாக இயக்குநர் சரத்குமார் ரெட்டியும் சிறையில் அடைக்கப்பட்டுள்ளனர்.

அவர் இதுவரை தாக்கல் செய்த 3 ஜாமீன் மனுக்களும் தள்ளுபடியாகி விட்டன. வழக்கில் குற்றச்சாட்டுப் பதிவு செய்த பின்னர், விசாரணை நீதிமன்றமான சிபிஐ கோர்ட்டை அணுகுமாறு கனிமொழிக்கு உச்சநீதிமன்றம் அறிவுறுத்தியுள்ளது. அதுவரை அவரால் வெளியே வர முடியாத நிலை.

இந்த நிலையில் வழக்கில் அப்ரூவராக கனிமொழி முடிவு செய்தால் அவருக்கு ஜாமீன் உடனடியாக கிடைக்கலாம் என்று கூறப்படுகிறது. ஆனால் கனிமொழி அப்படிச் செய்வார் என்பதும் சந்தேகம்தான்.

அப்ரூவராக கனிமொழி முடிவு செய்தால் அது திமுகவுக்கு பெரும் பாதிப்பையே ஏற்படுத்தும் என்பதால் அதுகுறித்து ஒன்றுக்கு நான்கு முறை கனிமொழியும், கருணாநிதி குடும்பத்தினரும் யோசிக்கலாம் என்று தெரிகிறது.

அதேசமயம், கனிமொழி அப்ரூவராக மாறி, மத்திய அரசுக்கு தர்மசங்கடத்தை ஏற்படுத்தும் வகையில் பல தகவல்களை வெளியிட்டால் அது காங்கிரஸுக்கு பெரும் சிக்கலை ஏற்படுத்தக் கூடும் என்பதால் கனிமொழி அப்ரூவராக மாறக் கூடிய வாய்ப்புகளையும் மறுப்பதற்கில்லை என்று கூறப்படுகிறது.

http://thatstamil.oneindia.in/news/2011/06/30/2gscam-will-kanimozhi-turn-approver-the-sake-of-freedom-aid0091.html

திருவனந்தபுரம் பத்மநாபசுவாமி கோவிலில் ரூ. 1000 கோடி தங்க நகைகள் கண்டுபிடிப்பு

திருவனந்தபுரம்: திருவனந்தபுரத்தில் உள்ள பத்நாபசுவாமி கோவிலில் உள்ள நான்கு பாதாள அறைகளைத் திறந்து ஆய்வு செய்ததில் கிடைத்த நகைகளின் மதிப்பு ரூ. 1000 கோடி இருக்கும் என மதிப்பிடப்பட்டுள்ளது.

திருவனந்தபுரத்தில் உள்ள பத்மநாபசுவாமி கோவில் மிகவும் பழமையானது. இங்கு ஆறு பாதாள அறைகள் உள்ளன. அதில் என்ன உள்ளது என்பதைத் திறந்து பார்க்க உத்தரவிட வேண்டும் என்று கோரி உச்சநீதிமன்றத்தில் வழக்கு தொடர்பபட்டது. இதை விசாரித்த உச்சநீதிமன்றம் 2 முன்னாள் கேரள உயர்நீதிமன்ற நீதிபதிகள் தலைமையிலான 7 பேர் குழுவை அமைத்து பாதாள அறைகளை ஆய்வு செய்ய உத்தரவிட்டது.

அதன்படி மொத்தம் உள்ள 6 பாதாள அறைகளில் 4 அறைகளை இக்குழு ஆய்வு செய்து பார்த்தது. அப்போது பத்திரிக்கையாளர்கள் யாரும் அனுமதிக்கப்படவில்லை. இந்த ஆய்வின்போது பெருமளவிலான நகைகள்,பாத்திரங்கள், பணம் உள்ளிட்டவை கிடைத்தன. அவற்றின் மதிப்பை அறிய கணக்கீடு செய்யப்பட்டது. இந்த மதிப்பீட்டில் அவற்றின் மொத்த மதிப்பு ரூ. 1000 கோடி இருக்கும் எனத் தெரிய வந்துள்ளது.

பெரிய பெரிய தங்கச் சங்கிலிகள், தங்க நாணயங்கள், தங்கக் குடங்கள், நவரத்தினக் கற்கள் பொறித்த தங்க ஆபரணங்கள், பெருமளவிலான பணக் கட்டுக்கள் இந்த அறைகளில் இருந்துள்ளன. மிகப் பழமையான இந்த ஆபரணங்கள், பாத்திரங்கள், நகைகள் உள்ளிட்டவை கிட்டத்தட்ட 150 ஆண்டு பழமை வாய்ந்தவை என்று கூறப்படுகிறது.

மேலும் உள்ள 2 அறைகளை விரைவில் திறக்கவுள்ளனர். அங்கு வைரம் மற்றும் வைடூரிய நகைகள், பொருட்கள் இருக்கலாம் என சந்தேகிக்கப்படுகிறது.

18வது நூற்றாண்டில், திருவாங்கூர் சமஸ்தானத்தின் மார்த்தாண்ட வர்மாவால் கட்டப்பட்டது இந்தக் கோவில். திருவாங்கூர் சமஸ்தான குடும்பத்தினரைக் கொண்ட அறக்கட்டளை மூலம் இக்கோவில் நிர்வகிக்கப்பட்டு வருகிறது என்பது குறிப்பிடத்தக்கது.

http://thatstamil.oneindia.in/news/2011/06/30/assets-worth-rs-1000-crore-kerala-temple-secret-rooms-aid0091.html

பொன்சேகாவும் நானும் எதிரிகளானதற்கு இந்தியாவின் ரோ அமைப்புதான் காரணம்- சொல்கிறார் ராஜபக்ச

கொழும்பு: செய்வதை எல்லாம் செய்து விட்டு, இப்போது ஆப்பில் சிக்கிய குரங்கின் நிலையில் உள்ள இலங்கை சர்வாதிகாரி ராஜபக்சே, தனக்கும், சரத் பொன்சேகாவுக்கும் இடையே பூசல் ஏற்பட, மோதல் ஏற்பட, எதிரிகளாக மாறியதற்கு இந்திய உளவு அமைப்பான ரா தான் காரணம். அது செய்த சதியால்தான் தானும், பொன்சேகாவும் எதிரும் புதிருமாக மாறி விட்டதாக பிதற்றியுள்ளார்.

இன்று இல்லாவிட்டாலும் நாளை கண்டிப்பாக தண்டனை உறுதி என்ற நிலையை நோக்கி ராஜபக்சே கும்பல் போய்க் கொண்டிருக்கிறது. ஈழத்தில் அவர்கள் நிகழ்த்திய கொலை வெறியாட்டத்தைப் பார்த்து சர்வதேச சமுதாயம் படிப்படியாக கவலைக்குள் மூழ்க ஆரம்பித்துள்ளது. ஒட்டுமொத்த சர்வதேசமும் ராஜபக்சே கும்பலுக்கு எதிராக திரளும் நாள் அருகில் இல்லாவிட்டாலும், வெகு தொலைவில் இல்லை என்கிறார்கள்.

காமன்வெல்த் நாடுகள் அமைப்பு, ஐரோப்பிய யூனியன், இங்கிலாந்து என அடுத்தடுத்து இலங்கைக்கு எதிராக பொருளாதாரத் தடைகளை அடுக்கப் போவதாகவும் தகவல்கள் கூறுகின்றன. அமெரிக்க கோர்ட்டில் ராஜபக்சேவுக்கு எதிராக வழக்கு போடப்பட்டுள்ளது. ஆம்னஸ்டி இன்டர்நேஷனல் அமைப்பும் வழக்கு தொடரப் போவதாக கூறப்படுகிறது.

இப்படி அடுக்கடுக்காக சர்வதேச அளவில் ராஜபக்சேவுக்கு எதிராகவும், இலங்கைக்கு எதிராகவும் நெருக்குதல்கள் அதிகரித்து வருவதால் எத்தைத் தின்றால் பித்தம் தெளியும் என்ற நிலையில் குழம்பிப் புலம்பி வருகிறார் ராஜபக்சே.

இந்த நிலையில் சரத் பொன்சேகா மீது திடீர் பாசத்தைக் காட்டுவது போல பேசியுள்ளார் ராஜபக்சே. இருவருக்கும் இடையே பகையை மூட்டி எதிரிகளாக மாற்றியதே இந்தியாவின் உளவு அமைப்பான ரா தான் என்றும் பேசியுள்ளார் அவர்.

இலங்கை ராணுவத்தின் முன்னாள் தளபதிகள் இருவரிடம் பேசிக் கொண்டிருந்தபோதுதான் இப்படிக் கூறினாராம் ராஜபக்சே.

இதுகுறித்து அவர் கூறுகையில், விடுதலைப் புலிகளுடனான யுத்தம் வெற்றி கொள்ளப்பட்டு சிறிது காலத்துக்குள்ளாகவே ராணுவத்தளபதி பதவியிலிருந்து சரத் பொன்சேகாவை நீக்கியது தான் செய்த தவறு. இந்திய உளவுத்துறையின் சதியே அதற்கான காரணம்.

சரத் பொன்சேகா குறித்து இந்திய உளவுத்துறை போலியான தகவல்களை வழங்கி என்னை தவறாக வழிநடத்தி விட்டது. அதன் பின்பு தோ்தலில் போட்டியிடுவதற்காக சரத் பொன்சேகா கூட்டுப் படைகளின் பிரதம அலுவலர் பதவியிலிருந்து ராஜினாமாச் செய்ய முன்வந்த போது அவரது ராஜினாமாவை ஏற்றுக் கொண்டது அதை விடப் பெரும் தவறாகும்.

சரத் பொன்சேகாவின் ராஜினாமாவை ஏற்றுக் கொள்ளாதிருக்கும்படி பாதுகாப்புச் செயலாளர் கோத்தபய ராஜபக்சே எவ்வளவோ வற்புறுத்தியும் இந்தியாவின் அழுத்தங்களை ஏற்று அதனை நான் ஏற்றுக் கொண்டேன்.

அவ்வாறு இல்லாமல் அவரது ராஜினாமாவை ஏற்றுக் கொள்ளாதிருந்தால், காலப்போக்கில் சரத் பொன்சேகாவுடன் இருந்த மனக்கசப்புகளைத் தீர்த்துக் கொண்டிருக்க முடிந்திருக்கும்.

விடுதலைப் புலிகளின் தலைவர் பிரபாகரனின் மரணத்தின் பின் சரத் பொன்சேகா புகழேணியின் உச்சத்துக்கு ஏறியிருப்பதாகவும், அதன் காரணமாக அவர் ராணுவ சதிப்புரட்சி மூலமாக அரசைக் கைப்பற்ற முனைவதாகவும், அவ்வாறான சந்தர்ப்பத்தில் நாட்டில் பெரும்பாலானவர்கள் அவரை ஏற்றுக் கொள்வதற்கான வாய்ப்பு இருப்பதாகவும், உளவுத்தகவல்களை அடிப்படையாகக் கொண்டு என்னை எச்சரித்த இந்திய அதிகாரிகள், பொன்சேகாவின் அதிகாரங்களை உடனடியாக கட்டுப்படுத்துமாறு ஆலோசனை வழங்கினர்.

அதன் பிரகாரம் செயற்பட்டே நான் சரத் பொன்சேகாவின் அதிகாரங்களைக் குறைப்பதற்கான நடவடிக்கைகளை மேற்கொண்டேன்.

ராணுவத்தின் அறுபதாவது ஆண்டு நிறைவுக் கொண்டாட்டத்திற்கு தலைமை தாங்கி விட்டு, 2009 ம் ஆண்டு டிசம்பர் மாதம் 17ம் தேதி தனது பிறந்த நாளுடன் ராணுவ சேவையிலிருந்து ஓய்வு பெற சரத் பொன்சேகா தீர்மானித்திருந்தார். அதன் பின் பதவி நீடிப்பு தொடர்பில் கோரிக்கை முன்வைப்பதில்லை என்று அவர் என்னிடம் தெரிவித்திருந்தார்.

வெளிநாட்டு அழுத்தங்கள் கடுமையாகிக் கொண்டிருக்கும் இவ்வாறான சந்தர்ப்பத்தில் அவரது விலகல் எனக்குப் பெரும் இழப்பாகவே இருக்கின்றது என்று புலம்பினாராம் ராஜபக்சே.

உண்மையில் ஈழத் தமிழ் இனப் படுகொலையில் ராஜபக்சே சகோதரர்களுக்கு எவ்வளவு பங்கு உள்ளதோ அதே அளவிலான பங்கு பொன்சேகாவுக்கும் உள்ளது என்பது குறிப்பிடத்தக்கது.

தற்போது ராஜபக்சே புலம்புவதைப் பார்த்தால் பொன்சேகாவை தன் பக்கம் மீண்டும் சேர்த்துக் கொண்டு இந்தியாவுக்கு எதிராக மாறி, சர்வதேச நெருக்கடிகளை சமாளிக்கும் வழிகளைக் காண முயற்சிப்பாரோ என்ற தோற்றம் ஏற்பட்டுள்ளது.

http://thatstamil.oneindia.in/news/2011/06/30/raw-divided-me-fonseka-says-rajapakse-aid0091.html

புதன், 29 ஜூன், 2011

கருணாநிதி, ஸ்டாலின், கனிமொழி நலனுக்காக காளஹஸ்தி கோவிலில் செல்வி சிறப்புப் பூஜை!

சென்னை: நாத்திகத்தின் அடையாளமாக தங்களைக் கூறிக் கொள்வது திமுக தலைவர் கருணாநிதியின் வழக்கம். ஆனால் அவரது குடும்பத்தினரோ கோவில் கோவிலாக வலம் வருவதைத சமீப காலமாக பகிரங்கமாகவே செய்ய ஆரம்பித்துள்ளனர்.

தனது கட்சியைச் சேர்ந்த எம்.பி. ஒருவர் நெற்றியில் குங்குமம் வைத்திருந்தார் என்பதால் கோபமடைந்த கருணாநிதி அதை அழிக்கச் செய்தார் ஒரு காலத்தில். ஆத்திகர்களை கடுமையாக சாடுவார். ஆனால் அவரது குடும்பத்தினர் கோவில் கோவிலாக வலம் வருவதையும், குங்குமம் வைத்துக் கொள்வதையும், பூஜைகள் புனஸ்காரங்களில் ஈடுபடுவதையும் தடுக்க மாட்டார், கண்டிக்க மாட்டோர், விமர்சிக்க மாட்டார்.

அதிலும் கடந்த திமுக ஆட்சிக்காலத்தின்போது அவரது குடும்பத்தினர் தமிழகத்தில் உள்ள முக்கியக் கோவில்களுக்கு அடிக்கடி சென்று பூஜைகள் செய்வதை வழக்கமாக்கிக் கொண்டனர். கருணாநிதியின் குல தெய்வம் கோவிலுக்குத்தான் அதிக அளவில் சென்றனர். இதைப் பற்றியெல்லாம் ஒரு வார்த்தை கூட பேசாமல் இருந்தார் கருணாநிதி.

இந்த நிலையில் கருணாநிதி நலமாக இருக்க வேண்டும் என்று வேண்டி அவரது மூத்த மகள் செல்வி காளஹஸ்தி கோவிலுக்குப் போய் ராகு கேது சர்ப்ப தோஷ பூஜையை நடத்தியுள்ளது பரபரப்பை ஏற்படுத்தியுள்ளது.

அப்போது தனது சகோதரர் ஸ்டாலின், தங்கை கனிமொழி ஆகியோருக்காகாகவும் இந்த பரிகார பூஜையை நடத்தயுள்ளார் செல்வி.

சென்னையிலிருந்து குடும்பத்தினருடன் காரில் திருப்பதி சென்ற செல்வி அங்கு விஐபி வரிசையில் போய் ஏழுமலையானை வணங்கினார். பின்னர் காளஹஸ்தி கோவிலுக்குப் போனார். அங்கு ராகு கேது சர்ப்ப தோஷ பரிகார பூஜையை செய்தார். செல்வியுடன் அவரது குடும்பத்தினரும் இதில் கலந்து கொண்டனர்.

பின்னர் வாயுலிங்கேஸ்வரர், ஞான பிரசுனாம்பிகா தாயாருக்கு கருணாநிதி, ஸ்டாலின், கனிமொழி பெயர்களில் சிறப்பு பூஜை செய்து பயபக்தியுடன் செல்வி உள்ளிட்டோர் சாமி கும்பிட்டனர். பிறகு வேத பண்டிதர்களை சந்தித்து சிறப்பு ஆசியும் பெற்று வெளியே வந்தனர்.


http://thatstamil.oneindia.in/news/2011/06/29/selvi-conducts-special-parikara-poojai-for-karunanidhi-aid0091.html

அடுத்த கைது யார்?அலறும் தி.மு.க., பிரமுகர்கள்: அதிரடிக்கு தயாராகும் போலீஸ்

கடந்த ஆட்சியின் போது அரசியல் அதிகாரத்தை பயன்படுத்தி கோவையில் நிலம், சொத்து அபகரிப்பு குற்றங்களில் ஈடுபட்டதாக கூறப்படும் 12 நபர்களின் பட்டியலை தயாரித்துள்ளனர் போலீசார்.இப்பட்டியலில் இடம்பெற்றிருக்கும் மாஜி அமைச்சரின் ஆதரவாளர்கள் மற்றும் தி.மு.க., பிரமுகர்களுக்கு எதிரான ஆதாரங்களை திரட்டி வரும் போலீசார், விரைவில் கைது செய்ய திட்டமிட்டுள்ளனர்.

"தமிழகத்தில் முந்தைய தி.மு.க., ஆட்சியின்போது மாநிலம் முழுவதும் பல நூறு கோடி ரூபாய் மதிப்பிலான தனியார் நிலம், சொத்துகள் ஆளுங்கட்சியினரால் பறிக்கப்பட்டதாகவும், அரசியல் ரீதியான நெருக்கடி காரணமாக போலீசார் சட்டப்படி நடவடிக்கை மேற்கொள்ளவில்லை' என்றும், முதல்வர் ஜெயலலிதாவின் கவனத்துக்கு கொண்டு செல்லப்பட்டது. இதையடுத்து, நிலம் அபகரிப்பு குற்றச்சாட்டுகளில் தொடர்புடையவர்கள் மீது சட்டப்படி நடவடிக்கை மேற்கொள்ள போலீசாருக்கு உத்தரவிடப்பட்டுள்ளது. இதன்படி, மாநிலம் முழுவதும் உளவு போலீசார் ரகசிய தகவல்களை சேகரித்து அரசுக்கு அனுப்பி வருகின்றனர். கோவையில் பண்ணை வீட்டுமனை திட்டம் துவக்கி, ஸ்ரீசர்மா என்பவரிடம் பண மோசடியில் ஈடுபட்ட "கிரீன் ஹோம் லேண்ட் ஸ்கேப் (பி) லிமிடெட்' நிறுவன அதிபரும், மாவட்ட தி.மு.க., துணைச் செயலாளருமான ஆனந்தனை, மாநகர குற்றப்பிரிவு போலீசார் நேற்று கைது செய்தனர்.

நில மோசடி வழக்கில் கோவையில் கைதாகியுள்ள முதல் தி.மு.க., பிரமுகர் இவர் என்பதால், "அடுத்தது யார்?' என்ற பீதியில் உள்ளனர் அக்கட்சியினர்.கைது பட்டியலில் 12 பிரமுகர்கள்: கோவை மாநகரில் கடந்த ஐந்து ஆண்டுகளில் தனியார் நிலம், சொத்து அபகரிப்பு குற்றங்களில் யார், யாரெல்லாம் ஈடுபட்டனர், அவர்களின் பின்னணி என்ன, சம்பந்தப்பட்ட சொத்துகளின் மதிப்பு எவ்வளவு, என்பது தொடர்பான தகவல்களை போலீசார் திரட்டியுள்ளனர்.

இதில், தி.மு.க., பிரமுகர்கள் மற்றும் மாஜி அமைச்சரின் ஆதரவாளர்கள், தனி நபர்கள் என 12 பேரின் விபரங்கள் இடம்பெற்றுள்ளன. அமைச்சரின் ஆதரவாளர் எனக்கூறப்படும் "மீன்கடை' என்ற அடைமொழியை பெயருக்கு முன்னால் வைத்திருக்கும் நபர், கைது பட்டியலில் முதலிடத்தில் உள் ளார். கடந்த தி.மு.க., ஆட்சியின் போது சிங்காநல்லூர் ரயில்வே கேட் அருகிலிருந்த தனியாருக்குச் சொந்தமான ஐந்து கோடி ரூபாய் மதிப்பிலான விவசாய நிலத்தை இந்நபரின் தலைமையிலான கும்பல் அபகரித்ததாகவும், அந்நிலத்தின் குத்தகைதாரர் எதிர்ப்பு தெரிவித்ததால் வீட்டுக்கு தீ வைத்ததாகவும் கூறப்படுகிறது. அப்போதே இது குறித்து போலீசில் புகார் செய்தும் நடவடிக்கை மேற்கொள்ளப்படவில்லை. இக்குற்றச்சாட்டுகள் உள்ளிட்ட மேலும் சில புகார்கள் தொடர்பான விசாரணையை தீவிரப்படுத்தியுள்ள மாநகர போலீசார், அடுத்த கைதுக்கான அஸ்திரத்தை கையிலெடுத்துள்ளனர்.

கோவை போலீஸ் கமிஷனர் அமரேஷ் புஜாரி கூறியதாவது:கோவை மாநகர போலீஸ் எல்லைக்குள் நிலம், சொத்து அபகரிப்பு குற்றங்கள் தொடர்பான சம்பவங்கள் கடந்த காலங்களில் நடந்திருந்தால், அதுகுறித்து மாநகர மத்திய குற்றப்பிரிவு போலீசார் விசாரிப்பர்; இதுபோன்ற புகார்களை விசாரிக்க, தனி போலீஸ் "டீம்' ஏற்படுத்தப்பட்டுள்ளது. பாதிக்கப்பட்டவர்கள் நேரடியாக என்னை சந்தித்து புகார் அளிக்கலாம். அந்த புகார் மனு சட்ட ரீதியான நடவடிக்கைகளுக்காக மாநகர குற்றப்பிரிவுக்கு பரிந்துரைக்கப்படும். நிலம், சொத்து அபகரிப்பு தொடர்பான புகார்கள் போலீஸ் ஸ்டேஷன்களில் விசாரிக்கப்பட மாட்டாது. நிலம், சொத்து பறிப்பு சம்பவங்களில் பாதிக்கப்பட்டதாக கூறப்படும் சிலர், டெலிபோனில் போலீசாரை தொடர்பு கொண்டு தகவல் தெரிவிக்கின்றனர். டெலிபோன் தகவலைக் கொண்டு சட்ட ரீதியான நடவடிக்கைகளை மேற்கொள்ள முடியாது.இவ்வாறு, போலீஸ் கமிஷனர் அமரேஷ் புஜாரி தெரிவித்தார்.

கவர்னரின் உறவினரா? கோவை நகரில் வில்லங்கமான சொத்துக்களை அடிமாட்டு விலைக்கு வாங்கி, எதிர்தரப்பு நபர்களை மிரட்டும் வேலையில் மூன்று பேர் கும்பல், கடந்த சில ஆண்டுகளாக ஈடுபட்டு வருகிறது. அந்நபர்களில் ஒருவர், தன்னை, "கவர்னரின் உறவினர்' எனக்கூறி போலீஸ் நடவடிக்கையில் இருந்து தப்பி வந்துள்ளார். தற்போது, பழைய புகார்கள், வழக்குகள் தொடர்பான ஆவணங்களை தூசு தட்டி எடுத்துள்ள போலீசார், இதுகுறித்தும் தங்களது மேலிடத்துக்கு அறிக்கை அனுப்பியுள்ளனர். உத்தரவு வந்ததும், அடுத்தடுத்து கைது நடவடிக்கை பாயும் என்கின்றனர், அதிகாரிகள்.

http://www.dinamalar.com/News_Detail.asp?Id=266146

ராகுல் காந்தி பிரதமர் பதவியை ஏற்க எந்தத் தடையும், சிக்கலும் இல்லை- மன்மோகன் சிங்

டெல்லி: ராகுல் காந்தி பிரதமர் பதவியை ஏற்க எந்தத் தடையும், சிக்கலும் இல்லை என்று 'பொம்மை பிரதமர்' என்று எதிர்க்கட்சிகளால் வர்ணிக்கப்படும் பிரதமர் மன்மோகன் சிங் கூறியுள்ளார்.

ஐக்கிய முற்போக்குக் கூட்டணி அரசு மீதான பல்வேறு புகார்கள் சரமாரியாக வெடித்துக் கிளம்பி, பத்திரிகைகள் மூலமாக மக்களை வேகமாக சென்றடைந்து வரும் நிலையில் திடீரென பத்திரிக்கை ஆசிரியர்களுடனான சந்திப்புக்கு ஏற்பாடு செய்தார் பிரதமர் மன்மோகன் சிங்.

அதன்படி ஐந்து பத்திரிக்கைகளைச் சேர்ந்த ஆசிரியர்களுடன் இன்று காலை 2 மணி நேரம் அவர் பேசினார்.

அப்போது பத்திரிக்கை ஆசிரியர்கள் கேட்ட பல்வேறு கேள்விகளுக்கும் அவர் பதிலளித்தார்.

ராகுல் காந்தி பிரதமராகலாம்

ராகுல் காந்தி பிரதமராகத் தகுதி படைத்தவராகி விட்டார் என்று திக்விஜய் சிங் உள்ளிட்ட ராகுல் காந்தியின் ஆதரவாளர்கள் கூறி வருவது குறித்த கேள்விக்கு மன்மோகன் சிங் பதிலளிக்கையில், ராகுல் காந்தி பிரதமராக எந்த தடையும், சிக்கலும் இல்லை என்று பதிலளித்தார் மன்மோகன் சிங்.

நான் பொம்மை பிரதமர் இல்லை

உங்களை பொம்மை பிரதமர் என்று எதிர்க்கட்சிகள் கூறி வருவது குறித்து அவரிடம் கேட்டபோது, இது எதிர்க்கட்சிகளின் புத்திசாலித்தனமான பிரசாரம். ஆனால் அதில் உண்மை இல்லை. சோனியா காந்தியின் கைப்பாவையாக நான் நிச்சயம் இல்லை. உண்மையில் அரசுக்கு சோனியா காந்தி மிகச் சிறந்த ஒத்துழைப்பை அளித்து வருகிறார். காங்கிரஸ் தலைவராகவும் அவர் சூப்பராக செயல்பட்டு வருகிறார் என்றார் பிரதமர்.

லோக்பாலில் பிரதமர் பதவியும் இடம் பெற வேண்டும்

லோக்பால் அமைப்பில் பிரதமர் பதவியையும் சேர்க்க வேண்டும் என்ற கோரிக்கை குறித்த கேள்விக்கு அவர் பதிலளிக்கையில், அதுதான் எனது விருப்பமும் கூட. அதில் எனக்கு எந்தத் தயக்கமும் இல்லை. அனைத்தும் வெளிப்படையாக இருக்க வேண்டும் என்றே விரும்புகிறேன்.

விரைவில் அமைச்சரவை மாற்றம்

அமைச்சரவை மாற்றம் குறித்த கேள்விக்கு அவர் பதிலளிக்கையில், விரைவில் அமைச்சரவையில் மாற்றம் செய்யப்படு். எப்போது என்பது குறித்து இப்போது கூற முடியாதுஎன்றார் பிரதமர்.

திமுகவுடன் நல்லுறவு

திமுகவுடனான உரசல்கள் குறித்த கேள்விக்கு அவர் பதிலளிக்கையில், திமுகவுடன் சில நேரங்களில் சிக்கலான சூழல் ஏற்பட்டது உண்மைதான். இருப்பினும் கூட்டணி நன்றாகவே உள்ளது என்றார் மன்மோகன் சிங்.

மீடியாக்கள் நீதிபதிகள் போல செயல்படுகின்றன

மீடியாக்களில் வரும் ஊழல் உள்ளிட்டவை குறித்த கேள்விகளுக்கு அவர் பதிலளிக்கையில், அரசு குறித்த விமர்சனங்கள், ஊழல் புகார்கள் உள்ளிட்டவை குறித்து மீடியாக்களே பகுத்தாய்ந்து, விசாரணை நடத்தி, தீர்ப்பையும் கூறி வருகின்றன. இது கவலை தருகிறது. உரிய சட்ட ரீதியான நடவடிக்கைகள் முடியும் வரை மீடியாக்கள் பொறுமை காக்க வேண்டியது அவசியம் என்றார்.

இலங்கைப் பிரச்சினையில் அவசரம் காட்ட முடியாது

இலங்கை பிரச்சினை குறித்த கேள்விக்கு அவர் பதிலளிக்கையில், இலங்கை மட்டுமல்லாமல், பாகிஸ்தான், சீனா, வங்கதேசம் ஆகிய நமது அண்டை நாடுகளுடனான பிரச்சினைகளில் மிகுந்த கவனத்துடன் செயல்பட வேண்டியுள்ளது. அதில் அவசரம் காட்ட முடியாது. பொறுமையுடன்தான் எதையும் அணுக வேண்டியுள்ளது என்றார் பிரதமர்.

ராம்தேவ் விவகாரம்

பாபா ராம்தேவ் உண்ணாவிரதம் இருந்தபோது ராம் லீலா மைதானத்தில் எடுக்கப்பட்ட நடவடிக்கை விமர்சிக்கப்படுவதில் அர்த்தமில்லை. அப்போது அதைத் தவிர வேறு வழி எங்கள் முன்பு இல்லை.

பிரணாப் அலுவலக உளவு பார்ப்பு

நிதியமைச்சர் பிரணாப் முகர்ஜி அலுவலகம் உளவு பார்க்கப்பட்டதாக கூறப்பட்ட சர்ச்சை இப்போது முடிந்து போன ஒன்று.

http://thatstamil.oneindia.in/news/2011/06/29/no-problem-rahul-becoming-pm-says-manmohan-singh-aid0091.html

செவ்வாய், 28 ஜூன், 2011

சிறிலங்கா அதிகாரமட்டத்துக்கு பரிச்சமில்லாத ரஞ்சன் மாதாய் இந்திய வெளிவிவகாரச் செயலராகிறார்

இந்தியாவின் புதிய வெளிவிவகாரச் செயலராக தற்போது பிரான்சுக்கான இந்தியத் தூதுவராகப் பணியாற்றும் ரஞ்சன் மாதாய் நியமிக்கப்பட்டுள்ளார்.

தற்போது இந்திய வெளிவிகாரச் செயலராக உள்ள நிருபமா ராவின் இரண்டு ஆண்டு பதவிக்காலம் எதிர்வரும் ஜுலை 31ம் நாளுடன் நிறைவடையவுள்ள நிலையில் அவர் அமெரிக்காவுக்கான தூதுவராக நியமிக்கப்பட்டுள்ளார்.

இந்தநிலையிலேயே 59 வயதான ரஞ்சன் மாதாய் எதிர்வரும் ஓகஸ்ட் மாதம் 1ம் நாள் இந்திய வெளிவிவகாரச் செயலராக பொறுப்பேற்கவுள்ளார்.

இரண்டு ஆண்டுகளுக்கு இவர் இந்தப் பதவியில் இருப்பார் என்று இந்திய வெளிவிவகார அமைச்சின் பேச்சாளர் விஸ்ணு பிரகாஸ் தெரிவித்தார்.
கேரளாவைச் சேர்ந்த ரஞ்சன் மாதாய் இதற்கு முன்னர் வியன்னா, கொழும்பு , வொசிங்டன், தெகரான், பிரசெல்ஸ் போன்ற நகரங்களில் உள்ள இந்தியத் தூதரகங்களில் பணியாற்றியுள்ளார்.

1995-1998 காலப் பகுதியில் இந்திய வெளிவிவகார அமைச்சின் இணைச்செயலராகவும், பங்களாதேஸ், மியான்மர், சிறிலங்கா, மாலைதீவு ஆகிய நாடுகளுடனான உறவுகளுக்குப் பொறுப்பாக பிரிவின் தலைமை அதிகாரியாகவும் பணியாற்றிய அனுபவம் இவருக்கு உள்ளது.

ஏற்கனவே இஸ்ரேல், கட்டார் நாடுகளிலும் இவர் இந்தியத் தூதுவராகவும், பிரித்தானியாவுக்கான பிரதி தூதுவராகவும் ரஞ்சன் மாதாய் பணியாற்றியுள்ளார்.

ஏற்கனவே இந்திய வெளிவிவகாரச் செயலராக இருந்த ஜே.என்.டிக்சிற், சிவ்சங்கர் மேனன்,நிருபமா ராவ் போன்றோர் சிறிலங்காவுக்கான தூதுவர்களாகப் பணியாற்றியவர்கள் என்பதால், கொழும்பு அதிகாரமட்டங்களுடன் நெருக்கமான தொடர்புகளைப் பேணி வந்தவர்கள் என்பது குறிப்பிடத்தக்கது.

ஆயினும் ரஞ்சன் மாதாய் கொழும்பில் இந்தியத் தூதரகத்தில் இளநிலை அதிகாரியாகவே பணியாற்றிவர் என்பதால் சிறிலங்கா அதிகார மட்டங்களுடன் அவ்வளவு பரிச்சயமில்லாதவர்.

இதனால் இவரது கொழும்புடனான அணுகுமுறைகள் முன்னையவர்களை விட சற்று வேறுபட்டதாக இருக்கலாம் என்றும் கருதப்படுகிறது.

http://www.puthinappalakai.com/

வரத்து அதிகரிப்பு: மல்லிகைப் பூ விலை கடும் வீழ்ச்சி!

கோவில்பட்டி: விளைச்சல் அதிகரிப்பால் கோவில்பட்டி பகுதியில் மல்லிகைப் பூ விலையில் வீழ்ச்சி ஏற்பட்டுள்ளது. இதனால் ஒரு கிலோ மல்லிகைப் பூ ரூ. 50-க்கு விற்பனை செய்யப்படுகிறது. இது பெண்களுக்கு மகிழ்ச்சியையும் விவசாயிகளுக்கு வேதனையையும் ஏற்படுத்தியுள்ளது.

தூத்துக்குடி மாவட்டம் கோவில்பட்டி பகுதிக்கு நாலாட்டின் புதூர், வில்லிசேரி, இளையரசனேத்தல், முடுக்கு மீண்டான்பட்டி, சத்திரம்பட்டி, இடைசேவல், எட்டயபுரம், சங்கரன்கோவில், கழுகுமலை உள்ளிட்ட பல்வேறு பகுதிகளில் இருந்து விவசாயிகள் மல்லிகைப் பூவை விற்பனைக்கு கொணடு வருகின்றனர்.

மல்லிகைப் பூ சீசன் என்பதால் வரத்து அதிகரித்துள்ளது. தற்போது பண்டிகை மற்றும் கோயில் திருவிழாக்கள் நடைபெறும் காலமாக இல்லாததால் மல்லிகை விலை வீழ்ச்சியடைந்துள்ளது. கடந்த சில மாதங்களுக்கு முன்பு 1 கிலோ மல்லிகைப் பூ ரூ.1000-ல் இருந்து ரூ.ஆயிரத்து 800 வரை விற்கப்பட்டது.

கடந்த 10 நாட்களாக வரத்து அதிகரிப்பால் மல்லிகை கிலோ ஒன்றுக்கு ரூ.50 வரை விற்கப்படுகிறது. விலை குறைந்ததால் பொதுமக்கள் மகிழ்ச்சி அடைந்துள்ளனர்.

ஆனால் விவசாயிகள் வேதனை அடைந்துள்ளனர். பூக்களை பயிரிட்டு, பாதுகாத்து, பறித்து, விற்பனைக்கு அனுப்பும் வரை படாதபாடு படும் விவசாயிகள் போதிய விலை கிடைக்காததால் வேலை பார்க்கும் தொழிலாளர்களுக்கு குட கூலி கொடுக்க முடியாத நிலையில் உள்ளனர்.



http://thatstamil.oneindia.in/news/2011/06/28/28-jasmine-price-decrease-aid0128.html

சனல் 4 தொலைக்காட்சிக்கு எதிராக புலம்பெயர் சிங்களவர்கள் 100 மில்லியன் டொலர்கள் நஷ்டஈடு கோரி வழக்கு!

நூறு மில்லியன் டொலர்கள் நஷ்டஈடு கோரி சனல்4 தொலைக்காட்சிக்கு எதிராக மூன்று நாடுகளில் இயங்கும் புலம்பெயர் சிங்களவர் அமைப்புகள் வழக்குத் தாக்கல் செய்யவுள்ளதாக அறிவித்துள்ளன.கண்கண்ட சாட்சிகள் யாருமின்றி, சனல்4 தொலைக்காட்சியானது போர்க்குற்றங்கள் தொடர்பான போலிக் காணொளிகளை வெளியிட்டு இலங்கையர்களுக்கு அவமானத்தை உண்டுபண்ணியதாக குற்றம் சாட்டியே பிரஸ்தாப வழக்குத் தொடரப்படவுள்ளது.
அவுஸ்திரேலியா, கனடா, சுவிட்சர்லாந்து ஆகிய நாடுகளில் இயங்கும் புலம்பெயர் சிங்களவர் அமைப்புகள் மூன்று ஒன்றிணைந்தே பிரிட்டன் நீதிமன்றத்தில் பிரஸ்தாப வழக்கைத் தாக்கல் செய்யவுள்ளன. அதன் பிரதிவாதிகளாக சனல்4 தொலைக்காட்சி சேவையின் ஜோன் ஸ்னோ மற்றும் காணொளியின் தயாரிப்பாளர் கெல்லம் மக்ரே ஆகியோர் குறிப்பிடப்பட்டுள்ளனர். சனல்4 தொலைக்காட்சி சேவையானது போலியான காணொளியொன்றை ஒளிபரப்பியமை, அவர்களுடைய நிகழ்ச்சியில் தெரிவிக்கப்பட்ட குற்றச்சாட்டுகளுக்கு கண்கண்ட சாட்சிகள் யாரும் இல்லாமை, மற்றும் விடுதலைப்புலிகள் மேற்கொண்ட போர்க்குற்றங்களை மறைக்கத் துணை புரிந்தமை ஆகியனவே சனல்4 வுக்கு எதிராக முன்வைக்கப்பட்டுள்ள குற்றச்சாட்டுகளாகும்.

வழக்கில் வாதிகள் தரப்பில் ஐந்து வழக்கறிஞர்கள் நீதிமன்றத்தில் ஆஜராகவுள்ளனர்.

இதற்கிடையே சனல்4 காணொளி தொடர்பில் தன்னுடன் பகிரங்க விவாதமொன்றுக்கு வருமாறு மேஜர் ஜெனரல் சவேந்திர சில்வா விடுத்த சவாலை சனல்4 தொலைக்காட்சியின் நிகழ்ச்சித் தயாரிப்பாளர் கெல்லம் மக்ரே அல்லது அம்னெஸ்டி இன்டர்நெசனல் அமைப்பு ஏற்றுக் கொள்ளவில்லை என்று தெரிய வருகின்றது.

மேஜர் ஜெனரல் சவேந்திர சில்வா தனது சவாலுக்கு 48 மணிநேரத்துக்குள் பதிலளிக்குமாறு கோரியிருந்ததடன், பிரஸ்தாப 48 மணிநேரம் நேற்றுடன் முடிவடைந்த நிலையிலும் அச்சவால் கெல்லம் மக்ரே மற்றும் சர்வதேச மன்னிப்புச் சபை என்பவற்றால் ஏற்றுக் கொள்ளப்படவில்லை என்று தெரிய வந்துள்ளது.

சென்னை- நாகர்கோவில் அரசு விரைவுப் பேருந்தில் தீ: 36 பயணிகள் உயிர்தப்பினர்

நாலாட்டின்புதூர்: சென்னையில் இருந்து நாகர்கோவிலுக்குச் சென்ற தமிழ்நாடு அரசு விரைவு போக்குவரத்து கழக பேருந்து ஒன்று திடீர் என்று தீப்பிடித்தது. அதில் இருந்த 36 பயணிகள் அதிர்ஷ்டவசமாக உயிர்தப்பினர்.

தமிழ்நாடு அரசு விரைவு போக்குவரத்து கழக பேருந்து ஒன்று நேற்று மாலை சென்னையில் இருந்து நாகர்கோவிலுக்கு புறப்பட்டது. 36 பயணிகள் இருந்த அந்த பேருந்தை சாலமோன் என்பவர் ஓட்டிச் சென்றார்.

அந்த பேருந்து இன்று அதிகாலை கோவில்பட்டி அருகே உள்ள தோட்டிலோன்பட்டி தேசிய நெடுஞ்சாலையில் சென்று கொண்டிருந்தது. அப்போது ஏதோ கருகும் வாசனை வருவதாக உணர்ந்த டிரைவர் பேருந்தை நிறுத்தினார்.

கீழே இறங்கிச் சென்று பார்த்தபோது பேருந்தின் பின் டயர்களுக்கு நடுவே தீப்பிடித்து எரிந்து கொண்டிருந்தது. உடனே டிரைவர் பயணிகள் அனைவரையும் பேருந்தில் இருந்து கீழே இறங்கச் செய்தார். இது குறித்து கோவில்பட்டி தீயணைப்பு நிலையத்திற்கு தகவல் கொடுக்கப்பட்டது.

விரைந்து வந்த தீயணைப்பு வீரர்கள் தீயை அணைத்தனர். 36 பயணிகளும் அதிர்ஷ்டவசமாக உயிர் தப்பினர். அவர்கள் வேறு பேருந்து மூலம் நாகர்கோவிலுக்கு அனுப்பி வைக்கப்பட்டனர். இதனால் இன்று அதிகாலை கோவில்பட்டியில் பரபரப்பு ஏற்பட்டது.
http://thatstamil.oneindia.in/news/2011/06/28/tn-govt-bus-caught-fire-36-passengers-escaped-aid0128.html

மு.க.ஸ்டாலினைப் பார்த்ததும் கதறி அழுதார் கனிமொழி

டெல்லி: திஹார் சிறைக்கு தன்னைப் பார்க்க வந்த அண்ணன் மு.க.ஸ்டாலினைப் பார்த்ததும் கதறி அழுதுள்ளார் கனிமொழி. அவருக்கு ஆறுதல் கூறி பேசினார் ஸ்டாலின்.

2வது முறையாக நேற்று கனிமொழியை சந்தித்தார் ஸ்டாலின். நேற்று மாலை 4 மணிக்கு சிறையில் கனிமொழியை அவர் சந்தித்தார். சுமார் அரை மணி நேரம் இந்த சந்திப்பு நீடித்தது.

கனிமொழியைப் பார்ப்பதற்காக சிறையின் உதவி கண்காணிப்பாளர் அறைக்கு வந்தார் ஸ்டாலின். அங்கு அண்ணனைப் பார்த்த கனிமொழி உடனே உடைந்து போய் அழுது விட்டார்.

அவரை சமாதானப்படுத்திய ஸ்டாலின் தட்டிக் கொடுத்து ஆறுதல் படுத்தினார். பின்னர் ஸ்டாலின் பேச அதை அமைதியாக கேட்டபடி இருந்தார் கனிமொழி. பின்னர் மனதை தேற்றிக் கொண்டு அவரும் பேசினார். இருவரும் தமிழில் பேசியதாக தகவல்கள் கூறுகின்றன.

கனிமொழியை சந்தித்துப் பேசிய பின்னர் அவரிடமிருந்து விடை பெற்றுக் கொண்டு கிளம்பிய ஸ்டாலின், முன்னாள் அமைச்சர் ராசா மற்றும் சரத்குமார் ரெட்டி ஆகியோரையும் சந்தித்துப் பேசினார்.

http://thatstamil.oneindia.in/news/2011/06/28/kanimozhi-breaks-down-on-seeing-brother-stalin-tihar-aid0091.html

கனிமொழிக்கு ஸ்டாலின் நேரில் ஆறுதல்: திகார் சிறையில் உருக்கமான சந்திப்பு

புதுடில்லி:திகார் சிறையில் அடைக்கப்பட்டிருக்கும் கனிமொழியை, முன்னாள் துணை முதல்வர் ஸ்டாலின் நேரில் சந்தித்து ஆறுதல் தெரிவித்தார். அதோடு ராஜா மற்றும் சரத்குமார் ரெட்டி ஆகியோரையும் சந்தித்து ஆறுதல் கூறினார். தி.மு.க., தலைவர் கருணாநிதி திகார் சிறைக்கு வந்து சென்ற ஒரே வாரத்தில், ஸ்டாலினும் வந்து கனிமொழிக்கு ஆறுதல் கூறியிருப்பது குறிப்பிடத்தக்கது.

ஸ்பெக்ட்ரம் ஊழல் வழக்கில், தி.மு.க.,வின் முன்னணி பிரமுகர்களான கனிமொழியும், ராஜாவும் சிக்கி கைதாகியுள்ளனர். இவர்களோடு சேர்ந்து, கலைஞர் "டிவி'யின் நிர்வாகி சரத்குமார் ரெட்டியும் கைதாகியுள்ளார். இவர்கள் மூன்று பேருமே டில்லியில் உள்ள திகார் சிறையில் அடைக்கப்பட்டுள்ளனர்.கடந்த ஜூன் மாதம் முதல் வாரம் வரை, வழக்கு விசாரணைக்காக டில்லி பாட்டியாலா இல்லத்தில் உள்ள சி.பி.ஐ., கோர்ட்டிற்கு இவர்கள் தினந்தோறும் போலீஸ் வேனில் ஏற்றிக் கொண்டு வரப்பட்டு, மாலையில் சிறைக்கு திருப்பி அனுப்பப்பட்டனர்.தினந்தோறும், நீதிபதி ஓ.பி.சைனி முன் ஆஜராகும் போது, கோர்ட் அறையில் போடப்பட்டிருக்கும் நாற்காலிகளில் அமர்ந்து அனைவரும் பேசிக்கொண்டிருப்பர். பின், மதிய உணவு இடைவேளையின்போது உணவருந்திவிட்டு மீண்டும் பேசியபடி இருப்பர். மாலையில் வேனில் ஏறி சிறைக்கு சென்றுவிடுவர்.

இதனால், தினந்தோறும், ஒரு "கெட் டு கெதர்' போல அமையும் இந்த சந்திப்புகளால், பெரிய அளவில் தனிமைச் சுமை தெரியாமல் இருந்தது. தவிர, தினந்தோறும் பகல்வேளைகளில் கோர்ட்டிற்கு வந்துவிடுவதால், கோர்ட்டில் உள்ள, "ஏசி' அறையில் உள்ளேயே அமர்ந்தும் இருப்பதால் வெயிலின் கொடுமை பெரியதாக பாதிக்கவில்லை.ஆனால், கோர்ட்டிற்கு கோடைகால விடுமுறை விடப்பட்டதில் இருந்து இவர்கள் யாரும் கோர்ட்டிற்கு அழைத்து வரப்படாமல் சிறையிலேயே உள்ளனர். கோடை விடுமுறை முடிந்து, வரும் ஜூலை 4ம் தேதி தான் மீண்டும் கோர்ட்டுகள் திறக்கப்படவுள்ளன. அதுவரை சிறையிலேயே இருந்து வருவதால் தனிமைச் சுமையும், சுகாதார வசதியின்மையும், வெயில் கொடுமையும் ஆட்டிப்படைப்பதாக கூறப்படுகிறது.

இந்த சூழ்நிலையில்தான் மகளை பார்த்து நேரில் ஆறுதல் தெரிவிக்க நினைத்து கடந்த 21ம் தேதி முன்னாள் முதல்வரும், தி.மு.க., தலைவருமான கருணாநிதி, டில்லிக்கு வந்தார். சிறையில் அடைக்கப்பட்டவுடன் ஏற்கனவே ஒரு முறை வந்து பார்த்துவிட்டுச் சென்ற கருணாநிதி, சுப்ரீம் கோர்ட்டில் ஜாமின் மறுக்கப்பட்டவுடன் இரண்டாம் முறையாக கனிமொழியை நேரில் பார்க்க வந்திருந்தார். தன் கருப்புக் கண்ணாடியை கழற்றிவிட்டு, தாரை தாரையாக கண்ணீர் விட்டு கலங்கிய கருணாநிதி, கனிமொழிக்கு தைரியமும், நம்பிக்கையும், ஆறுதலையும் அளித்துவிட்டு சென்னைக்கு திரும்பினார்.இந்த சூழ்நிலையில், முன்னாள் துணை முதல்வர் ஸ்டாலின், டில்லிக்கு வந்திருந்தார். நேற்று காலை சென்னையிலிருந்து விமானம் மூலம் டில்லிக்கு வந்து சேர்ந்த ஸ்டாலின், நேராக நட்சத்திர சொகுசு ஓட்டலுக்கு சென்று தங்கினார். டில்லி புதிய தமிழ்நாடு இல்லத்திற்கு அருகிலேயே உள்ள லீலா கெப்பின்ஸ்கி என்ற ஓட்டலில் தங்கினார். தன் தந்தையான கருணாநிதி தங்கியிருந்த அதே ஓட்டலில் தங்கிய ஸ்டாலினும், மீடியாக்களை சந்திக்கவில்லை. கருணாநிதி விசிட்டின்போது மீடியாக்களுக்கு எப்படி அதிரடியாக அனுமதி மறுக்கப்பட்டதோ, அதுபோலவே நேற்று ஸ்டாலின் தங்கியிருந்தபோதும் மீடியாக்கள் விரட்டப்பட்டன.

நாள் முழுவதும் ஓட்டலில் தங்கியிருந்தபோது, ஸ்டாலினை முக்கிய தலைவர்களோ, பிரமுகர்களோ சந்திக்கவில்லை. கட்சியினர் மட்டுமே உடன் இருந்தனர். பின், மாலை 4 மணிக்கு ஓட்டலைவிட்டு கார் மூலம் திகார் சிறைக்கு ஸ்டாலின் விரைந்தார். அவருடன், டி.ஆர்.பாலு, விஜயன், சுகவனம் ஆகியோரும் சென்றனர்.கனிமொழி அடைக்கப்பட்டிருக்கும் பெண்கள் சிறையான, 6ம் நம்பர் சிறைக்கு ஸ்டாலின் கார் உள்ளே சென்று நின்றது. அப்போது கனிமொழியை சந்தித்துவிட்டு திரும்பிய, ராஜாவின் மனைவியான பரமேஸ்வரியை வழியிலேயே ஸ்டாலின் சந்தித்து சில நிமிடங்கள் பேசினார்.பின், உள்ளே சென்று கனிமொழியை சந்தித்து ஸ்டாலின் ஆறுதல் கூறினார். சரியாக மாலை, 4.50 முதல், 5.20 மணிவரை அரைமணி நேரம் இந்த சந்திப்பு நீடித்தது. இந்த சந்திப்பை முடித்துக் கொண்டு, 4ம் நம்பர் சிறைக்கு ஸ்டாலின் விரைந்தார். அங்கு அடைக்கப்பட்டிருக்கும் கலைஞர் "டிவி' நிர்வாகியான சரத்குமார் ரெட்டியை சந்தித்து, பத்து நிமிடங்கள் பேசி ஆறுதல் கூறினார்.

அதன் பிறகு ஒன்றாம் எண் சிறைக்கு விரைந்த ஸ்டாலின், அங்கு அடைக்கப்பட்டிருந்த முன்னாள் அமைச்சர் ராஜாவையும் சந்தித்துப் பேசினார். சில நிமிடங்கள் அவரோடு பேசி ஆறுதல் தெரிவித்து விட்டு வெளியில் வந்தார். சிறையை விட்டு வெளியில் வந்த பின், காரில் கிளம்பிய ஸ்டாலின், நேராக விமான நிலையத்திற்கு விரைந்தார். அங்கு, 8 மணி இண்டியன் ஏர்லைன்ஸ் விமானம் மூலம் சென்னைக்கு இரவே திரும்பினார்.


http://www.dinamalar.com/News_Detail.asp?Id=265426

திங்கள், 27 ஜூன், 2011

தேசிய அரசியலில் நுழையும் எண்ணமில்லை: முதல்வர் ஜெயலலிதா

சென்னை: தேசிய அரசியலில் நுழையும் எண்ணமில்லை எனவும், தேசிய அளவில் 3வது அணி அமையுமா என்பதை எதிர்காலம் என்ன செய்கிறது என்பதை பொறுத்திருந்து பார்க்க வேண்டும் என முதல்வர் ஜெயலலிதா கூறியுள்ளார்.இது தொடர்பாக பேட்டியளித்த முதல்வர் ஜெயலலிதா, காங்கிரசுக்கு ஆதரவளிப்பேன் என கடந்த 2010ம் ஆண்டு கூறினேன். 2010க்கு பிறகு சூழ்நிலைகள் மாறிவிட்டன. தி.மு.க.,வுடன் காங்கிரஸ் தொடர்ந்து கூட்டியில் உள்ளது.என்னுடைய ஆதரவை ஏன் ஏற்கவில்லை என காங்கிரஸ் கட்சியிடம் தான் கேட்க வேண்டும். ஆதரவளிப்பது என்பது அப்போது எடுக்கப்பட்ட முடிவு. தற்போது அது போன்ற சூழல் நிலவவில்லை. ஊழல்வாதிகளுக்கு எதிராக பிரதமர் நடவடிக்கை எடுக்க வேண்டும். ஊழல் அமைச்சர்களுக்கு எதிராக பிரதமரின் நடவடிக்கை தேவை. தயாநிதி பதவி விலக வேண்டும் என நான் கூறியுள்ளேன். தயாநிதி பதவி நீக்கப்படுவாரா என பிரதமர் தான் விளக்கமளிக்க வேண்டும்.தேர்தலில் மோசடி செய்து சிதம்பரம் வெற்றி பெற்றுள்ளார். சிதம்பரம் தேர்தலில் தோல்வியடைந்தது தான் உண்மை. அடுத்த தேர்தலுக்குள் கூட்டணியில் மாற்றங்கள் ஏற்படலாம். இது குறித்து தற்போது எதுவும் கூற முடியாது. அரசியலில் எதுவும் நிகழலாம். மாற்றம் என்பதே அரசியலில் சூத்திரமாக உள்ளது. அரசியலில் ஒருவர் நெகிழ்ந்து கொடுக்க வேண்டும். அரசியலில் இது போன்ற சூழ்நிலைகள் ஏற்படும் போது அதனை சமாளிக்கும் திறன் எங்களுக்கு உள்ளது. அனைத்து அரசியல் கட்சிகளிலும் எனக்கு நண்பர்கள் உள்ளனர். 3வது அணி அமையும் என்பதைஎதிர்காலம் என்ன சொல்கிறது என்பதை பொறுத்திருந்து பார்க்க வேண்டும். லோக்பால் மசோதாவில் பிரதமரை சேர்க்க தேவையில்லை. ஒரு கட்சி ஆட்சி என்பது முடிந்து விட்டது. கூட்டணி கட்சிகள் இல்லாமல் எந்த கட்சியும் நீண்ட நாட்கள் ஆட்சி நடத்த முடியாது. தேசிய அரசியலில் நுழையும் எண்ணமில்லை தேசிய அரசியல் குறித்த குறிக்கோள் எதுவும் இல்லை. எதிர்கால இந்தியா குறித்த எண்ணம் எனக்கு உண்டு. என்னை பற்றி இல்லை என கூறினார்.

http://www.dinamalar.com/News_Detail.asp?Id=265161

சிறிலங்காவினைக் காப்பாற்றுவதற்கு ரஷ்யா, சீனாவால் முடியும்

ஐ.நாவின் பாதுகாப்புச் சபையில் சிறிலங்காவிற்கு எதிராகக் கொண்டுவரப்படக்கூடிய எத்தகைய நடவடிக்கையிலுமிருந்து சிறிலங்காவினைக் காப்பாற்றுவதற்கு ஜின்ரோ மற்றும் டிமிற்ரி மெட்வெடேவ் [Jintao and Medvedev] ஆகியோரால் முடியும். அனைத்துலக அரங்கில் சத்தமில்லாத ஆதரவினை வழங்குவதற்கு இந்தியா தயாராகவே இருக்கிறது.

இவ்வாறு இந்திய ஊடகமான Hindustan Times செய்தியாளர் Sutirtho Patranobis எழுதியுள்ள தனது செய்தி ஆய்வில் தெரிவித்துள்ளார். அதனை 'புதினப்பலகை'க்காக [www.puthinappalakai.com] மொழியாக்கம் செய்தவர் தி.வண்ணமதி.

ரசியாவின் சென் ஸ்பீட்டர்பேஸ்க் பகுதியில் கடந்த வாரம் இடம்பெற்ற பொருளாதாரம்சார் கலந்துரையாடலொன்றில் தனது நண்பர்களான யூ ஜின்ரோ மற்றும் டிமிற்ரி மெட்வெடேவ் ஆகியோரை சிறிலங்காவினது அதிபர் மகிந்த ராஜபக்ச சந்தித்தபின்னர் அவர் தற்போது தைரியத்துடன் இருக்கக்கூடும்.

வழமையான வெள்ளைநிற சட்டையினையும் சிவப்பு நிற துண்டையும் அணிந்திருக்கும் ராஜபக்ச அண்மைய காலங்களில் சற்றே கோபமுற்றிருந்தமைக்கு அவரை எவரும் குறைகூறமுடியாது.

குறிப்பாகக் கடந்த மூன்றுமாத காலத்தினை நோக்குமிடத்து, அதிபர் ராஜபக்ச திடமான மனதினைக்கொண்ட ஒருவர் என்ற தனது பெயரைத் தக்கவைத்துக்கொள்வதற்கு அவர் பாடாயப் படுகிறார்.

இடம்பெற்றதாகக் கூறப்படும் மனித உரிமை மீறல்களின் விளைவாக இராசதந்திர ரீதியில் ஒரு மூலையில் ஒதுக்கப்பட்டிருக்கும் ராஜபக்ச பலம்பொருந்திய இதுபோன்ற தனது நண்பர்களைச் சந்திப்பதன் ஊடாக இந்த இருள்சூழ்ந்த இந்த நிலைமையிலிருந்து விடுபட முனைகிறார்.

முதலில் ஏப்பிரலில் ஐ.நா வல்லுநர்கள் குழுவின் அறிக்கை வெளிவந்து தலையிடியினைக் கொடுத்தது, தொடர்ந்து மேயில் ஐ.நாவின் சிறிலங்காவிற்கான முன்னாள் பேச்சாளர் கோர்டன் வைசினது 'சிறைக்கூண்டு' என்ற புத்தகம் வெளிவந்தது.

இதன்பின்னர் இப்போது யூனில் சனல் -4 தொலைக்காட்சியின் சிறிலங்காவினது கொலைக்களம் என்ற ஆவணப்படம் சிறிலங்காவிற்கு என்றுமில்லாத தலையிடியினை ஏற்படுத்தியிருக்கிறது.

போரின் இறுதிநாட்களில் பொதுமக்களை இலக்குவைத்து சிறிலங்கா இராணுவத்தினர் வேண்டுமென்றே தாக்குதல் நடாத்தி ஆயிரக்கணக்கானவர்களைக் கொலைசெய்ததாக இந்த மூன்றுமே சிறிலங்கா அரசாங்கத்தின் மீது குற்றம் சுமத்துகிறது.

போர்க் குற்றங்கள் தொடர்பான 'நம்பத்தகுந்த குற்றச்சாட்டுக்கள்' பற்றி ஐ.நா அறிக்கை ஆராயும் அதேநேரம் சனல்-4 தொலைக்காட்சியின் ஆவணப்படத்தில் படைத்துறைப் பாணியில் அமைந்த, கையடக்கத்தொலைபேசிகளில் பதியப்பட்ட, கைதிகள் சுட்டுக்கொல்லப்படும் காட்சிகளும் முறைகேட்டிற்கு உட்படுத்தப்பட்டபின்னர் சுட்டுக்கொல்லப்பட்ட ஆடைகள் களையப்பட்ட பெண்களின் உடலங்கள் உளவூர்தியில் ஏற்றப்படும் காட்சிகளும் உள்ளடக்கப்பட்டிருக்கின்றன.

பாதுகாப்பு வலயங்கள் மற்றும் மருத்துவமனைகளை இலக்குவைத்து சிறிலங்கா அரச படையினர் மேற்கொண்ட சரமாரியான ஆட்லறி எறிகணைத் தாக்குதல்கள், திட்டமிட்ட பாலியல் வல்லுறவுகள் மற்றும் முறைகேடுகள், உணவு மற்றும் மருந்து உள்ளிட்ட அத்தியாவசியப் பொருட்கள் மறுக்கப்பட்டமை தொடர்பாக இந்த 50 நிமிட ஆவணப்படத்தில் ஆராயப்படுகிறது. இந்தக் குற்றச்சாட்டுக்களுக்கு வலுச்சேர்க்கும் வகையிலான பல அநாமதேய நேர்காணல்களும் இதில் உள்ளடக்கப்பட்டிருக்கின்றன.

குறித்த இந்த ஆவணப்படத்தில் இறுதிப்பகுதிதான் அதிக குழப்பம் தருவதாக அமைகிறது. கைகள் கட்டப்பட்ட நிலையில் ஆடைகள் களையப்பட்ட ஆண்களும் பெண்களும் சுட்டுக்கொல்லப்படும் காட்சிகள், இறந்தவர்கள் தொடர்பாக படையினர் கேவலமாகப் பகிடிவிடும் காட்சிகள் இதில் உள்ளடக்கப்பட்டிருக்கின்றன.

இறந்துகிடக்கும் ஒரு பெண்ணின் உடலைக் காட்டி "இவள் யாரோ ஒருவரது செயலாளராக இருக்கவேண்டும். அதுதான் ஏராளம் பேனைகளையும் பென்சில்களையும் வைத்திருக்கிறாள்" என ஏளனப் புன்னகையுடன் சிங்களத்தில் கூறுகிறான் ஒரு படையினன்.

ஒரு மணி நேரம் கொண்ட இந்த ஆவணப்படத்தினை யூன் 03ஆம் நாளன்று சனல்-4 தொலைக்காட்சி ஐ.நாவில் திரையிட்டிருந்தது.

இந்த ஆவணப்படம் தொடர்பாக ஐ.நாவின் நீதிக்குப்புறம்பான கொலைகளுக்கான சிறப்பு விசாரணையாளர் கிறிஸ்ரொப் கெய்ன்ஸ் ஏ.வ்.பி செய்திச்சேவையிடம் கருத்துத் தெரிவிக்கையில், "இதுபோல மக்கள் கொல்லப்படும்போது எடுக்கப்படும் காட்சிகள் கிடைப்பது மிகவும் அரிது. குற்றம்புரிந்தவர்களே நினைவுச்சின்னமாகப் பேணுவதற்காக எடுத்த படங்கள் இவை" என்கிறார் கெய்ன்ஸ்.

2009ம் ஆண்டு போரின் இறுதி நாட்களில் "போர்க் குற்றங்கள் இடம்பெற்றதை இந்தப் படங்கள் உறுதிப்படுத்துகின்றன" என அவர் மேலும் தெரிவித்தார்.

பாதுகாப்பு வலயப் பகுதியாகப் பிரகடனப்படுத்தப்பட்ட பகுதிகளில் பல நூற்றுக்கணக்கான எறிகணைகள் வீழ்ந்து வெடித்ததாகவும் பொதுமக்கள் தயவு தாட்சண்ணமின்றி தாக்குதலுக்கு உள்ளானதாகவும் தனது நண்பர்கள் கூறியதாக 2009ம் ஆண்டினது முதல்பகுதியில் கொழும்புக்கான ஐ.நாவின் முன்னாள் பேச்சாளராக இருந்த 'சிறைக்கூண்டு' என்ற புத்தகத்தின் எழுத்தாளரான கோர்டன் வைஸ் கூறுகிறார்.

பொதுமக்களை வேண்டுமென்றே இலக்குவைத்துத் தாக்குதல்களை நடாத்தியமை, கட்டாய ஆட்திரட்டலை மேற்கொண்டமை உள்ளிட்ட மோசமான போர்க் குற்றங்களில் விடுதலைப் புலிகளும் ஈடுபட்டார்கள் எனக் குற்றம் சுமத்தப்படுகிறது.

ஆனால் எதிர்பார்க்கப்பட்டதுபோலவே சனநாயக ரீதியில் தேர்ந்தெடுக்கப்பட்ட கொழும்பு அரசாங்கத்தின் மீது அதிக குற்றச்சாட்டுக்கள் முன்வைக்கப்படுகின்றன.

இங்கு மிக மோசமான விடயம் யாதெனில், பாதுகாப்பு வலயம் என்ற ஒன்றைப் பிரகடனப்படுத்திய சிறிலங்கா இராணுவத்தினர் பொதுமக்களை அந்தப் பகுதிகளுக்குள் செல்லுமாறும் அவர்களது பாதுகாப்பு உறுதிப்படுமென்றும் அறிவித்திருந்தனர்.

ஆனால் தங்களது வாக்குறுதிகளுக்கு எதிராகச் செயற்பட்ட அரச படையினர் பொதுமக்கள் செறிந்திருந்த பாதுகாப்பு வலயப் பகுதிகளை இலக்குவைத்து சரமாரியான எறிகணைத் தாக்குதல்களை மேற்கொண்டிருக்கிறார்கள்.

"வன்னி மக்களே: வன்னியில் விடுதலைப் புலிகளின் இரக்கமற்ற பயங்கரவாதச் செயற்பாடுகளினால் கடும் துன்பத்திற்கு முகம்கொடுத்திற்கும் மக்களை விடுவிக்கும் வகையில் நாங்கள் இறுதிக்கட்டப் போரை முன்னெடுத்திருக்கிறோம்... இந்தப் போரில் மனித இழப்புக்களைத் தவிர்ப்பதற்காக சிறிலங்கா அரசாங்கத்தினராகிய நாங்கள் எங்களால் முடிந்த நடவடிக்கைகளை முன்னெடுக்கின்றோம். ... ஆதலினால் எங்களது அன்புக்குரிய தமிழர்களே இடம்பெறப்போகும் இந்தப் பேரனர்த்தத்திலிருந்து உங்களைப் பாதுகாப்பதற்காக உடனடியாக அரசாங்கத்தினால் விடுவிக்கப்பட்ட பகுதிகளுக்கு வந்துசேருமாறு கோருகிறோம்" என ஓகஸ்ட் 2008ல் கிளிநொச்சியில் சிறிலங்கா விமானப்படையினரினால் வீசப்பட்ட துண்டுப்பிரசுரங்களில் குறிப்பிடப்பட்டிருப்பதாக ஐ.நா அறிக்கையொன்று கூறுகிறது.

சிறிலங்கா அரச படையினருக்கு எதிரான போர்க்குற்றச்சாட்டுக்கள் அனைத்துலக ரீதியில் பரவலாக முன்வைக்கப்பட்ட வேளையிலும்கூட "பொதுமக்களை எவருக்கும் எந்தவிதமான பாதிப்பும் ஏற்படாதவகையில் பயங்கரவாத அமைப்பொன்றை இல்லைதொழிப்பதற்கான அடிப்படைகள்" என்ன என்ற தனது அனுபவத்தினை இதர நாடுகளுக்கு எடுத்துவிளக்கும் வகையில் கருத்தரங்கு ஒன்றைச் சிறிலங்கா இராணுவத்தினர் பெருமையுடன் ஒழுங்குசெய்திருந்தார்கள்.

குறித்த ஒரு சம்பவத்தினை சிறிலங்கா அரச படையினர் ஒரு விதமாகவும் ஐ.நா அறிக்கையும் 'சிறைக்கூண்டு' என்ற புத்தகமும் வேறுவிதமாகவும் விபரிப்பது விநோதமானது.

கொழும்பில் இடம்பெற்ற சிறிலங்கா இராணுவத்தினரின் கருத்தமர்வில் சிறிலங்கா இராணுவத் தளபதியும் போரின் இறுதி நாட்களில் இராணுவத்தின் முதன்மையான படைப்பிரிவு ஒன்றை வழிநடத்தியவருமான மேஜனர் ஜெனரல் சவேந்திர சில்வா கருத்துரைத்திருந்தார்.

தங்களது தோல்வி தவிர்க்கமுடியாத ஒன்று என்றாகிவிட்ட நிலையில் விடுதலைப் புலிகள் பொதுமக்களை மனிதக் கேடயங்களாகப் பயன்படுத்தினார்கள் என விபரித்த சவேந்திர சில்வா இராணுவத்தினரது செயற்பாடுகளைப் புகழ்ந்து தள்ளினார்.

"பொதுமக்களின் பாதுகாப்பினைக் கருத்திற்கொண்டு பாதுகாப்பு வலயம் எனப் பிரகடனப்படுத்தப்பட்ட பகுதியில் கனரக ஆயுதங்களை நிலைப்படுத்தி படையினர் மீது தாக்குதல் நடாத்தியதன் ஊடாகப் பொதுமக்களை புலிகள் மனிதக் கேடயமாகப் பயன்படுத்தினர். பொதுமக்களது கூடாரங்கள் அமைந்திருந்த பகுதிகளுக்கு நடுவாகவே புலிகள் தங்களது தற்காப்பு நிலைகளை அமைத்திருந்ததை அவதானிக்கமுடிந்தது. உடையார்கட்டு மற்றும் வள்ளிபுனம் பகுதிகளில் அமைந்திருந்த தற்காலிக மருத்துவமனைகள், உடையார்கட்டில் அமைந்திருந்த அனைத்துலக செஞ்சிலுவைக் குழுவின் அலுவலகம், புதுக்குடியிருப்பு பகுதியில் அமைந்திருந்த ஐ.நா வளாகம் ஆகியவற்றுக்கு அருகாகவும் விடுதலைப் புலிகள் தங்களது கனரக ஆயுதங்களை நிலைப்படுத்தியிருந்தனர்" என சவேந்திர சில்வா தொடர்ந்தார்.

தற்போது இதே சம்பவங்கள் தொடர்பான ஐ.நாவின் தகவலைப் பார்ப்போம். "சனவரி 19 மற்றும் 21 ஆகிய நாட்களில் வள்ளிபுனம் பகுதியில் அமைக்கப்பட்டிருந்த தற்காலிக மருத்துவமனையில் சிறிலங்கா இராணுவத்தினர் ஏவிய எறிகணைகள் வீழ்ந்து வெடித்தமையினால் நோயாளர்கள் பலர் காயமடைந்தனர். வன்னிப் பகுதியில் இடம்பெற்ற போரின்போது தற்காலிக மருத்துவமனைகளாக இருக்கலாம் அன்றி நிரந்தர மருத்துவமனைகளாக இருக்கலாம் அனைத்துமே படையினரின் ஆட்லறித் தாக்குதலுக்கு உள்ளாகியிருந்தன. குறிப்பாக காயமடைந்த விடுதலைப் புலிகளின் உறுப்பினர்களையும் கொண்டிருந்த மருத்துவமனைகள் மீண்டும் மீண்டும் தாக்குதலுக்கு உள்ளாகின" என ஐ.நா வல்லுநர்கள் குழுவின் அறிக்கை விபரிக்கிறது.

ஐ.நா வல்லுநர்கள் குழுவின் அறிக்கைக்கு அரசாங்கத்தின் பதில் எதிர்பார்க்கப்பட்டதுபோலவே இருந்தது: ஐ.நா அறிக்கையானது 'அடிப்படையில் அர்த்தமற்றது' அத்துடன் இந்த அறிக்கை 'போலியானது'. புலம்பெயர் தமிழர்களின் சார்பில் தயாரிக்கப்பட்ட அறிக்கையிது. குறித்த இந்த ஆவணத்தின் மோசமான உள்ளடக்கங்கள், அரசாங்கம் முன்னெடுத்துவரும் போருக்குப் பின்னான நல்லிணகத்தில் எந்தவிதமான பாதிப்பினையும் ஏற்படுத்திவிடப்போவதில்லை. சிறிலங்காவிலுள்ள பலதரப்பட்ட சமூகங்கள் மத்தியில் வெறுப்புணர்வினை விதைப்பதற்கே இந்த அறிக்கை துணைநிற்கும் எனச் சிறிலங்கா அரசாங்கம் ஐ.நா வல்லுநர்கள் குழுவின் அறிக்கை தொடர்பாகக் கருத்துரைத்திருந்தது.

பிரித்தானியாவிலிருந்து ஒளிபரப்பாகும் சனல்-4 தொலைக்காட்சியின் ஆவணப்படம் தொடர்பாக அரசாங்கம் சட்ட நடவடிக்கை எதனையும் முன்னெடுக்குமா அல்லது இல்லையா எனத் தனக்குத் தெரியாது என்றும் 'ஆனால் பொருத்தமான நடவடிக்கையினை அரசாங்கம் கட்டாயம் எடுக்கும்' என்றும் சட்டமா அதிபர் மோகன் பீரிஸ் கூறுகிறார்.

இந்த மாதம் ஜெனீவாவில் இடம்பெற்ற ஐ.நா மனித உரிமைச் சபையின் கூட்டத்தொடரில் சிறிலங்காவின் வாதத்தினை வலுப்படுத்தும் நோக்கில் மோகன் பீரிஸ் கருத்துரைத்திருந்தார். சிறிலங்காவில் அமைக்கப்பட்டிருக்கும் கற்றுக்கொண்ட பாடங்கள் மற்றும் நல்லிணக்க ஆணைக்குழுவினை அங்கீகரிப்பதோடு அதன் முன்தோன்றி அனைத்துலக நிறுவனங்களும் ஊடக அமைப்புக்களும் சாட்சியமளிக்கவேண்டும் என்றும் சட்டமா அதிபர் கோரினர்.

"சிறிலங்காவிற்கு வெளியே வாழும் பிரிவினையினை விரும்பும் தரப்புகளின் நலன்களைக் கருத்திற்கொண்டு செயற்படும் ஒரு சில அனைத்துலக ஊடகங்கள் முன்னெடுக்கும் சிறிலங்காவிற்கு அபகீர்த்தி ஏற்படுத்தும் நோக்கிலமைந்த செயற்பாடுகள்தான் இவை. சிறிலங்கா ஆற்றுவதற்கு முனையும் போர் தந்த காயங்களை கிண்டிக் கிழறுவதன் ஊடாக நாட்டினை மீண்டும் மோதல் நிலைக்குத் தள்ளுவதுதான் இவர்களது இறுதி இலக்கு. நாட்டினது எதிர்காலச் சந்ததியினர் உள்ளிட்ட அனைத்துத் தரப்பினர் மத்தியில் பகைமை உணர்வினை வளர்ப்பதை நோக்காகக் கொண்டதுதான் சனல்-4 தொலைக்காட்சியின் ஆவணப்படம். தற்போது சிறிலங்காவில் முன்னெடுக்கப்பட்டுவரும் இன நல்லிணக்க முனைப்புக்களை இது பாதிக்கிறது" என சிறிலங்கா அரசாங்கம் வெளியிட்டிருக்கும் அறிக்கையில் குறிப்பிடப்பட்டிருக்கிறது.

ஆனால் இந்த வாதம் வெறும் குப்பையே என்கிறார்கள் அவதானிகள்.

"சிறிலங்காவிலுள்ள சமூகங்களின் மத்தியில் இந்த ஆவணப்படம் மேலும் பிரிவினையினை ஏற்படுத்தும் என்று நான் கருதவில்லை. இனங்களின் மத்தியில் ஏலவே ஏற்பட்டிருக்கும் இந்தப் பிளவு ஆற்றுப்படுத்தக்கூடியதே. உண்மையில் பாதிக்கப்பட்டவர்களுக்கு உதவிபுரிவதற்குப் பதிலாக அரசாங்கம் இடம்பெற்றவை அனைத்தையும் எடுத்த எடுப்பில் மறுக்கும் உபாயத்தினைக் கைக்கொள்கிறது. அத்துடன் தனக்கிருக்கும் அதிகாரங்களைப் பயன்படுத்தி சிங்கள சித்தாந்தங்களின் அடிப்படையிலமைந்த வாதங்களைத் திணிப்பதற்கும் அரசாங்கம் முனைகிறது. இவைதான் இன்று காணப்படும் பெரும் தடைகள். மேற்குறித்த இந்த எண்ணத்துடன் செயற்படும் அனைவருமே ஆவணப்படத்தின் நன்மதிப்பினைக் கெடுக்கும் வகையிலமையும் காரணங்களைத் தேடுகிறார்கள்" என்கிறார் மனித உரிமைகளுக்கான பல்கலைக்கழக ஆசிரியர்கள் (யாழ்ப்பாணம்) என்ற மனித உரிமை அமைப்பினைச் சேர்ந்த ராஜன் கூல் கூறுகிறார்.

"சிங்களவர்கள் உள்ளிட்ட பலருக்கு உண்மையில் நடந்தது என்ன என்பது நன்கு தெரியும். விடுதலைப் புலிகள் எவரையும் மனிதக் கேடயங்களாகப் பயன்படுத்தவில்லை என்றும் விடுதலைப் புலிகளுக்குக் தங்களது ஆதரவினை வழங்கிநின்ற பொதுமக்களே போரின் இறுதிநாள் வரையும் புலிகளுடன் இணைந்திருந்தார்கள் என்றும் வாதிடும் புலிகளின் பரப்புரைக்குத் துணைநின்ற அவர்களது ஆதரவாளர்களது செயற்பாடுகள் தொடர்பில் பேசவிரும்பியவர்களின் வாய்களை அடைப்பதாகவே போரின் இறுதி நாட்களில் எதுவுமே இடம்பெறவில்லை என்ற அரசாங்கத்தின் மறுப்பு அமைகிறது" என ராஜன் கூல் தொடர்ந்து தெரிவித்தார்.

இதே கருத்தினையே பத்தியாளர் திசாரனே குணசேகரவும் கொண்டிருக்கிறார். "குற்றங்கள் எதுவுமே இடம்பெறவில்லை என்ற அரசாங்கத்தின் வாதத்தில் எந்தவிதமான அர்த்தமும் இல்லை. இது வெறுமனே ஒரு சாட்டுத்தான். இனக்குழுமங்கள் மத்தியிலான பிணக்கு தொடர்ந்தும் இருக்கத்தான் செய்கிறது. போரின் இறுதி நாட்களில் உண்மையில் என்ன நடந்தது என்பது தொடர்பில் பலதரப்பட்ட மட்டங்களிலும் வெளிப்படையான கருத்துப்பரிமாற்றங்கள் இடம்பெறுவதற்கு வழிசெய்வதுதான் ஏற்பட்ட காயங்கள் ஆறுவதற்கும் சமூகங்களுக்கு இடையிலான உறவுகள் வலுப்பெறுவதற்கும் வழிசெய்யும்" என்கிறார் அவர்.

"இதுபோன்றதொரு செயல்முறைதான் காயங்கள் ஆறுவதற்கு வழிசெய்யும். இறந்துபோன தங்களது உறவுகளை எண்ணித் துன்பத்தினைப் பகிர்ந்துகொள்வதற்கான வழிவகைகள் தமிழர்களுக்குத் தேவை. இறந்துவிட்ட உறவுகளுக்காக துக்கம் செலுத்துவதுகூட முடியாதுபோகும்போது இந்த வேதனை கோபமாக மாறும். இங்கு குற்றமிழைத்தவர்கள் தண்டிக்கப்படவேண்டுமென்றல்ல. இந்தப் பிரச்சினையினை இயல்புடன் அணுகுவதுதான் காயங்கள் ஆறுவதற்கு வழிசெய்யும். தங்களது கரங்கள் தூய்மையானது என்றும் போரின்போது தாங்கள் தவறிழைக்கவில்லை என்றும் சிங்களவர்கள் வாதிடும்வரைக்கும் தமிழர்களும் தமக்கு இழைக்கப்பட்ட கொடுமைகளைக் கூறிக்கொண்டேயிருப்பார்கள். இதுபோன்ற நிலை தொடரின் இதற்கு முடிவு என்பது இருக்காது" என பத்தியாளர் குணசேகர கூறுகிறார்.

அரசாங்கத்தின் பத்திரிகைத்தணிக்கை தொடர்பாக தமக்கிருக்கும் தனிப்பட்ட அச்சுறுத்தலையும் பொருட்படுத்தாது ராஜன்கூலும் குணசேகரவும் தங்களது கருத்துக்களைப் பரிமாறியிருந்தனர். ஆனால் இதுவிடயம் தொடர்பாக மன்னார் மறைமாவட்ட ஆயர் ராஜப்பு ஜோசப்புடன் தொடர்புகொண்டு கோரியபோது அவர் பதிலெதனையும் வழங்க மறுத்துவிட்டார்.

"இதுபோலக் கருத்துரைப்பது எனக்கு ஆபத்தானது" என ஆயர் ராஜப்பு ஜோசப் பதிலளித்திருந்தார்.

கடந்த ஆண்டு கற்றுக்கொண்ட பாடங்கள் மற்றும் நல்லிணக்க ஆணைக்குழுவின் முன்னால் தோன்றிய ஆயர் ராஜப்பு ஜோசப், நாட்டினது வடக்குப் பகுதியில் வாழ்ந்துவந்த 146,000 பொதுமக்கள் காணாமற்போயிருப்பதாகவும் அவர்களுக்கு என்ன நடந்தது என்றும் அவர் கேள்வியெழுப்பியிருந்தார்.

முல்லைத்தீவு மற்றும் கிளிநொச்சி மாவட்டச் செயலகங்களால் வெளியிடப்பட்ட தகவல்களின் அடிப்படையில் ஒக்ரோபர் 2008ம் ஆண்டு வன்னியின் மொத்த சனத்தொகை 429,059 ஆக இருந்திருக்கிறது. ஐக்கிய நாடுகள் சபையினது கணக்கின்படி போர் முடிவுக்குவந்த கையோடு 282,380 பொதுமக்கள் வன்னிப்பகுதியிலிருந்து வெளியேறியிருக்கிறார்கள். எஞ்சிய 146,679 என்ன நடந்தது என வணக்கத்துக்குரிய ஆயர் ராஜப்பு ஜோசப் அவர்கள் கற்றுக்கொண்ட பாடங்கள் மற்றும் நல்லிணக் ஆணைக்குழுவிடம் கேள்வி எழுப்பியிருந்தார்.

முடிவு

சனல்-4 தொலைக்காட்சியில் சிறிலங்காவினது கொலைக்களம் என்ற ஆவணப்படம் திரையிடப்பட்ட பின்னர் இலங்கைத்தீவில் இடம்பெற்றதாகக் கூறப்படும் போர்க் குற்றங்கள் மற்றும் மனித உரிமை மீறல்கள் தொடர்பான அனைத்துலக விசாரணைகள் மேற்கொள்ளப்படவேண்டும் என்ற தனது அழைப்பினை பிரித்தானியா மீண்டும் விடுத்திருந்தது.

"கவலை தருகின்ற சம்பவங்கள் இடம்பெற்றதாகக் கூறப்படுகிறது. குறிப்பிட்ட இந்தக் குற்றச்சாட்டுக்கள் தொடர்பாக சிறிலங்கா அரசாங்கமும் ஐக்கிய நாடுகள் சபையும் விசாரணைகளை நடாத்தவேண்டிய தேவை உள்ளது. உண்மையில் நடந்தது என்ன என்பதையும் இதிலிருந்து நாங்கள் கற்றுக்கொள்ளும் பாடம்தான் என்ன என்பதையும் நாங்கள் அறியவேண்டும்" என பிரித்தானியப் பிரமர் டேவிற் கமறோன் தனது அறிக்கையில் குறிப்பிட்டிருந்தார்.

"அனைத்துலக மனித உரிமைச் சட்டங்கள் மற்றும் மனித உரிமைகள் சிறிலங்காவில் மீறப்பட்டிருப்பதை வெளிப்படுத்தும் நம்பத்தகுந்த குற்றச்சாட்டுக்கள் வெளியிடப்பட்டிருப்பது தொடர்பில் நாங்கள் அதிக கரிசனையுடன் இருக்கிறோம். அனைத்துலக மனிதாபிமான மற்றும் மனித உரிமைச் சட்டங்களை மீறும்வகையில் செயற்பட்டவர்கள் யாரோ அவர்கள் பொறுப்புச்சொல்லும் செயல்முறைக்கு உட்படுவதை நாங்கள் முழுமையாக ஆதரிக்கிறோம்" என கொழும்பிலுள்ள அமெரிக்கத் தூதரக அதிகாரி ஒருவர் கடந்த வாரம் சண்டே லீடர் பத்திரிகைக்குத் தெரிவித்திருக்கிறார்.

சிறிலங்கா மீது முன்வைக்கப்படும் இத்தகைய குற்றச்சாட்டுகளுக்கு இந்தியா இதுவரை வாய்திறந்து எந்தக் கருத்தினையும் வெளியிடவில்லை. அண்மையில் இரு நாடுகளும் வெளியிட்ட கூட்டு அறிக்கையில், மனித உரிமை மீறல்களை விசாரிக்கமாறும் அவசரகாலச் சட்டத்தினை மீளப்பபெறுமாறும் புதுடில்லி கொழும்பினைக் கோரியிருக்கிறது. ஆனால் இந்தியா குறிப்பாக எந்த விடயத்தினையும் கூறவில்லை.

அனைத்துலக நிறுவனங்களால் நாடுகள் தேர்ந்தெடுக்கப்பட்டு தாக்கப்படுவதைத் தாங்கள் விரும்பவில்லை என யூன் 11ம் நாளன்று இந்தியாவின் தேசியப் பாதுகாப்பு ஆலோசகர் சிவ் சங்கர் மேனன் குறிப்பிட்டிருந்தார்.

இதுவிடயம் தொடர்பான புதுடில்லியின் நிலைப்பாட்டினை விளக்குவது சுலபமானது. இந்தியாவினதும் சிறிலங்காவினதும் பூகோள அமைவிடத்தின் விளைவாக இரு நாடுகளுக்கும் இடையிலான கலாச்சார மற்றும் வரலாற்று ரீதியிலான தொடர்புகள் வலுவானது. ஆனால் பொருளாதார ரீதியில் சீனா சிறிலங்காவில் காலூன்றியிருப்பினும் உள்நாட்டு அரசியல் விவகாரங்களில் அதன் ஈடுபாடின்மையும் முரண்பாடுகளும் இங்கு கவனிக்கவேண்டிய விடயம்.

எது எவ்வாறிப்பினும் இடம்பெற்றதாகக் கூறப்படும் குற்றச்சாட்டுக்கள் தொடர்பான விசாரணையினை மேற்கொள்ளும் நோக்கம் எதுவும் மகிந்த அரசாங்கத்திடம் இருப்பதாகத் தெரியவில்லை. தான் ஏற்கனவே அமைத்திருக்கும் கற்றுக்கொண்ட பாடங்கள் மற்றும் நல்லிணக்க ஆணைக்குழுவின் துணையுடன் அனைத்துலக விசாரணைகள் மேற்கொள்ளப்படவேண்டும் என்ற வாதங்களைச் சிறிலங்கா முறியடிக்க முனைகிறது.

கற்றுக்கொண்ட பாடங்கள் மற்றும் நல்லிணக்க ஆணைக்குழுவானது கொள்கை ரீதியிலும் நடைமுறையிலும் முறையாகச் செயற்படவில்லை. பொறுப்புச்சொல்லும் செயன்முறையினை முன்னெடுக்கும் எந்த ஆணையும் இதற்கு இல்லை.

சுதந்திரமாகவும், பக்கச்சார்பின்னிறியும், வெளிப்படைத்தன்மையுடனும் இது செயலாற்றவில்லை. பாதிக்கப்பட்டவர்களை நடாத்துதல் மற்றும் சாட்சியங்களைப் பாதுகாக்கும் முறை ஆகிய அம்சங்களில் இந்த ஆணைக்குழுவானது அனைத்துலக தரத்திற்கு அமையச் செயற்படவில்லை'என ஐ.நா வல்லுநர்கள் குழுவின் அறிக்கை கூறுகிறது.

ஆனால் ராஜபக்சவினால் இலகுவாகத் தன்னை ஆசுவாசப்படுத்திக்கொள்ள முடியும். ஐ.நாவின் பாதுகாப்புச் சபையில் சிறிலங்காவிற்கு எதிராகக் கொண்டுவரப்படக்கூடிய எத்தகைய நடவடிக்கையிலுமிருந்து சிறிலங்காவினைக் காப்பாற்றுவதற்கு யூ ஜின்ரோ மற்றும் டிமிற்ரி மெட்வெடேவ் ஆகியோரால் முடியும். அனைத்துலக அரங்கில் சத்தமில்லாத ஆதரவினை வழங்குவதற்கு இந்தியா தயாராகவே இருக்கிறது.

போரின் இறுதி நாட்களில் கொல்லப்பட்ட சரியான எண்ணிக்கை எதுவெனத் தெரியாத பெருந்தொகையானோரின் பிரச்சினை ஒருபோதும் தீர்க்கப்படாது.

போர் தந்த இந்த வடுக்கள் ஆற்றப்படுவதற்குப் பதிலாக நீறுபூத்த நெருப்பாக அது என்றும் நெஞ்சங்களில் நிலைத்திருக்கும்.

http://www.puthinappalakai.com/view.php?20110627104158

டெல்லியில் ஸ்டாலின்-கனிமொழியை சிறையில் சந்தித்தார்

2ஜி விவகாரத்தில் கைதாகி திகார் சிறையில் இருக்கும் தனது சகோதரி கனிமொழியை இன்று சந்தித்துப் பேசினார் திமுக பொருளாளர் மு. க. ஸ்டாலின்.

2ஜ விவகாரத்தில் கனிமொழி எம்.பி.யும், கலைஞர் டிவி இயக்குனர் சரத் குமாரும் கைது செய்யப்பட்டு கடந்த 1 மாதமாக திகார் சிறையில் உள்ளனர். கருணாநிதி இரண்டு முறை திகார் சிறையில் கனிமொழியை சந்தித்தார். இந்நிலையில் திமுக பொருளாளர் மு.க. ஸ்டாலின் இன்று விமானம் மூலம் டெல்லி புறபட்டுச் சென்றார்.

டெல்லி சென்றதும் அவர் திஹார் சிறைக்குச் சென்றார். அங்கு தங்கை கனிமொழியைச் சந்தித்துப் பேசினார். ஸ்டாலினுடன் திமுக எம்.பிக்கள் டி.ஆர்.பாலு, ஏ.கே.எஸ். விஜயன் ஆகியோரும் சென்றிருந்தனர்.

இந்த சந்திப்பு உணர்ச்சிகரமாக இருந்ததாக சிறை வட்டாரத் தகவல்கள் தெரிவிக்கின்றன. ஸ்டாலின், கனிமொழி சந்திப்பு அரை மணி நேரத்திற்கும் மேல் நீடித்தது.

கனிமொழியைச் சந்தித்த பின்னர் முன்னாள் அமைச்சர் ராசா, கலைஞர் டிவி நிர்வாக இயக்குநர் சரத்குமார் ரெட்டி ஆகியோரையும் ஸ்டாலின் சந்தித்தார்.

கனிமொழி கைது செய்யப்பட்ட பின்னர் அவரை ஸ்டாலின் சந்திப்பது இது 2வது முறையாகும். ஏற்கனவே கடந்த மே மாதம் 24-ம் தேதி சிபிஐ சிறப்பு நீதிமன்றத்தில் வைத்து கனிமொழியை சந்தித்தார்.

முன்னதாக மகளைப் பார்த்துவிட்டு வந்த கருணாநிதி கனிமொழி சிறையில் உடல் வீக்கத்தாலும், கொப்பளங்களாலும் கஷ்டப்படுவதாகத் தெரிவித்திருந்தார் என்பது குறிப்பிடத்தக்கது.
http://thatstamil.oneindia.in/news/2011/06/27/m-k-stalin-leaves-delhi-likely-meet-kanimozhi-aid0128.html

தமிழக அமைச்சரவையில் மாற்றம்-புதிய அமைச்சராக முகம்மது ஜான் நியமனம்

சென்னை : தமிழக அமைச்சரவையில் இன்று சிறிய அளவிலான மாற்ற் மேற்கொள்ளபப்ட்டது. புதிய அமைச்சராக ராணிப்பேட்டை எம்.எல்.ஏ. முகம்மது ஜான் நியமிக்கப்பட்டுள்ளார். அவர் புதன்கிழமை பதவியேற்கிறார்.

முதல்வர் ஜெயலலிதா தலைமையிலான அமைச்சரவையில் சிறுபான்மையினர் நலத்துறை அமைச்சராக நியமிக்கப்பட்டவர் மரியம் பிச்சை. ஆனால் எம்.எல்.ஏவாக பதவியேற்பதற்கு முன்பாகவே அவர் சாலை விபத்தில் அகால மரணமடைந்தார்.

இந்த நிலையில் தற்போது அவரது இலாகாவுக்கு புதிய அமைச்சரை முதல்வர் ஜெயலலிதா நியமித்துள்ளார்.

ராணிப்பேட்டையிலிருந்து சட்டசபைக்குத் தேர்ந்தெடுக்கப்பட்ட முகம்மது ஜான் புதிய அமைச்சராக நியமிக்கப்பட்டுள்ளார். இவர் பிற்படுத்தப்பட்டோர் மற்றும் சிறுபான்மை நலத்துறை அமைச்சராக செயல்படுவார். புதன்கிழமையன்று இவர் பதவியேற்கிறார். அவருக்கு ஆளுநர் எஸ்.எஸ்.பர்னாலா பதவிப்பிரமாணம் செய்து வைப்பார்.

இலாகாக்கள் மாற்றம்

இதேபோல வேறு சில அமைச்சர்களின் இலாகாக்களும் மாற்றப்பட்டுள்ளன.

மு.சி.சம்பத் வசம் இருந்த ஊரக வளர்ச்சித்துறை சி.சணமுகவேலுவுக்குத் தரப்பட்டுள்ளது. எஸ்.பி. வேலுமணி வகித்து வந்த திட்ட அமலாக்கம் சம்பத்திடம் தரப்பட்டுள்ளது.

சண்முகவேலுவிடம் இருந்த தொழில்துறை எஸ்.பி.வேலுமணிக்கு தரப்பட்டுள்ளது.

கால்நடை மற்றும் பால்வளத்துறை கருப்பசாமியிடமிருந்து என்.ஆர்.சிவபதிக்கும், சிவபதியிடமிருந்த விளையாட்டு மற்றும் இளைஞர் நலன் துறை கருப்பசாமிக்கும் தரப்பட்டுள்ளது.

டி.எம்.சின்னையா சுற்றுச்சூழல் துறை மற்றும் மாசுக் கட்டுப்பாட்டுத்துறை அமைச்சராக நீடிப்பார். மரியம் பிச்சை வகித்து வந்த துறைகளை இவர்தான் இத்தனை நாட்களாக கூடுதல் பொறுப்பாக வைத்திருந்தார் என்பது குறிப்பிடத்தக்கது.
http://thatstamil.oneindia.in/news/2011/06/27/ranipet-admk-mla-mohammed-john-appointed-minister-aid0091.html

லிபிய அதிபர் மும்மர் கடாபிக்கு சர்வதேச குற்றவியல் நீதிமன்றம் கைது வாரண்ட்

லிபிய அதிபர் மும்மர் கடாபி, அவரது மகன் சைப் அல் இஸ்லாம், உளவுத்துறைத் தலைவர் அப்துல்லா அல் சனுசி ஆகியோருக்கு கைது வாரண்ட்டை பிறப்பித்துள்ளது தி ஹேக் நகரில் உள்ள சர்வதேச குற்றவியல் நீதிமன்றம்.

மனிதகுலத்திற்கு எதிரான குற்றங்களை நிகழ்த்தியதாகவும், பொதுமக்கள் மீது தாக்குதல் நடத்தி உத்தரவிட்டதாகவும் கடாபி மீது நீதிமன்றம் குற்றம் சாட்டியுள்ளது.

லிபியாவில் கடந்த பிப்ரவரி மாத மத்தியிலிருந்து பெரும் கலவரம் வெடித்தது. கடாபிக்கு எதிரான அதிருப்தியாளர்கள் படை பலத்துடன் மோதலில் குதித்ததால், அவர்களுக்கும், கடாபி ஆதரவு ராணுவத்தினருக்கும் இடையே மோதல் உக்கிரமடைந்தது. இதில் சிக்கி இதுவரை பல ஆயிரக்கணக்கானோர் உயிரிழந்திருப்பதாக கணக்கிடப்பட்டுள்ளது.

கடாபியை ஒடுக்க எதிர்ப்புப் படையினருக்கு அமெரிக்கா தலைமையிலான நேட்டோ படையினரும் போரிட்டு வருகின்றனர்.

இந்த நிலையில்தான் கடாபிக்கு எதிராக சர்வதேச குற்றவியல் நீதிமன்றம் பிடிவாரண்ட் பிறப்பித்துள்ளது.

இதுகுறித்து சர்வதேச குற்றவியல் நீதிமன்ற நீதிபதி சஞ்சி மோனகேங் கூறுகையில், கடாபியும், அவரது மகனும், குற்றம் இழைத்தவர்கள் என்று நம்புவதற்கு போதுமான காரணங்கள் உள்ளன. அப்பாவி மக்களை கொன்ற குற்றச்சாட்டுக்கு அவர்கள் பொருத்தமானவர்களாக உள்ளனர். அவர்களது குற்றங்கள் தண்டனைக்குரியவை என்றார்.

கடாபிக்கு எதிராக வாரண்ட் பிறப்பிக்க வேண்டும் என்று சர்வதேச குற்றவியல் நீதிமன்றத்தின் தலைமை வழக்கறிஞர் லூயிஸ் மோரினோ ஒகாம்போ கடந்த மே மாதம் கோரியிருந்தார் என்பது குறிப்பிடத்தக்கது.

கைது வாரண்ட்டை இங்கிலாந்து வரவேற்றுள்ளது.

ராஜபக்சேவுக்கு??

கடாபியை விட மிகக் கொடுமையான தாக்குதலுக்கு உத்தரவிட்டனர் இலங்கையின் அதிபராக இருந்து வரும் ராஜபக்சே. அவரும், தம்பி கோத்தபயா ராஜபக்சே, முன்னாள் ராணுவத் தளபதி சரத் பொன்சேகா ஆகியோர் ஆடிய வெறியாட்டத்திற்கு லட்சக்கணக்கான அப்பாவித் தமிழர்கள் கொல்லப்பட்டனர்.

இவர்கள் மீது கடும் நடவடிக்கை எடுக்க வேண்டும், போர்க்குற்றத்திற்கான விசாரணைக்கு உட்படுத்த வேண்டும் என்று காட்டுக் கத்தலாக பல்வேறு நாடுகளிலும் தமிழர்களும், பிற அமைப்பினரும் கூறி வரும் நிலையில் அதுகுறித்து ஒரு நாடும் கண்டு கொள்ளாமலேயே உள்ளன. இந்த நிலையில் கடாபிக்கு எதிராக பிடிவாரண்ட் பிறப்பிக்கப்பட்டுள்ளது குறிப்பிடத்தக்கது.

http://thatstamil.oneindia.in/news/2011/06/27/international-criminal-court-issue-warrant-gaddafi-aid0091.html

போர்க்குற்றம் சுமத்துவோரின் உண்மை முகத்தை வெளிப்படுத்தும் ஆதாரங்கள் உள்ளன - மிரட்டுகிறார் சவீந்திர சில்வா

சிறிலங்காவில் இருந்து தீவிரவாதம் அழிக்கப்பட்டு விட்டபோதும், அது நாடு கடந்த அளவில் பரவியுள்ளதாக ஐ.நாவுக்கான சிறிலங்காவின் பிரதி நிரந்தர வதிவிடப் பிரதிநிதி மேஜர் ஜெனரல் சவீந்திர சில்வா தெரிவித்துள்ளார்.

அனைத்துலக மட்டத்தில் வியாபித்துள்ள புலிகள் ஆதரவு சக்திகளை தோற்கடிப்பதற்கான போர் தற்போது நடந்து வருவதாகவும் அவர் மேலும் கூறியுள்ளார்.

இது இலகுவான காரியமல்லை. ஏனென்றால் இது சிறிலங்காவுக்குள் நடக்கவில்லை.

அனைத்துலக சமூகம் மற்றும் தமது சொந்த நிகழ்ச்சி நிரலுக்குள் இயங்கிக் கொண்டிருக்கும் பல நடிகர்கள் இதில் தொடர்புபட்டுள்ளதாகவும் அவர் தெரிவித்துள்ளார்.

வெளிநாடுகளில் உள்ள விடுதலைப் புலிகளின் நிதியை அடையாளம் காணும் முயற்சியில் தாம் ஈடுபட்டுள்ளதாகவும் கூறியுள்ள மேஜர் ஜெனரல் சவீந்திர சில்வா இந்த முயற்சியில் வெற்றி பெற முடியும் என்றும் நம்பிக்கை வெளியிட்டுள்ளார்.

விடுதலைப் புலிகளுக்கு நேரடியாக உதவிய நாடுகள், அரசியல்வாதிகள், உதவி நிறுவனங்கள் பற்றிய தகவல்கள் தன்னிடம் உள்ளதாகவும், அவற்றை தான் முள்ளிவாயக்காலில் விடுதலைப் புலிகளின் அனைத்துலக பொறுப்பாளர் காஸ்ரோவின் பதுங்குகுழியில் இருந்து கண்டெடுத்ததாகவும் அவர் குறிப்பிட்டுள்ளார்.

இந்தத் தகவல்கள் சிறிலங்கா மீது பொய்யான போர்க்குற்றம் சுமத்தும் தரப்பினரின் உண்மையான முகத்தை அம்பலப்படுத்தும் வகையில் அமைந்துள்ளதாகவும் மேஜர் ஜெனரல் சவீந்திர சில்வா கூறியுள்ளார்.

மூன்று ஐரோப்பிய நாடுகளே விடுதலைப் புலிகளுக்கு விமானங்களையும் அவற்றுக்கான உதிரிப்பாகங்களையும் வழங்கியுள்ளன என்றும் அவர் மேலும் குற்றம்சாட்டியுள்ளார்.

http://www.puthinappalakai.com/view.php?20110627104155

அது என்ன மஞ்சுநாதா முன்பு சத்தியம்?

மங்களூர்: எதியூரப்பா, குமாரசாமியின் சவால்களால் இன்று தர்மஸ்தலா மஞ்சுநாத சாமி கோவில் நாடு முழுவதும் பிரபலமாக பேசப்பட்டு வருகிறது. ஆனால் கடந்த 800 ஆண்டுகளாக இங்கு சாமி முன்பு சத்தியம் செய்யும் நிகழ்ச்சி சத்தமின்றி நடந்து வருவது நிறையப் பேருக்குத் தெரியாது.

தென் கனரா மாவட்டத்தில் உள்ள எழில் கொஞ்சும் இடத்தில் அமைந்துள்ளது தர்மஸ்தலா. கோவில் வளாகத்தின் ஒரு பக்கம் நேத்ராவதி ஆறு அழகுற ஓடிக் கொண்டிருக்கிறது. இங்குள்ள மஞ்சுநாத சாமி கோவில் மிகவும் பழமையானது. கிட்டத்தட்ட 800 ஆண்டுகளாக இந்தக் கோவில் இப்பகுதி மக்களுக்கு அருள் பாலித்து வருகிறது.

இங்கு காலம் காலமாக ஒரு பழக்கம் நடைமுறையில் உள்ளது. அதாவது தாங்கள் சொல்வது உண்மை என்பதை நிரூபிக்க விரும்புவோர் இங்கு வந்து சாமி முன்பு நின்று, நான் சொல்வது உண்மை, சத்தியம் என்று சொல்லி நிரூபிப்பதுதான் அந்த வழக்கம். சாமி முன்பு பொய் சத்தியம் செய்தாலோ அல்லது பொய் சொன்னாலோ அவர்களுக்கு கடும் விளைவுகள் ஏற்படும் என்பது மக்களின் நம்பிக்கை. இதனால்தான், இங்கு வந்து சத்தியம் செய்வோர் சொல்வதை மற்றவர்கள் ஏற்றுக் கொள்கிறார்கள்.

அதை விட முக்கியமானது, தர்மஸ்தலாவி உள்ள மஞ்சுநாத சுவாமி கோவிலில் பல சிவில் வழக்குகளுக்கும் கூட தீர்ப்பு சொல்லப்படுகிறது. இதை கர்நாடக மாநில நீதிமன்றங்களும் ஏற்றுக் கொள்கின்றன. இந்தத் தீர்ப்புகளை வழங்குபவர்களுக்கு ஹெக்கடே என்று பெயர். தற்போது இந்த வம்சாவளியைச் சேர்ந்த 21வது ஹெக்கடேவாக, டாக்டர் வீரேந்திர ஹெக்கடே விளங்குகிறார்.

(ஹெக்கடே என்பது ஹெக்டே என்றும் துணைப் பெயரில் அழைக்கப்படுகிறது. கர்நாடகத்தைச் சேர்ந்த பந்த் மற்றும் பிராமணர்களிடையே இந்த துணைப் பெயரை காண முடியும். ஒக்கலிகா வகுப்பைச் சேர்ந்த சிலரும் கூட இந்த துணைப் பெயரை சேர்த்து வைத்துக் கொள்வதும் வழக்கம். இவர்களில் வீரேந்திர ஹெக்கடே பந்த் சமூகத்தைச் சேர்ந்தவர். மறைந்த கர்நாடக முதல்வர் ராமகிருஷ்ண ஹெக்டே, பிராமணர் என்பது குறிப்பிடத்தக்கது.)

இந்தியாவிலேயே கோவில் ஒன்றில் சிவில் வழக்குகளுக்குத் தீர்ப்புச் சொல்வது இரண்டே இரண்டு இடங்களில்தான் உள்ளது. ஒன்று ஒரிசா மாநிலம் சாக்ஷி கோபால் கோவில். 2வது இந்த தர்மஸ்தலா.

டாக்டர் வீரேந்திர ஹெக்கடே, மஞ்சுநாத சாமியின் பிரதிநிதியாக பார்க்கப்படுகிறார். எனவே இவர் சொல்லும் தீர்ப்பை யாரும் மறுப்பதில்லை, அப்படியே ஏற்றுக் கொள்கிறார்கள்.

இந்த வரலாறு கொண்ட கோவிலில்தான் இன்று குமாரசாமி சத்தியம் செய்துள்ளார். சத்தியம் செய்வதாக கூறிய எதியூரப்பா ஜகா வாங்கியுள்ளார்.

இங்கு அரசியல்வாதிகள் வந்து சத்தியம் செய்வதாக சவால் விடுவதும், சத்தியம் செய்வதும் புதிதல்ல. இந்த நடைமுறையை ஆரம்பித்து வைத்த பெருமை வீரப்ப மொய்லிக்கே உண்டு.

1983ம் ஆண்டு நாட்டை உலுக்கிய விவகாரம் மொய்லி டேப் விவகாரம். அப்போது அமைச்சராக இருந்த பைரே கெளடா, வீரப்ப மொய்லி மீது ஒரு புகாரைக் கூறினார். மொய்லி அப்போது சட்டசபை எதிர்க்கட்சித் தலைவராக இருந்தார். தனக்கும், சுயேச்சை எம்எல்ஏக்களுக்கும் தலா ரூ. 2 லட்சம் தருவதாக மொய்லி கூறினார் என்றும், அரசுக்கு அளித்து வரும் ஆதரவை விலக்கிக் கொள்ளுமாறு கூறியதாகவும் பைரே கெளடா பரபரப்புக் குற்றச்சாட்டை வைத்தார். இதுதொடர்பான ஆடியோ டேப் தன்னிடம் உள்ளதாகவும் அவர் கூறினார்.

இதனால் கோபமடைந்த மொய்லி, நீங்கள் சொல்வது உண்மை என்றால் என்னுடன் மஞ்சுநாத சாமி கோவிலுக்கு வந்து சத்தியம் செய்யுங்கள் என்று சவால் விட்டார். ஆனால் இருவருமே தர்மஸ்தலாவுக்குப் போகவில்லை, சத்தியமும் செய்யவில்லை. ஆனால் தர்மஸ்தலாவுக்கு வந்து சத்தியம் செய்யுமாறு விடப்பட்ட முதல் அரசியல் சவால் இது என்பது குறிப்பிடத்தக்கது.

அதன் பிறகு கடந்த ஆண்டு எதியூரப்பாவின் நம்பிக்கைக்குரியவரும், நெருக்கமானவரும், அமைச்சருமான ஷோபா கரந்தலஜே மீது குமாரசாமி பல்வேறு சொத்துக் குவிப்புப் புகார்களைச் சுமத்தினார். அப்போது மஞ்சுநாத சாமி முன்பு வந்து சத்தியம் செய்யத் தயாரா என்று ஷோபா சவால் விட்டார். ஆனால் ஷோபாவும் அதைப் பின்பற்றவில்லை. குமாரசாமியும் கண்டு கொள்ளவில்லை.

இப்படிப்பட்ட பின்னணியில்தான் இன்று குமாரசாமி மஞ்சுநாத சாமி முன்பு சத்தியம் செய்து பரபரப்பை ஏற்படுத்தியுள்ளார். மஞ்சுநாத சாமி முன்பு சத்தியம் செய்த முதல் அரசியல் தலைவர் என்ற பெயரையும் இதன் மூலம் குமாரசாமி பெற்றுள்ளார்.

http://thatstamil.oneindia.in/news/2011/06/27/kumarasamy-is-the-first-leader-take-oath-lordanjunatha-aid0091.html

தனி ஈழம் பெற்றுத் தர ஜெயலலிதாவால் மட்டுமே முடியும்! - உலகத் தமிழ் பண்பாட்டு இயக்கம்


கொழும்பு: முதல்வர் ஜெயலலிதா தவிர வேறு யாரையும் ஈழத் தமிழர்களுக்காக குரல் எழுப்ப தகுதி உடையவர்களாக நாங்கள் கருதவில்லை. இன்றைய சூழலில் தனி ஈழம் பெற்றுத் தர ஜெயலலிதாவால் மட்டுமே முடியும், என உலகத் தமிழ் பண்பாட்டு இயக்கம் கூறியுள்ளது.

42 நாடுகளில் அலுவலகங்களுடன் 1974ம் ஆண்டு முதல் இயங்கும் தமிழ் அமைப்பு உலகத் தமிழ் பண்பாட்டு இயக்கம்.

தமிழக சட்டமன்றத்தில் இலங்கை அரசுக்கு எதிராக போர்க்குற்ற விசாரணை மற்றும் இலங்கை மீதான பொருளாதாரத் தடை ஆகியவற்றை வலியுறுத்தி முதல்வர் ஜெயலலிதா கொண்டு வந்த தீர்மானங்களுக்கு இந்த இயக்கத்தின் தலைவர் கலைமணி, பொதுச் செயலர் துரை கணேசலிங்கம் ஆகியோர் நன்றியும் பாராட்டும் தெரிவித்துள்ளனர்.

மேலும் ஜெயலலிதா முயற்சி எடுத்தால் தனிஈழம் விரைவில் மலரும் என்றும் அவர் நம்பிக்கை தெரிவித்துள்ளார். இது தொடர்பாக அவர்கள் வெளியிட்டுள்ள அறிக்கை:

காரிருளில் மூழ்கி வழியறியாது தவித்துக் கொண்டிருந்த உலகத் தமிழினத்திற்கு நம்பிக்கை ஊட்டும் விடிவெள்ளியாய், எம் தமிழினத்தின் மீட்பராய் இன்று நாங்கள் காணும் அன்னையே! தங்களுக்கு உலகத் தமிழினத்தின் சார்பாக யுனெஸ்கோ நிறுவனம் அங்கீகரித்து 42 நாடுகளில் கிளைகளைக் கொண்டு பணியாற்றும் உலகத் தமிழ்ப் பண்பாட்டு இயக்கத்தின் வணக்கங்கள்.

பேரழிவை சந்தித்து இன்று எஞ்சியுள்ள ஈழத் தமிழர்கள் தங்களின் வாழ்விடங்களுக்குக் கூடச் செல்ல முடியாத அளவில் ஏதிலிகளாய், வானமே கூரையாய், புற்தரையே பஞ்சணையாய், உண்ண உணவின்றி, அருந்த நீருமின்றி, பெருமளவு அப்பாவி மக்கள் உடல் உறுப்புகள் இழந்து, உற்றார் உறவுகள் சிதறி அவர்கள் நிலையறியாது நம்பிக்கையற்ற நடைப் பிணங்களாக வாழ்ந்து கொண்டுள்ளனர்.

நம்பிக்கை நட்சத்திரம்...

அவர்களின் உரிமைக்கு குரலெழுப்ப நம்பிக்கையான ஒரு தலைமையை ஏக்கத்தோடு பார்த்துக் கொண்டிருக்கையில் தங்களின் மாபெரும் வெற்றியும், அதைத்தொடர்ந்த தங்களின் உரிமைக் குரலையும் கேட்டு எம்மக்கள் தங்களை காக்கும் தெய்வம் வந்துவிட்டதாகவே கருதத் தொடங்கி உள்ளனர்.

எங்களின் பாரிய நம்பிக்கை நட்சத்திரமாக விளங்கும் தங்களுக்கு எங்களின் அவசர வேண்டுகோளை சமர்ப்பிக்கிறோம்.

இந்திய உதவி தமிழருக்கு சரியாக சேர்கிறதா...

இந்திய அரசு தமிழர்களின் மறுவாழ்வுக்காக ஆயிரம் கோடிக்கும் மேலாக தந்துள்ள நிதி உதவி இன்னும் எம்மக்களுக்குப் போய்ச் சேரவேயில்லை. சேர்ந்துள்ள நிதியும் பாதிக்கப்பட்டுள்ள மக்களுக்கு உண்மையாக பயன்படுகிறதா என்பதைக் கண்காணிக்கவும் அங்கு யாருமில்லை. அதற்கு இந்திய அரசுக்கு ஒரு அழுத்தத்தைத் தரவும் இதுவரை எங்களுக்கென்று ஒரு ஆதரவு இருந்ததில்லை.

இன்று தாங்கள் ஈழ மக்களுக்காக காட்டும் அக்கறையை பாராட்ட வார்த்தைகள் இல்லை. இவர்களின் நம்பிக்கை நிலை பெற்று ஈழ மக்களின் உரிமையையும், பாதுகாப்பையும் உறுதி செய்ய தாங்கள் தொடர்ந்து, விரைந்து நடவடிக்கை எடுக்க வேண்டுகிறோம்.

உறுதியான முதல்வர்

தங்களின் அரசியல் வாழ்வில் இதுவரைத் தாங்கள் எடுத்த முடிவில் உறுதியானவர் என்பதாலேயே எம்மக்களின் வேதனைகளுக்கு தங்கள் ஆட்சித் திறன் மாமருந்தாகும் என்பதை அறிந்து நம்பிக்கையுடன் தங்களை நாடுகிறோம்.

சென்ற சில தினங்களுக்கு முன்னர் கூட யாழ்ப்பணத்தில் உள்ளாட்சி தேர்தலுக்காக தமிழ் தேசிய கூட்டமைப்பினர் நடத்திய கலந்துரையாடல் அமர்வுக்கு அனுமதிக்காது இலங்கை இராணுவத்தினர் நடத்திய தாக்குதலில் பாராளுமன்ற உறுப்பினர்களையும் சேர்த்து பலர் காயமடைந்துள்ளனர் என்ற செய்தி இலங்கையில் தமிழர்களுக்கு சம உரிமையும், வாழ்வுரிமைகளும் எந்த விதத்திலும் கிடைக்காது என்பதை உறுதிப்படுத்துகின்றன.

இருவேறுபட்ட மொழிகளைப் பேசும் இரு தேசிய இனங்களில் பெரும்பான்மை தேசிய இனம் சிறுபான்மை இனமக்களை வதை செய்வதை வாடிக்கையாக கொண்டுள்ள நாட்டிற்கு, அவ்வினத்தைச் சேர்ந்த உலகத் தமிழர்கள் எதிர்ப்பைக் காட்டி அங்கு மக்களாட்சியைக் கொண்டு வரவேண்டுவது அந்நாட்டின் இறையாண்மையில் குறுக்கிடுவதாகாது. இந்திய ஒன்றியத்தின் உறுப்பான தமிழகத்திற்கு அதில் மிகப் பெரிய பொறுப்பு உள்ளது. அதனை நன்றாக அறிந்து வைத்துள்ள தங்களால்தான் எங்கள் மக்களுக்கு விடிவைத் தரமுடியும்.

வேறு வழியில்லாமல் தொடங்கப்பட்ட ஆயுதப் போராட்டம்

ஒரு பாரிய இன அழிப்பினை தொடர்ந்து பலவாறாகவும் செய்து கொண்டிருந்த இலங்கை அரசை எதிர்த்து வேறு வழியில்லாமல் தொடங்கப்பட்ட ஆயுதப் போராட்டம் அதன் நோக்கத்தை எட்டாவிடினும் ஈழமக்கள் தங்களின் பாதுகாப்பிற்கு இனி தனி நாட்டினைத் தவிர வேறு வழியில்லை என்ற முடிவுக்கு வந்துள்ளார்கள்.

அண்மையில் உள்ள தேசங்கள் தங்களின் துயரங்களை கண்டுகொள்ளவில்லை என்ற எண்ணத்தால் அவ்வாறு எண்ணியிருக்கலாம். தங்களைப் போன்ற பாதுகாவலர் ஒருவர்தான் அவர்களின் வாழ்வுக்கு உறுதி கூறமுடியும்.

சூடான் தேசம் அம் மக்களின் விருப்புங்கிணங்க இரு தேசங்களாக பிரிய உலக நாடுகள் அங்கீகாரம் கொடுக்கும்போது ஈழ மக்களின் விருப்புக்கிணங்க ஒரு மக்களாட்சி முறையினை அவர்களுக்குப் பெற்றுத் தருவதற்கு தங்களை விட்டால் வேறு தகுதியுடைய தமிழ்த் தலைவர்கள் யாரும் இங்கு இல்லை. ஒரு மாநில அரசின் முதல்வர் தன்மாநில உறவு இன மக்களின் நலன்களில் ஈடுபாடு கொள்வது சட்டத்திற்கு புறம்பானதில்லை.

ஆப்பிரிக்க தேசங்களில் எழும் சண்டைகளில் அவற்றைச் சூழ்ந்துள்ள நாடுகள் தலையிடுகின்றன. தாங்கள் 7 கோடி தமிழகத் தமிழர்களுக்கு மட்டும் தலைவியில்லை. தமிழக முதல்வராய் உலகளாவிய 14 கோடி மக்களின் பிரதிநிதியாக அவர் நலன் காக்கும் பொறுப்புடைய தலைவியாவீர்கள். அப்படித்தான் இன்றைய உலகத் தமிழர்கள் கருதுகிறார்கள்.

எம்ஜிஆர் வழியில்...

மறைந்த மாமனிதர் புரட்சித்தலைவர் எம்.ஜி.ஆர் அவர்கள் அதனாலேயே ஈழத் தமிழர்களின் வாழ்வில் பெரிதும் அக்கறை கொண்டிருந்தார். 1977 ல் எங்கள் முதல் மாநாடு சென்னையில் நடந்த போது மிகுந்த ஈடுபாட்டுடன் கலந்து உரையாற்றினார். அன்றைய அண்ணா செய்தித்தாளில் அவரின் உரை வெளிவந்தது.

விடுதலைப் பெற்ற நாளிலிருந்து நடத்தப்பட்ட அகிம்சைப் போராட்டங்கள் பலன் தந்திருந்தால் விடுதலைப் புலிகளோ மற்றவர்களோ ஆயுதம் ஏந்தி இருக்கமாட்டார்கள். இவையெல்லாம் கடந்த செய்தியாகிவிட்டாலும் அப்போராட்டங்களின் காரணிகள் இன்னும் அப்படியே உள்ளன.

அண்டைப் பிரதேசம் என்ற நிலையிலும் அங்கு நடக்கும் மனிதப் பேரவலங்களைக் கண்டு கொள்ளாமல் தமிழ்நாடும் இந்தியாவும் மெளனமாக இருக்கமுடியாது. தங்களின் வெற்றியைப் பாராட்டும் இந்தியத் தலைவர்கள் இந்தியாவின் அரசியலில் பெருமளவுத் தாக்கத்தை ஏற்படுத்தும் என்கின்றனர். அதுதான் உண்மையும் கூட.

உலகத் தமிழரின் எதிர்ப்பார்ப்பு

அகில இந்தியத் தலைவியாகப் போகும் நீங்கள், தங்களின் தலைமையிலான அரசு கொடுக்கும் அழுத்தம், இந்திய மத்திய அரசின் வெளியுறவுக் கொள்கையில் நிச்சயம் மாற்றங்களை ஏற்படுத்தும். அதனையே உலகெங்கும் வாழும் தமிழர்கள் தங்களிடமிருந்து முற்றாக எதிர்பார்க்கிறார்கள். அவர்கள் தங்கள் மீது வைத்துள்ள நம்பிக்கை அளப்பரியது. தங்களைத் தவிரவும் வேறு யாரும் தமிழர்களுக்காக குரல் எழுப்ப தகுதி உடையவர்களாக நாங்கள் கருதவில்லை.

காலத்தே வந்துள்ள காவல் தெய்வமாய் தங்களை உலகளாவிய தமிழர்கள் நம்புகின்றார்கள். தாங்கள் பதவி ஏற்ற உடன் ஈழ ஏதிலிகளுக்கு தந்துள்ள வசதிகளும், சட்டப்பேரவையில் இலங்கையை கண்டிக்கும் தீர்மானங்களும் அதை நிரூபிக்கின்றன. வரலாற்றில் தாங்கள் என்றென்றும் நிலைத்திருப்பீர்கள்.

தனியான ஒரு குடும்பம், சுயநலம் இன்றி அனைத்துத் தமிழர்களின் 'அம்மா' வாகவே வாழும் தங்களுக்கு அதைவிட வேறு என்ன வேண்டும். ஆட்சி தொடங்கிய நிலையிலேயே எதிர்க்கட்சிகள் கூட ஆதரவு அளிக்கும் வண்ணம் செயல்படும் தங்களாட்சி சிறப்பாக நீடு நிலைத்திருக்க உலகத் தமிழர்களின் சார்பாகவும் உலகத் தமிழ்ப் பண்பாட்டு இயக்கம் சார்பாகவும் எங்கள் வாழ்த்தினையும் வேண்டுகோளையும் தெரிவித்துக் கொள்கிறோம்."

-இவ்வாறு அந்த அறிக்கையில் கூறப்பட்டுள்ளது.

http://thatstamil.oneindia.in/news/2011/06/27/tamil-forum-hopes-tamil-eelam-through-jayalalitha-aid0136.html

மகனை நினைத்து அடிக்கடி அழும் கனிமொழி: சிறை அதிகாரி தகவல்

புதுடில்லி: "டில்லி திகார் சிறையில் அடைக்கப்பட்டுள்ள கனிமொழி, தன் மகனை நினைத்து அடிக்கடி அழுது கொண்டிருக்கிறார்' என, சிறை அதிகாரி தெரிவித்துள்ளார்.

ஸ்பெக்ட்ரம் ஊழல் தொடர்பாக கைது செய்யப்பட்டுள்ள முன்னாள் முதல்வர் கருணாநிதியின் மகள் கனிமொழி, டில்லி திகார் சிறையில் அடைக்கப்பட்டுள்ளார். கடந்த மே 20ல் அவர் சிறையில் அடைக்கப்பட்ட போது, "வெளியே வந்து விடுவோம்' என்ற, நம்பிக்கையில் புன்னகையுடன் தான் இருந்தார்.சி.பி.ஐ., கோர்ட், ஐகோர்ட், சுப்ரீம் கோர்ட் என, அனைத்தும், அவரது ஜாமின் மனுவை நிராகரித்து விட்டன. இதனால், நம்பிக்கை இழந்த கனிமொழி, சிறையில், 15 அடி நீளம், 10 அடி அகலம் கொண்ட தனி அறையில் அடைக்கப்பட்டுள்ளார்.

சிறை அதிகாரி சுனில் குப்தா தெரிவித்ததாவது:எப்போதும் வருத்தம் தோய்ந்த முகத்துடன் காணப்படுகிறார். "சில நேரங்களில் தன் மகன் ஆதித்யாவை நினைத்து அழுகிறார். அவரது அறையில், 28 சேனல்கள் கொண்ட, "டிவி' வைக்கப்பட்டுள்ளது. எப்போதாவது அதைப் பார்க்கிறார். சில நேரங்களில் எதையாவது எழுதிக்கொண்டிருக்கிறார்.அவர் கவிதை எழுதுகிறாரா அல்லது தன் அனுபவங்களை எழுதுகிறாரா என்பது தெரியவில்லை. அவரை சந்திக்க வருபவர்களுடம் பெரும்பாலும் மகனை பற்றியே பேசுகிறார்.இவ்வாறு சுனில் குப்தா தெரிவித்தார்.

சுப்ரீம் கோர்ட் ஜாமின் மறுத்த நிலையில் கடந்த, 23ல், மகளை சென்று பார்த்த தி.மு.க., தலைவர் கருணாநிதி, தன் மகள் கனிமொழி மிக மோசமான சூழ்நிலையில் சிறையில் வாடுவதாக தெரிவித்தார். டில்லி வெயிலின் வெப்பம் தாங்காமல் கனிமொழியின் உடலில் கொப்புளங்கள் தோன்றியுள்ளன என்றும் கூறினார்.

இதற்கு பதிலளித்துள்ள திகார் சிறை அதிகாரி சுனில் குப்தா, " நாட்டில் உள்ள அனைத்து சிறைகளுக்கும் முன் உதாரணமாக திகார் சிறை உள்ளது. இதை தேசிய மனித உரிமை கமிஷனும், ஐகோர்ட்டும் ஏற்றுக் கொண்டுள்ளன. திகார் சிறை வளாகத்தில் மருத்துவமனை உள்ளது. இந்த மருத்துவமனையில் சிகிச்சை பெற, சிறை அதிகாரிகளின் அனுமதியை பெற வேண்டும் என்ற அவசியம் இல்லை. கனிமொழிக்கு மன வருத்தம் இருந்தாலோ, உடலில் கொப்புளங்கள் இருந்தாலோ, அதற்கு அவர் தாராளமாக சிகிச்சை பெறலாம்' என்றார்.

http://www.dinamalar.com/News_Detail.asp?Id=264756

பின்னிணைப்பு
இந்தக் காணொளி மனச்சாட்சி உள்ள மனிதர்களுக்கு மட்டும்

onralla irandalla oraayiram par sasees

பத்மநாபசுவாமி கோவில் பாதாள அறைகள் இன்று திறப்பு: தங்கக் குவியல்கள்?

திருவனந்தபுரம்: தங்கம் குவித்து வைக்கப்பட்டுள்ள பத்மநாபசுவாமி கோயிலின் பாதாள அறைகள் இன்று திறந்து ஆய்வு செய்யப்படுகிறது.

கேரள மாநிலம் திருவனந்தபுரத்தில் உள்ளது பத்மநாபசுவாமி கோவில். புராதான சிறப்பு மிக்க இக்கோயில் பல நூற்றாண்டுகளுக்கு முன் கட்டப்பட்டது. இந்த கோவில் தற்போது வரை திருவிதாங்கூர் மன்னர் பரம்பரையின் கட்டுபாட்டின் கீழ் இருந்து வருகிறது.

இக்கோயிலில் 6 பாதாள அறைகள் உள்ளதாக கூறப்படுகிறது. இவறறில் விலை மதிப்பற்ற ரத்தினங்கள், தங்கக் குவியல்கள் உள்பட ஏராளமான ஆபரணங்கள் இருப்பதாக கூறப்படுகிறது. இவற்றில் 2 அறைகள் 1875-ம் ஆண்டுக்கு பிறகு திறக்கப்படவில்லை.

இந்நிலையில் கோயில் பாதாள அறையில் உள்ள நகைகளை கணக்கெடுக்க வேண்டும் என்று திருவனந்தபுரத்தைச் சேர்ந்த சுந்தர்ராஜ் அய்யர் என்பவர் திருவனந்தபுரம் நீதிமன்றத்தில் வழக்கு தொடர்ந்தார். இதனை விசாரித்த நீதிமன்றம் நகைகளை கணக்கெடுக்க உத்தரவிட்டது.

இதை எதிர்த்து திருவிதாங்கூர் மன்னர் குடும்பம் கேரள உயர் நீதிமன்றத்தில் மேல் முறையீடு செய்தது. சிவில் நீதிமன்ற உத்தரவை உயர் நீதிமன்றம் உறுதி செய்தது. இந்த தீர்ப்பையும் எதிர்த்து மன்னர் குடும்பம் சார்பில் உச்ச நீதிமன்றத்தில் மேல் முறையீடு செய்யப்பட்டது. உச்ச நீதிமன்றமும் தீர்ப்பை உறுதி செய்தது.

இதையடுத்து உச்ச நீதிமன்றத்தால் நியமிக்கப்பட்ட இருவர் முனிலையில் இன்று (27ம் தேதி) பாதாள அறைகள் திறந்து ஆய்வு செய்யப்படுகிறது.
http://thatstamil.oneindia.in/news/2011/06/27/secret-chambers-padmanabhaswamy-temple-opened-today-aid0128.html

மகனை நினைத்து கண்ணீர் விட்டபடி தவிக்கும் கனிமொழி

டெல்லி: திஹார் சிறையில் அடைக்கப்பட்டுள்ள கனிமொழி, தனது மகனைப் பற்றியே எப்போதும் பேசிக் கொண்டிருக்கிறாராம். மகனை நினைத்து வாடி வரும் அவர் அவ்வப்போது கதறி அழுது விடுகிறாராம்.

2ஜி ஸ்பெக்ட்ரம் ஊழல் வழக்கில் கைதாகியுள்ள கனிமொழி திஹார் சிறையில் அடைக்கப்பட்டு ஒரு மாதத்திற்கும் மேலாகி விட்டது. அவருக்கு உச்சநீதிமன்றம் ஜாமீன் மறுத்து விட்டது. அதுவரை சற்று மனம் தளராமல் தைரியத்துடனும், புன்னகையுடனும் காணப்பட்ட கனிமொழி தற்போது கவலை படர்ந்த முகத்துடன் காணப்படுகிறாராம்.

உச்சநீதிமன்றம் ஜாமீன் மறுத்து விட்டதாலும், மகன் ஆதித்யாவைக் காண முடியாத நிலை ஏற்பட்டிருப்பதாலும், அவனை விட்டுப் பிரிந்து நீண்ட நாட்களாகி விட்டதாலும் பெரும் வருத்தத்திலும், துயரத்திலும் இருக்கிறாராம் கனிமொழி.

தனி செல்லில் தங்கியிருக்கும் கனிமொழி பெரும்பாலான நேரங்களை புத்தகம் படிப்பதிலும், எழுதுவதிலும் கழிக்கிறார். அவ்வப்போது கதறி அழுகிறாராம்.

அவரது முகம் சோகம் படர்ந்து காணப்படுவதாகவும், விரக்தியுடன் அவர் இருப்பதாகவும் சிறை வட்டாரத் தகவல்கள் மேலும் தெரிவிக்கின்றன. அடிக்கடி அழுவதால் அவரது முகம் சோகமயமாக உள்ளதாக கூறும் அத்தகவல்கள், முன்பெல்லாம் அடிக்கடி பேசும் கனிமொழி தற்போது எப்போதாவதுதான் சக கைதிகள் அல்லது அதிகாரிகளுடன் பேசுகிறார். அப்படிப் பேசினாலும் தனது மகனைப் பற்றித்தான் அதிகம் பேசுகிறார் என்கிறார்கள்.

ஸ்பெக்ட்ரம் ஊழலில் சிக்கி கைதாகி சிறையில் அடைக்கப்பட்டுள்ள முன்னாள் அமைச்சர் ராசாவின் நிலை பரவாயில்லை என்கிறார்கள். அவர் தனது சூழ்நிலையை நன்குஉணர்ந்து புரிந்து அதற்குப் பழகிக் கொண்டு விட்டார். இயல்பான நிலையில் அவர் காணப்படுகிறார். உடற்பயிற்சி, இந்தி கற்பது, சக கைதிகளுடன் இணைந்து விளையாடுவது என்று சகஜமான நிலையில் தன்னை வைத்துக் கொண்டுள்ளார். இதனால் மன இறுக்கம் இல்லாமல் இயல்பான நிலையில் இருக்கிறார். ஆனால் கனிமொழியால் சிறை சூழ்நிலையை தாங்கிக் கொள்ள முடியவில்லை. இதனால்தான் அவர் உடைந்து போய்க் காணப்படுகிறார்.

கனிமொழிக்கு டிவியும், கேபிள் இணைப்பும் தரப்பட்டுள்ளது. அதில் 28 சேனல்கள் வருகின்றனவாம். அவ்வப்போது டிவியைப் பார்த்து பொழுது போக்கி வருகிறாராம் கனிமொழி. பெரும்பாலும் செய்திகளையே பார்ப்பாராம்.

திஹார் சிறையில் தனது மகள் உடலில் கொப்புளம் வந்து அவதிப்படுவதாகவும், மோசமான நிலையில் இருப்பதாகவும் திமுக தலைவர் கருணாநிதி சமீபத்தில் கூறியிரு்நதார். ஆனால் திஹார் சிறை செய்தித் தொடர்பாளர் சுனில் குப்தா இதுகுறித்து கூறுகையில், தேசிய மனித உரிமை ஆணையம், டெல்லி உயர்நீதிமன்றம் ஆகியவை திஹார் சிறையின் சூழலை வெகுவாகப் பாராட்டியுள்ளன. சிறைக் கைதிகளின் அனைத்து அடிப்படைத் தேவைகள் குறித்தும் நாங்கள் பெரும் அக்கறை செலுத்தி வருகிறோம்.

எந்தக் கைதியாவது தனக்கு உடல் நிலை சரியில்லை என்றால் உடனடியாக உள்ளேயே உள்ள மருத்துவமனையை அணுகலாம். தேவைப்பட்டால் டாக்டர்கள் செல்லுக்கே நேரில் வந்தும் சிகிச்சை அளிப்பார்கள். இதற்கு யாரிடமும் அனுமதி பெறத் தேவையில்லை. தங்களுக்கு தேவையான மருந்துகளை கைதிகள் நேரடியாக டிஸ்பன்சரிக்குப் போய் வாங்கிக் கொள்ளவும் அனுமதி உள்ளது. கைதிகள் தங்களது மருத்துவத் தேவைகளை சிறைக் கண்காணிபப்பாளரிடம் தெரிவித்தால் அவர் உடனடியாக அதற்கான நடவடிக்கைகளை எடுப்பார் என்றார்.

மேலும் அவர் கூறுகையில், கனிமொழி ஒரு விசாரணைக் கைதி. விசாரணைக் கைதிகளுக்கு திஹார் சிறையில் எந்தக் கைத்தொழிலும் கற்றுத் தரப்படுவதில்லை. எனவே கனிமொழி மெழுகுவர்த்தி செய்ய கற்றுக் கொள்கிறார் என்று மீடியாக்களில் வந்த செய்தி தவறு என்றார்.

http://thatstamil.oneindia.in/news/2011/06/27/in-jail-kanimozhi-pines-son-reads-writes-aid0091.html

ஞாயிறு, 26 ஜூன், 2011

கருணாநிதி அரசு செய்த தவறுகளும், அதிமுக அரசு கற்க வேண்டிய பாடமும்!

சென்னை: இலவசங்களையும், கலர் கலராய் காந்தி படம் பொறித்த கரன்சிகளையம் அள்ளி வீசி விட்டால் போதும், தமிழகத்து மக்கள் கூட்டத்தை அழகாய் ஏமாற்றி விடலாம் என்று 'தப்புத் தாளங்களாய்' வலம் வந்த திமுக அரசுக்கும், கருணாநிதிக்கும் மக்கள் கற்றுக் கொடுத்த பாடம், நிச்சயம் அவர்களால் மறக்க முடியாது. அதேசமயம், இவர்களுக்கு மக்கள் அளித்த பாடத்திலிருந்து அதிமுக அரசு பல பாடங்களைக் கற்றுக் கொள்ள முடியும்.

உலகத் தொலைக்காட்சிகளிலேயே முதல் முறையாக என்று கூறுவது போல, தமிழக அரசியல் வரலாற்றிலேயே முதல் முறையாக, திமுகவுக்கு மட்டும்தான் அறுதிப் பெரும்பான்மையைக் கொடுக்காமல் மைனாரிட்டி அரசைக் கொடுத்தனர் தமிழக மக்கள் கடந்த 2006ம் ஆண்டு.

கடந்த 2001-06 ஜெயலலிதா ஆட்சியின்போது கடைசிக்கட்டத்தில் அவர் செய்த சில தவறுகளால் மக்களில் ஒரு தரப்பினர் அதிருப்தி அடைந்ததால் ஏற்பட்ட விளைவு அது. அதாவது அரை குறை மனதுடன்தான் ஆட்சி திமுக பக்கம் போனது அப்போது. ஜெயலலிதா செய்த தவறுகளை கருணாநிதி செய்ய மாட்டார் என்ற நம்பிக்கையில் பாதி மக்கள் திமுகவுக்கு ஆதரவாக வாக்களித்தனர். கருணாநிதியும் மக்கள் எதிர்பார்த்தபடி நடந்து கொண்டார். ஆனால் சற்று வித்தியாசமாக.

மக்கள் எதிர்பார்க்காத, ஜெயலலிதா கூட செய்ய நினைக்காத, முடியாத தவறுகளை அவர் அடுக்கடுக்காக செய்தார். அதனால் ஏற்பட்ட விளைவுதான் 2011 சட்டசபைத் தேர்தலில் மிகப் பெரிய அடி, மரண அடியை திமுகவுக்கு மக்கள் கொடுத்து விட்டனர். காரணம், இதுவரை தமிழக அரசியல் வரலாற்றில் எந்த ஒரு ஆட்சியிலும் இப்படிப்பட்ட தவறுகள், குழப்பங்கள், அட்டகாசங்கள் நடக்கவில்லை என்பதே.

வெறும் மாற்றம் தேவை என்று நினைத்து தமிழக மக்கள் ஆட்சிகளை மாற்றுவதில்லை. அப்படித்தான் ஒரு பொதுவான எண்ணம் நிலவுகிறது. தோற்றவர்கள் இதையே காரணமாக கூறி தப்பித்துக் கொள்கிறார்கள். ஆனால் உண்மை அது இல்லை. அப்படி இருந்திருந்தால் எம்.ஜி.ஆர் தொடர்ந்து முதல்வராக இருந்திருக்க முடியாது. அவரை மக்கள் மாற்றவில்லையே. காரணம், ஒவ்வொரு ஆட்சியின்போதும் அவர் ஒரு சாதனையைச் செய்தார் எம்.ஜி.ஆர்..

ஆனால் கருணாநிதியும் சரி, ஜெயலலிதாவும் சரி ஒவ்வொரு முறையும் செய்த தவறுளால்தான் ஆட்சிகளை மாறி மாறி இழந்து வந்திருக்கிறார்கள்.

1991-96ல் ஜெயலலிதா தவறு செய்தார் என்பதால்தான் மீண்டும் கருணாநிதிக்கு மக்கள் வாக்களித்தனர். ஆனால் ஜெயலலிதாவையும், அவரது அமைச்சர்களையும் பழி வாங்குவதிலேயே கருணாநிதி குறியாக இருந்தார் என்ற கெட்ட பெயர் அவருக்கு ஏற்பட்டதால் அடுத்த முறை மக்கள் வாக்கை மாற்றிப் போட்டனர்.

பின்னர் மீண்டும் வந்த ஜெயலலிதா, கருணாநிதியைப் பழிவாங்குவதில் வேகம் காட்டினார். நள்ளிரவில் அவரைக் கைது செய்தார். அரசு ஊழியர்கள் மீது கடும் நடவடிக்கை எடுத்தார். கட்டாய மதமாற்றத் தடுப்புச் சட்டத்தைக் கொண்டு வந்தார். இந்தத் தவறுகளால் அவருடைய ஆட்சியை மக்கள் மாற்றி மீண்டும் திமுகவிடம் கொடுத்தனர்.

2006ல் நடந்த தேர்தலில் மீண்டும் ஆட்சிக்கு வந்தார் கருணாநிதி. வந்த வேகத்தில் இலவச அரிசி உள்ளிட்ட திட்டங்களை அவர் நிறைவேற்றியபோது மக்கள் வியந்தனர். ஆனால் இது குறுகிய காலம்தான். பிறகு நடந்ததெல்லாம் தமிழக மக்கள் மறக்க முடியாத அளவிலான வலியுடன் கூடிய வரலாறுகள்.

கருணாநிதியின் குடும்பத்தினர் படிப்படியாக ஆட்சி அதிகாரத்தில் தலையிடத் தொடங்கினர். ஸ்டாலின், அழகிரி என்ற அளவோடு நின்றிருந்த கருணாநிதி குடும்பத்தின் ஆதிக்கம், படிப்படியாக பிறருக்கும் பரவி வியாபித்து, விஸ்வரூபம் எடுக்கத் தொடங்கியது.

ஆட்சி, அரசியல், சமுதாயம், அதிகாரம், திரையுலகம் என எல்லா பக்கங்களிலும் கருணாநிதி குடும்பத்தார் யாராவது ஒருவரின் ஆதிக்கம் வலுவாக இருந்ததால் யாருமே, இவர்களைத் தாண்டி, எதுவுமே செய்ய முடியாத நிலை. கட்டப் பஞ்சாயத்து, ரவுடியிசம், மிரட்டல், உருட்டல் என்று தலைவிரித்தாடியது.

இதைத் தடுக்க கருணாநிதி எதுவும் செய்யவில்லை அல்லது செய்ய முடியவில்லை என்பதே உண்மை.

இதுகுறித்தெல்லாம் புகார்கள் கிளம்பியபோதெல்லாம் தனது ஜால வார்த்தைகளாலும், தமிழ் திறமையாலும் சமாளித்தார் கருணாநிதி. அதை நிவர்த்தி செய்ய முயலாமல் தனது வார்த்தை ஜாலத்தால் தவிர்த்தாரே தவிர முற்றுப்புள்ளி வைக்க முயலவில்லை.

மக்களுக்குத் தேவை ஓட்டுப் போட காசு, அனுபவிக்க இலவச் திட்டங்கள், இவை மட்டும்தானே, இதைத்தான் நாம் கொடுத்து விட்டோமே என்று இறுமாப்புடன் திமுகவினர் பகிரங்கமாகவே சொல்லும் நிலை தமிழகத்தில் காணப்பட்டது. இந்த மாபெரும் தவறுகளால்தான் மக்கள் அதிமுகவுக்கு அறுதிப் பெரும்பான்மையுடன் ஆட்சியைக் கொடுத்துள்ளனர்.

எம்.ஜி.ஆருக்குப் பிறகு வந்த திமுக, அதிமுக ஆட்சிகளைப் பார்த்தால் இரு தரப்புமே தாங்கள் செய்த தவறுகளால்தான் ஆட்சிகளை இழந்துள்ளார்களே தவிர மக்கள் மாற்றத்தை விரும்பியதால் ஆட்சிகளை இழக்கவில்லை என்பது தெரியும்.

கடந்த திமுக ஆட்சியிலிருந்து அதிமுகவும், அதன் ஆட்சியும் நிறைய பாடங்களைக் கற்றுக் கொள்ள வேண்டியுள்ளது.

இலவசங்கள் மட்டும் போதாது:

வெறும் இலவசத் திட்டங்கள் மட்டும் மக்களின் அபிலாஷைகளை பூர்த்தி செய்து விடாது என்பதை அதிமுக அரசு தெரிந்து கொள்ள வேண்டும். அவை தவிர மக்களின் சாதாரண நிலை அபவிருத்தி அடைய வகை செய்ய வேண்டும். மின்சாரம், சாலை, குடிநீர் உள்ளிட்ட அடிப்படை விஷயங்களுக்குத்தான் அதிக முக்கியத்துவம் தர வேண்டும் என்பதை அதிமுக அரசு புரிந்து கொண்டு அதன்படி செயல்பட வேண்டும்.

குடும்ப அரசியல்:

எங்கும் தமிழ், எதிலும் தமிழ் என்று கூறிய கருணாநிதி தான் முதல்வராக இருக்கையில் எங்கும் என் குடும்பம், எதிலும் என் குடும்பம் என்ற கொள்கையை கடைபிடித்தார். இதுவும் தோல்விக்கான முக்கிய காரணம். சென்னையில் யார் ஒரு கோடிக்கு மேல் நிலம் விற்றாலோ, வாங்கினாலோ கருணாநிதி குடும்பத்தாருக்கு தெரிவித்தாக வேண்டும். அவர் குடும்பத்தார் விரும்பிய இடத்தையெல்லாம் உரிமையாளர்களுக்கு விற்க விருப்பம் இல்லாவிட்டாலும் விற்பனை செய்யத் தான் வேண்டும். இதனால் நிலம் வாங்க, விற்க மக்கள் அஞ்சினர்.

கருணாநிதியின் குடும்ப ஆட்சியால் மக்கள் கடு்ம் அதிருப்தி அடைந்து போயிருந்தனர். அதேபோன்ற நிலையை சசிகலா குடும்பத்தார் மூலம் ஜெயலலிதா கொண்டு வந்து விடக் கூடாது என்பது மக்களின் எதிர்பார்ப்பாக உள்ளது. இதுவரை இல்லாத புதிய ஜெயலலிதாவைக் காண அவர்கள் ஆவலுடன் உள்ளனர். அவர் எடுத்து வைக்கும் ஒவ்வொரு அடியையும் அவர்கள் கவனத்துடன் பார்த்துக் கொண்டுள்ளனர். எந்த ஒரு இடத்திலும் சசிகலா குடும்பத்தினரின் கை ஓங்குகிறது, ஆதிக்கம் காணப்படுகிறது என்ற குறை வந்து விடாமல் பார்த்துக் கொள்ள வேண்டியது ஜெயலலிதாவின் கடமையாகும்.

சட்டம் ஒழுங்கு:

முந்தைய ஆட்சியில் காவல் துறை என்று ஒரு துறை இருந்தும் குற்றவாளிகள் பயமில்லாமல் குற்றங்கள் புரிந்த காலம். கைது செய்தால் நான் ஆளுங்கட்சி என்று வெளியே வந்துவிடுவார்கள். கொலை, கொள்ளை, கற்பழிப்பு என குற்றங்கள் கணக்ககில் அடங்காமல் நடந்தது. சட்டம் ஒழுங்கு முற்றிலும் சீர் கெட்டிருந்தது. மதுரையில் மத்திய அமைச்சர் அழகிரியின் ஆதரவாளர்கள் காவல்துறைக்கு அஞ்சாமல் மனம்போன போக்கில் நடந்தார்கள். அவர்களை எதிர்ப்பார் யாருமில்லை என்றிருந்தது. அவர்கள் வைத்ததே மதுரையில் சட்டமாக இருந்தது.

அழகிரிக்குத் தெரியாமல் ஒரு பியூனைக் கூட மதுரை பக்கம் மாற்ற முடியாது என்ற நிலை அப்போது இருந்தது. ஸ்டாலினுக்குத் தெரியாமல் வட தமிழகத்தில் ஒரு வடையைக் கூட விற்க முடியாது என்ற நிலை. கனிமொழி, ராசாத்தி அம்மாளின் கட்டுப்பாடுகளும் அமோகம். இவற்றையெல்லாம் சுத்தமாக இல்லாமல் செய்யும் வகையில், காவல்துறையின் முழுக் கட்டுப்பாட்டில் சட்டம் ஒழுங்கையும், ஒப்படைக்க ஜெயலலிதா நடவடிக்கை எடுக்க வேண்டும்.

ஈழத் தமிழர்கள் பிரச்சனை:

இலங்கையில் அந்நாட்டு அரசு ஈழத் தமிழர்களை கொன்று குவிக்கையில் அப்போதைய தமிழக அரசு அதைத் தடு்கக எந்தவித நடவடிக்கையும் எடுக்கவில்லை. மாறாக ஈழப் பிரச்சனையை சுயலாபத்திற்காகத் தான் பயன்படுத்தியது. தமிழக்தில் தமிழர்கள் கொதித்தெழுந்து போராட்டங்கள் நடத்தியும் பலனில்லாமல் போனது.

ஈழத் தமிழர் பிரச்சினைக்காக முன்பு பலமுறை கருணாநிதி குரல் கொடுத்ததெல்லாம் கூட, போராட்டம் உச்சத்தில் இருந்தபோது அவர் போட்ட 'டிராமாக்களால்' அடிபட்டுப் போய் விட்டது. ஈழத் தமிழர்களுக்கு துரோகம் செய்தவர் கருணாநிதி என்ற பெயர்தான் அவருக்கு மிச்சம். எனவே, ஈழத் தமிழர் பிரச்சினையில் சுயநலம் பார்க்காமல், சுத்தமான மனதுடன் செயல்பட வேண்டியது ஜெயலலிதாவின் கடமையாகும்.

மீனவர்கள் பிரச்சனை:

கடலுக்கு மீன்பிடிக்கச் செல்லும் தமிழக மீனவர்களை கைது செய்வது, கொலை செய்வது, அவர்கள் உடைமைகளை சேதப்படுத்துவதை இலங்கை கடற்படை வழக்கமாக கொண்டுள்ளது. தங்களுக்கு பாதுகாப்பு கேட்டு மீனவர்கள் அலறியது அரசின் காதில் விழாமலே போனது. தேர்தல் நேரத்தில் மட்டும் இலங்கை கடற்படையால் கொல்லப்பட்ட மீனவர்களின் குடும்பங்களுக்கு லட்சக் கணக்கில் நிவாரணம் வழங்கப்பட்டது. இந்தப் பிரச்சினைக்கும் ஜெயலலிதா முக்கியத்துவம் தந்து அவர்களுக்கு ஆறுதலையும், நிம்மதியையும் ஏற்படுத்த வேண்டியது முக்கியமானது.

கடும் மின்பற்றாக்குறை:

திமுக அரசு தமிழகத்தில் ஏராளமான தொழிற்சாலைகள் அமைக்க அனுமதி அளித்தது. அதை ஊக்குவித்தது. ஆனால் தொழிற்சாலைகளுக்கு தங்கு தடையில்லா மின்சாரத்தை வழங்கிவிட்டு மக்களை இருளில் வாடவிட்டது. திமுக அரசு தோற்றத்தற்கு மின் வெட்டும் ஒரு முக்கியமான காரணம் எனலாம். அதாவது முதலாளிகளை வாழ வைத்து அப்பாவி ஜனங்களை இருட்டடிப்பு செய்து விட்டார் கருணாநிதி என்ற பழிச்சொல்லை திமுக அரசு சம்பாதித்துக் கொண்டது. அந்த அவலத்தை ஜெயலலிதா அரசு சந்திக்காமல் தவிர்க்க வேண்டும். மக்களுக்கு முக்கியத்துவம் கொடுக்க முன்வர வேண்டும்.

சினிமா:

சினிமாத் துறையே கருணாநிதி குடும்பத்தார் பிடியில் தான் இருந்தது. அவர்களைக் கேட்காமல் எதுவும் நடக்காது என்ற நிலை இருந்தது. எதிர்த்தவர்கள் காணாமல்போனார்கள். ரெட்ஜெயின்ட், கிளவுட் 9, சன் பிக்சர்ஸ் தான் பிரதான தயாரிப்பாளர்கள். அவர்கள் கேட்டால் படத்தை கொடுத்துவிட வேண்டும். அவர்கள் விரும்பும் நடிகரை தலையில் வைத்து ஆடியதும், விரும்பாத நடிகரை படாதபாடு படுத்தியதும் உலகம் அறிந்ததே.

அதேபோல சினிமாத்துறையினரை தலையில் தூக்கி வைத்துக் கொண்டு ஆடிய திமுகவின் தாண்டவத்தால் பாதிக்கப்பட்டோரும் நிறைய. நடிகர், நடிகைகளை சகட்டு மேனிக்கு கோபாலபுரம் வீட்டுக்குள்ளும், தலைமைச் செயலகத்திற்குள்ளும் நுழைய அனுமதித்து தமிழக மக்களை காமெடியர்களாக ஆக்கியது திமுக ஆட்சி. திரைத்துறையினருக்கு அளவுக்கு அதிகமாக சலுகைகளைக் கொடுத்தும், அவர்களை வளைத்து வைத்தும் தமிழக மக்களை கிட்டத்தட்ட அவமதிப்புக்குள்ளாக்கியது முந்தைய தமிழக அரசு. அந்த நிலையை அதிமுக ஆட்சி கொண்டு வந்து விடக் கூடாது.

விலைவாசி உயர்வு:

காய்கறி உள்ளிட்ட அத்தியாவசியப் பொருட்களின் விலை விண்ணைத் தொட்டது. ஏழை மற்றும் நடுத்தர மக்கள் கண்பிதுங்கிய போது அரசு கண்டுகொள்ளவில்லை. சாக்குபோக்கு கூறி விலைவாசி உயர்வை நியாயப்படுத்தியது. விலைவாசி உயர்வைக் கண்டித்து மற்ற கட்சிகள் ஆர்ப்பாட்டம் நடத்தியபோது அதை உதாசினப்படுத்தியது.

நதி நீர்ப் பிரச்சினைகள்:

நதி நீர்ப் பிரச்சினைகளைத் தீர்க்க திமுக அரசு ஆக்கப்பூர்வமான நடவடிக்கை எடுக்கவில்லை என்பது இன்னொரு பெரும் குற்றச்சாட்டு. குறிப்பாக முல்லைப் பெரியாறு, காவிரி, பாலாறு பிரச்சினைகளில் திமுக அரசு உருப்படியாக எதுவும் செய்யவில்லை என்பது மக்களின் அதிருப்தியாகும். அதேபோல ஓகனேக்கல் கூட்டுக் குடிநீர்த் திட்டத்தை, எடியூரப்பாவுடன் ரகசிய பேச்சு நடத்தி முடக்கிப் போட்டு விட்டது திமுக அரசு என்ற குற்றச்சாட்டும் உள்ளது. இதில் எல்லாம் சுமூகத் தீர்வு காண அதிமுக அரசு முயல வேண்டும் என்பது மக்களின் எதிர்பார்ப்பு.

வெட்டிச் செலவுகளுக்கு விடை கொடுப்போம்:

கடந்த திமுக ஆட்சியின்போது எந்த நிகழ்ச்சியாக இருந்தாலும் அது படோடபமாக, தாம் தூம் என்றுதான் நடக்கும். அப்படிப்பட்ட காட்சிகளை இப்போதைய அதிமுக ஆட்சியில் காண முடியவில்லை. அது ஆரோக்கியமானதாக இருக்கிறது. அதேபோல பல்வேறு பாராட்டு விழாக்களில்தான் முதல்வராக இருந்த கருணாநிதி அதிகம் கலந்து கொண்டார். அவற்றையும் இப்போதைய ஆட்சியில் காண முடியவில்லை. இதெல்லாம் கூட ஆரோக்கியமானதுதான். இதுதொடர வேண்டும்.

இப்படி கடந்த கால திமுக அரசு செய்த தவறுகளைப் பார்த்து அதை திரும்பச் செய்து விடாமல் ஜெயலலிதா தலைமையிலான அதிமுக அரசு செய்ய வேண்டும் என்பது மக்களின் பெரும் எதிர்பார்ப்பாக உள்ளது. அதேசமயம், கடந்த அரசு அமல்படுத்திய உண்மையிலேயே மக்களுக்கு உதவக் கூடியதாக இருந்த திட்டங்களை தூக்கிப் போட்டு விடாமல், அதை அப்படியோ அல்லது மேம்படுத்தியோ அமலாக்கினால் உண்மையிலேயே மக்கள் மகிழ்வார்கள். மறுபடியும் மாற்றம் தேவை என்ற எண்ணத்திற்குப் போக மாட்டார்கள்.

http://thatstamil.oneindia.in/news/2011/06/26/dmk-govt-s-mistakes-lessons-admk-aid0091.html

சோரம் போன கணவனுக்கு செருப்படி கொடுத்த மனைவி, இந்தியாவில் பரபரப்பு!

வட இந்தியாவைச் சேர்ந்தவர் விஷால் சர்மா என்பவருக்கு தன்னுடன் பணிபுரிந்த பெண் ஒருவருடன் காதல் தொடர்பு இருந்தது.காதலிப்பது ஒன்றும் தவறில்லை என்றாலும் விசாலுக்கு ஏற்கனவே திருமணமான மனைவி இருந்தார்.அவர் தனது கணவர் புதிய காதலியுடன் நெருக்கமாக இருந்தபோது கையும் களவுமாக பிடித்து இருவரையும் நையப்புடைத்துவிட்டார்
காவல்துறையினர் வந்து நிலைமையை கட்டுப்பாட்டில் கொண்டு வர முயன்றபோதும் முடியவில்லை.
இத்தனைக்கும் விஷாலின் மனைவிக்கு வெறும் 15 வயதுதான்.

ஸ்டாலினுக்கு வயதாகி விட்டது, தமிழகத்தின் அடுத்த முதல்வர் கனிமொழி

தமிழகத்தின் அடுத்த முதல்வர் கனிமொழி என்று திமுக பேச்சாளர் வாகை முத்தழகன் பேசியது திமுக வட்டாரத்தில் பரபரப்பை ஏற்படுத்தியுள்ளது.

நெல்லையில், தி.மு.க. நிர்வாகிகளின் ஆலோசனை கூட்டம் நெல்லை சங்கீதசபாவில் நடந்தது. இந்த கூட்டத்திற்கு மாவட்ட செயலாளர் கருப்பசாமிபாண்டியன் தலைமை வகித்தார்.

இந்த கூட்டத்தில் மாநில பேச்சாளர் வாகை முத்தழகன் பேசுகையில்,

சட்டசபைத் தேர்தலில் திமுகவின் தோல்விக்கு காரணம், கட்சித் தொண்டர்களுக்கு எதுவும் செய்யாதது தான்.

மாவட்டத்தில் குறிப்பிட்ட ஜாதியினருக்குத் தான் கட்சியில் அதிகம் முக்கியத்துவம் தரப்படுகிறது. மாவட்ட செயலாளர் கருப்பசாமி பாண்டியனின் ஆதரவாளர்கள் இன்றைக்கு நெல்லை மாவட்ட அமைச்சரான இசக்கி சுப்பையாவின் பின்னால் அணிவகுத்து செல்கிறார்கள்.

சபாநாயகர் ஆவுடையப்பனின் மகன் பிரபாகரன், கட்சிக்காரர்களை மதிப்பதில்லை. சங்கரன்கோவில் தங்கவேலுக்கு எம்.பி. பதவி வழங்கப்பட்டது. அவர், சங்கரன்கோவிலை விட்டு வேறு எங்கேயும் செல்வதே இல்லை. பின்பு எப்படி கட்சி வளரும்.

இளைஞர் அணி தளபதி என கூறும் ஸ்டாலினுக்கு 60 வயது ஆகிவிட்டது. கண் தெரியாதவர், காது கேட்காதவர்களை எல்லாம் இளைஞர் அணியில் வைத்திருந்தால் கட்சி எப்படி வளரும். சிறையில் இருக்கும் கனிமொழி தான் தமிழகத்தின் அடுத்த முதல்வர் என்றார்.

அடுத்து பேசிய மாவட்டச் செயலாளர் கருப்பசாமி பாண்டியன் பேசுகையில்

இன்றைக்கு காங்கிரஸ் கட்சியினர் நம்மை பார்த்து குறை கூறுகின்றனர். நாம் அந்த கட்சியுடன் கூட்டணியில் தொடர்வதா இல்லையா என்பதை கட்சித் தலைமை தான் முடிவெடுக்க வேண்டும். இப்போது எடுக்கிற முடிவை கொஞ்சம் முன்பே எடுத்து காங்கிரசை கழற்றி இருக்கலாம் என்றார்.

கனிமொழியை உயர்த்தியும், மு.க.ஸ்டாலினை தாழ்த்தியும் பேசிய வாகை முத்தழகன் பேச்சால் திமுக வட்டாரத்தில் பரபரப்பு ஏற்பட்டுள்ளது.
http://thatstamil.oneindia.in